លោក ហ៊ុន សែន ជួបជាមួយក្រុមមេធាវីជនជាតិបារាំង ប្រមូលភស្តុតាងបន្ថែមទៀតដើម្បីដាក់បន្ទុកលើអតីតមេដឹកនាំបក្សប្រឆាំង លោក សម រង្ស៉ី ពីបទ «បរិហារកេរ្តិ៍ជាសាធារណៈចំពោះបុគ្គល» ពាក់ព័ន្ធនឹងឃាតកម្មរបស់អតីតអគ្គស្នងការនគរបាលជាតិ លោក ហុក ឡង់ឌី ដែលតុលាការនៅទីក្រុងប៉ារីស ប្រទេសបារាំង គ្រោងនឹងបើកសវនាការនៅថ្ងៃទី១ ខែកញ្ញា ឆ្នាំ២០២២ ខាងមុខនេះ។
មេដឹកនាំបក្សកាន់អំណាច លោក ហ៊ុន សែន កាលពីថ្ងៃទី១៤ ខែមិថុនា ឆ្នាំ២០២២ បានជួបពិភាក្សាជាមួយក្រុមមេធាវីជនជាតិបារាំង ចំនួន ៤រូបដែលជាមេធាវីតំណាងឱ្យរូបលោក និងលោក ឌី វិជ្ជា ដែលត្រូវជាកូនប្រុសបង្កើតរបស់លោក ហុក ឡង់ឌី នៅភូមិគ្រឹះរបស់លោកក្នុងក្រុងតាខ្មៅ ជុំវិញការរៀបចំភស្តុតាងបន្ថែម ដើម្បីដាក់បន្ទុកលើអតីតមេដឹកនាំប្រឆាំង លោក សម រង្ស៉ី ពីបទបរិហារកេរ្តិ៍នៅតុលាការទីក្រុងប៉ារីស ប្រទេសបារាំង។
ការប្រមូលភស្តុតាងនេះ ធ្វើឡើងស្របពេលដែលសវនាការលើអតីតមេដឹកនាំប្រឆាំង លោក សម រង្ស៊ី នឹងធ្វើឡើងនៅទីក្រុងប៉ារីស ប្រទេសបារាំង នៅដើមខែកញ្ញា ខាងមុខនេះ។
កាលពីថ្ងៃទី២០ ខែសីហា ឆ្នាំ២០១៩ មេធាវីការពារក្តីឱ្យមេដឹកនាំបក្សកាន់អំណាច លោក ហ៊ុន សែន និងលោក ឌី វិជ្ជា បានអះអាងថា ពួកគេបានដាក់ពាក្យបណ្តឹងជាផ្លូវការប្តឹងអតីតមេដឹកនាំប្រឆាំង លោក សម រង្ស៊ី រួចហើយពីបទ «បរិហារកេរ្តិ៍ជាសាធារណៈចំពោះបុគ្គល» ទៅកាន់តុលាការទីក្រុងប៉ារីស ប្រទេសបារាំង។
អតីតមេដឹកនាំប្រឆាំង លោក សម រង្ស៊ី កាលពីថ្ងៃទី២ ខែមិថុនា ឆ្នាំ២០១៩ បានធ្វើអត្ថាធិប្បាយបែបសន្និដ្ឋាន និងវិភាគថា លោក ហ៊ុន សែន គឺជាអ្នកបញ្ជាឲ្យមានការសម្លាប់លោក ហុក ឡង់ឌី តាមរយៈនៃការធ្វើឲ្យផ្ទុះឧទ្ធម្ភាគចក្រដែលលោក ហុក ឡង់ឌី ជិះពីភ្នំពេញទៅខេត្តស្វាយរៀង កាលពីថ្ងៃទី៩ ខែវិច្ឆិកា ឆ្នាំ២០០៨ កន្លងទៅ។
ជាងនេះទៀត ក្នុងកិច្ចសម្ភាសន៍ជាមួយវិទ្យុសំឡេងសហរដ្ឋអាមេរិក (VOA) អតីតមេដឹកនាំប្រឆាំងរូបនេះបានធ្វើការចោទប្រកាន់យ៉ាងធ្ងន់ៗថា លោក ហ៊ុន សែន គឺជាមេខ្លោងឲ្យគេសម្លាប់លោក ហុក ឡង់ឌី យ៉ាងពិតប្រាកដ ហើយកូនប្រុសរបស់លោក ហុក ឡង់ឌី គឺលោក ឌី វិជ្ជា ដែលជាកូនប្រសារបស់លោក ហ៊ុន សែន សព្វថ្ងៃនេះ កំពុងរៀបចំផែនការជាមួយរដ្ឋមន្ត្រីក្រសួងមហាផ្ទៃ លោក ស ខេង ដើម្បីរកវិធីសងសឹកលោក ហ៊ុន សែន ចំពោះឃាតកម្មលើឪពុករបស់ខ្លួន។
ជុំវិញបញ្ហានេះ រដ្ឋមន្ត្រីក្រសួងមហាផ្ទៃ លោក ស ខេង បានដាក់ពាក្យប្ដឹងលោក សម រង្ស៊ី ទៅកាន់សាលាដំបូងរាជធានីភ្នំពេញផងដែរ ដោយទាមទារសំណងជំងឺចិត្ត ១លានដុល្លារអាមេរិក ក្នុងនោះលោក ស ខេង បញ្ជាក់ថា ការចោទប្រកាន់របស់លោក សម រង្ស៊ី បែបនេះ គឺមានចេតនាបំបែកបំបាក់ថ្នាក់ដឹកនាំរដ្ឋាភិបាលកម្ពុជាយ៉ាងធ្ងន់ធ្ងរ។
យ៉ាងណាក៏ដោយ មុនពេលដាក់ពាក្យបណ្តឹង លោក ហ៊ុន សែន ធ្លាប់បានបបួលលោក សម រង្ស៊ី ស្បថដាក់ជីវិតខ្លួនឯង ក្រុមគ្រួសារ និងសាច់ញាតិ ព្រមទាំងមនុស្សជំនិត ១០០នាក់ផងដែរ ប៉ុន្តែលោក សម រង្ស៊ី នៅតែអះអាងថា ការរៀបផែនការសម្លាប់លោក ហុក ឡង់ឌី នេះ ដោយសារតែលោក ហុក ឡង់ឌី ដឹងរឿងអាក្រក់របស់លោក ហ៊ុន សែន ច្រើនពេក ហើយការបបួលស្បថរបស់លោក ហ៊ុន សែន គ្រាន់តែជាល្បែងកូនក្មេងប៉ុណ្ណោះ។
លោក សម រង្ស៊ី ក៏ធ្លាប់បានជំរុញឱ្យលោក ហ៊ុន សែន ប្តឹងរូបលោកផងដែរ ដោយលោកសំអាងថា នៅពេលណាលោក ហ៊ុន សែន ដាក់ពាក្យប្តឹង លោកនឹងបញ្ចេញភស្តុតាងបន្ថែមទៀតជុំវិញអំពើឃាតកម្មធំៗនៅកម្ពុជា ដូចជាការសម្លាប់អ្នកស្រី ពិសិដ្ឋ ពីលិកា ការសម្លាប់អតីតមេសហជីពសេរីកម្មករកម្ពុជា លោក ជា វិជ្ជា ការសម្លាប់អតីតប្រធានអង្គការធនធានធម្មជាតិ លោក ឈុត វុទ្ធី ជាដើម។
ប៉ុន្តែរហូតមកដល់ពេលនេះ លោក សម រង្ស៊ី មិនទាន់បញ្ចេញភស្តុតាងពាក់ព័ន្ធនឹងឃាតកម្មណាមួយដូចដែលលោកបានអះអាងនៅឡើយទេ។
លោក ហុក ឡង់ឌី ដែលជាអគ្គស្នងការនគរបាលជាតិបានស្លាប់ក្នុងករណីធ្លាក់ឧទ្ធម្ភាគចក្រមួយកាលពីថ្ងៃទី៩ ខែវិច្ឆិកា ឆ្នាំ២០០៨ នៅខេត្តស្វាយរៀង។ របាយការណ៍របស់សមត្ថកិច្ចបញ្ជាក់ថា ករណីស្លាប់នេះដោយសារបណ្តាលមកពីអាកាសធាតុអាក្រក់ដែលមានភ្លៀងធ្លាក់ខ្លាំង និងមានរន្ទះ៕