27 C
Phnom Penh

អាជ្ញាធរ​រារាំង និង​ប្រើ​អំពើ​ហិង្សា​លើ​ក្រុម​កូដករ​ណាហ្គា​វើលដ៍​ដែល​ព្យាយាម​ធ្វើ​កូដកម្ម​ជា​ថ្មី

ដោយ ឌឹ ខេមបូឌា ដេលី

បទវិភាគ

ក្រុម​អាជ្ញាធរ​រាជធានី​ភ្នំពេញ​ជាច្រើន​នាក់ បាន​រារាំង និង​ប្រើប្រាស់​អំពើ​ហិង្សា​លើ​កូដករ ខណៈ​ពួកគេ​បាន​នាំគ្នា​ព្យាយាម​ទៅ​ប្រមូលផ្ដុំ​នៅ​ក្បែរ​ក្រុមហ៊ុន​កាស៊ីណូ​ណាហ្គា​វើលដ៍ (Naga World) ជា​ថ្មី​ទៀត ដើម្បី​ធ្វើ​កូដកម្ម​ទាមទារ​ការ​ដោះស្រាយ​វិវាទ​ការងារ។

កូដករ​ជាង ១០០​នាក់ នៅ​ថ្ងៃ​ចន្ទ ទី​២៧ មិថុនា នេះ បាន​នាំគ្នា​ចេញ​ធ្វើ​កូដកម្ម​ជា​ថ្មី ក្រោយពី​ដំណោះស្រាយ​វិវាទ​ការងារ​ជាមួយ​ក្រុមហ៊ុន​ណាហ្គា​វើលដ៍​នៅតែ​បន្ត​អូស​បន្លាយ ប៉ុន្តែ​ចេញ​ធ្វើ​កូដកម្ម​នេះ ត្រូវ​បាន​ក្រុម​អាជ្ញាធរ​រាជធានី​ភ្នំពេញ​ជាច្រើន​បាន​ដាក់​របាំង ហើយ​ស្រាក់​ដៃ​គ្នា​ដើម្បី​រារាំង​កុំ​ឱ្យ​កូដករ​ទៅ​ធ្វើ​កូដកម្ម​មុខ​ក្រុមហ៊ុន​ណាហ្គា​វើលដ៍។

ក្រៅពី​ដាក់​របាំង​រារាំង ក៏​មាន​ការ​រុញច្រាន និង​ប្រើប្រាស់​អំពើ​ហិង្សា​លើ​កូដករ រួម​ទាំង​ចាប់​ពួកគេ​ដាក់​រថយន្តក្រុង ខណៈ​ក្រុម​កូដករ​បាន​ព្យាយាម​ទៅ​ប្រមូលផ្ដុំ​នៅ​ក្បែរ​ក្រុមហ៊ុន​កាស៊ីណូ​ណាហ្គា​វើលដ៍។

ក្រុម​កូដករ​ដែល​ចេញ​ធ្វើ​កូដកម្ម​នា​ថ្ងៃ​នេះ ពួកគេ​បាន​នាំគ្នា​ចង​ក្រណាត់​ខៀវ​នៅ​លើ​ក្បាល​ភ្ជាប់​ជាមួយ​ពាក្យ «កុំ​យក​លុយ​ទិញ​សិទ្ធិ» និង​អ្នក​ខ្លះ​កាន់​បដា​ដោយ​ភ្ជាប់​ជាមួយ​រូប​ថៅកែ​ណាហ្គា​វើលដ៍។

អំឡុង​ពេល​អាជ្ញាធរ​រារាំង​រុញច្រាន​នោះ ក្រុម​កូដករ​ណាហ្គា​វើលដ៍ ហើយ​អាជ្ញាធរ​ក៏​បាន​រារាំង​អ្នក​សារព័ត៌មាន អង្គការ​សង្គម​ស៊ីវិល​ជាតិ និង​តំណាង​អង្គការ​សហប្រជាជាតិ​នៅ​កម្ពុជា​មិន​ឱ្យ​ចូល​ថត​ផ្ដិត​យក​រូបភាព​កូដកម្ម​ដែរ។

ការ​ចេញ​ធ្វើ​កូដកម្ម​ជា​ថ្មី​នេះ ក្រោយពី​លទ្ធផល​នៃ​ការ​ជួប​ចរចា​រវាង​តំណាង​កូដករ និង​ក្រុមហ៊ុន​ជាមួយ​ក្រសួង​ការងារ មិន​ទាន់​មាន​ដំណោះស្រាយ ខណៈ​វិវាទ​ការងារ​ក្រុមហ៊ុន​ណាហ្គា​វើលដ៍​ដែល​បាន​កើតឡើង​អស់​រយៈពេល​ជាង ១​ឆ្នាំ​មក​ហើយ។

ក្រោយពី​វិវាទ​ការងារ​នៅតែ​បន្ត​អូស​បន្លាយ​នោះ កាលពី​ពាក់កណ្ដាល​ខែ​មិថុនា នេះ ក្រុម​កូដករ​បាន​នាំគ្នា​យក​ញត្តិ​ទៅ​ដាក់​នៅ​ខុទ្ទកាល័យ​នាយករដ្ឋមន្ត្រី និង​រដ្ឋសភា ដើម្បី​ឱ្យ​ស្ថាប័ន​ទាំងនេះ​ជួយ​អន្តរាគមន៍​ឱ្យ​ឆាប់​មាន​ដំណោះស្រាយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស