សហជីពការពារសិទ្ធិបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (Naga World) អះអាងថា ក្រុមកូដករគ្មានបំណងប្រើប្រាស់ផ្លូវសាធារណៈដើម្បីធ្វើកូដកម្មទាមទារសិទ្ធិការងារនោះទេ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី២៨ មិថុនា ឆ្នាំ២០២២ ថា ចាប់តាំងពីថ្ងៃដំបូងនៃការធ្វើកូដកម្ម អាជ្ញាធរកម្ពុជាបានរារាំងក្រុមកូដករជាប់រហូតមិនឱ្យធ្វើការតវ៉ាជាមួយនឹងក្រុមហ៊ុន ប៉ុន្តែក្រុមកូដករបានប្រកាន់ជំហរជាប់ជានិច្ចនូវការធ្វើកូដកម្មដោយអហិង្សា ដូច្នេះបើអាជ្ញាធររាំងខ្ទប់ពួកគេនៅកន្លែងណា ពួកគេនឹងធ្វើការទាមទារនៅកន្លែងនោះតែម្តង។
កញ្ញា ឈឹម ស៊ីថរ លើកឡើងថា អាជ្ញាធរគួរតែសិក្សាពីមូលហេតុនៃការតវ៉ាទាមទាររបស់កម្មករឱ្យបានច្បាស់លាស់ មុននឹងឈានដល់ការរារាំងពួកគេ ព្រោះថាភាគីក្រុមហ៊ុនបានរំលោភសិទ្ធិការងារលើកម្មករនិយោជិតយ៉ាងធ្ងន់ធ្ងរ។ ក្នុងនោះ ក្រុមហ៊ុនមានចេតនាលុបបំបាត់ និងបញ្ឈប់ថ្នាក់ដឹកនាំ និងសមាជិកសហជីពដែលមានអតីតភាពការងារច្រើនឆ្នាំ និងជាបុគ្គលិកដែលមានជំនាញគ្រប់គ្រាន់ប្រមាណជាង ១១០០នាក់ក្នុងចំណោមបុគ្គលិកដែលត្រូវបញ្ឈប់ ១៣២៩នាក់ ក្នុងគម្រោងលើកដំបូងរបស់ក្រុមហ៊ុនក្រោមលេសជួបវិបត្តិកូវីដ-១៩។
កញ្ញាបញ្ជាក់ថា ក្រុមហ៊ុនណាហ្គាវើលដ៍បានអនុវត្តផ្ទុយពីច្បាប់ការងារកម្ពុជាទាំងស្រុង ដោយការបញ្ឈប់បុគ្គលិកដែលមានអតីតភាពច្រើនឆ្នាំ ប៉ុន្តែបែរជារក្សាទុកបុគ្គលិកដែលទើបបម្រើការងារទៅវិញ។ ជាងនេះទៀត បុគ្គលិកខ្លះត្រូវបានបញ្ឈប់ទាំងប្តី និងប្រពន្ធ ដោយក្រុមហ៊ុនមិនបានគិតគូរពីបន្ទុកគ្រួសាររបស់ពួកគេនោះទេ។ ចំណែកខ្លះទៀតត្រូវបញ្ឈប់ទាំងដែលកំពុងមានផ្ទៃពោះ និងខ្លះទៀតកំពុងសម្រាកលំហែមាតុភាព ជាដើម ដែលនេះគឺជាការរំលោភលើសិទ្ធិកម្មករនិយោជិតយ៉ាងធ្ងន់ធ្ងរ។
កញ្ញា ឈឹម ស៊ីថរ បញ្ជាក់ថា ជុំវិញវិវាទនៃបុគ្គលិកក្រុមហ៊ុនណាហ្គាវើលដ៍ នេះ ក្រសួងការងារកម្ពុជា មិនបានបំពេញកាតព្វកិច្ចជួយរកដំណោះស្រាយផ្តល់យុត្តិធម៌ជូនជងរងគ្រោះនោះទេ។ ទន្ទឹមនឹងនេះ ក្រសួងក៏មិនបានប្រើវិធានការច្បាប់តាមមាត្រាដែលមានចែងណាមួយ ដើម្បីដាក់ពិន័យទៅលើថៅកែក្រុមហ៊ុនដែលបានរំលោភបំពានលើសិទ្ធិកម្មករនេះដែរ។
ចំណែកនាយកប្រតិបត្តិនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) លោក ប៉ា ងួនទៀង បានលើកឡើងក្នុងកិច្ចពិភាក្សានេះដែរថា យោងលើរបាយការណ៍របស់អង្គការ Global witness ធ្លាប់បានលាតត្រដាងថា គ្រួសារត្រកូល «ហ៊ុន» របស់លោក ហ៊ុន សែន បានដាក់ភាគហ៊ុនខ្យល់ធំៗទាំងអស់នៅកម្ពុជា ដែលអាចឱ្យគ្រួសារមេដឹកនាំក្រាញអំណាចមួយនេះទទួលបានកម្រៃរាប់រយលានដុល្លារអាមេរិកក្នុងមួយឆ្នាំៗ ដូច្នេះហើយទើបក្រុមហ៊ុនទាំងនោះហ៊ានធ្វើអ្វីៗស្រេចនឹងចិត្តរបស់ពួកគេ ទោះរំលោភបំពានលើច្បាប់របស់កម្ពុជាក៏ដោយ។
លោក ប៉ា ងួនទៀង បញ្ជាក់ថា ការតស៊ូតវ៉ាទាមទារសិទ្ធិការងាររបស់កម្មករនិយោជិតនៃក្រុមហ៊ុនណាហ្គាវើលដ៍នេះ មិនមែនដើម្បីតែផលប្រយោជន៍សម្រាប់កម្មករនិយោជិតនៃក្រុមហ៊ុននេះប៉ុណ្ណោះទេ ប៉ុន្តែវាគឺជាគំរូស្តង់ដារមួយសម្រាប់ការពារអត្ថប្រយោជន៍របស់កម្មករនិយោជិតដែលកំពុងបម្រើការងាររាប់ម៉ឺននាក់នៅតាមក្រុមហ៊ុនដទៃទៀតដែរ។
ជុំវិញបញ្ហានេះ ក្រសួងការងារ និងបណ្តុះបណ្តាលវិជ្ជាជីវៈ ត្រូវគេមើលឃើញថាមិនដែលមានចំណាត់ការណាមួយលើក្រុមហ៊ុនណាហ្គាវើលដ៍ ដើម្បីជំរុញឱ្យថៅកែក្រុមហ៊ុននេះផ្តល់ភាពយុត្តិធម៌ជូនកម្មករនូវទង្វើនៃការរំលោភសិទ្ធិការងាររបស់ពួកគេនោះទេ មានតែការព្រមានបញ្ជូនករណីនេះទៅដោះស្រាយនៅតុលាការតែប៉ុណ្ណោះ។
មាត្រា៣៤ នៃច្បាប់ស្ដីពីការងារ បានចែងថា អធិការកិច្ចការងារត្រូវមានបេសកកម្មធានាដល់ការអនុវត្តច្បាប់ការងារ និងត្រួតពិនិត្យការអនុវត្តបទបញ្ញត្តិដែលទាក់ទងនឹងលក្ខខណ្ឌជីវភាពនៃកម្មករនិយោជិត និងគ្រួសារនៃជនទាំងនោះ ប៉ុន្តែការអនុវត្តរបស់ក្រសួងការងារកន្លងមក គឺធ្វើឡើងផ្ទុយស្រឡះពីមាត្រានៃច្បាប់ការងារដែលបានចែងនេះ៕