លោក ហ៊ុន សែន ប្រកាសជាផ្លូវការថា គម្រោងដែលរដ្ឋាភិបាលកម្ពុជាបញ្ចុះថ្លៃអគ្គិសនីដល់ពលរដ្ឋសម្រាប់ចុងឆ្នាំ២០២២ នេះ អាចនឹងត្រូវពន្យារពេល ដោយសារតែអគ្គិសនីកម្ពុជា (EDC) នឹងខាតបង់ប្រហែល ១០០លានដុល្លារអាមេរិកនៅក្នុងឆ្នាំ២០២២ នេះ។
លោកនាយករដ្ឋមន្ត្រី ហ៊ុន សែន បានលើកឡើងក្នុងពិធីសំណេះសំណាលជាមួយប្រតិភូកីឡាអាស៊ាន-ប៉ារ៉ាហ្គេម កាលពីថ្ងៃទី៦ ខែកក្កដា ឆ្នាំ២០២២ ថា ការខាតបង់ជាលើកដំបូងរបស់ EDC ដែលរដ្ឋាភិបាលត្រូវអន្តរាគមន៍នេះ គឺវាផ្តើមចេញពីសង្គ្រាមនៅប្រទេសអ៊ុយក្រែន និងការដាក់ទណ្ឌកម្មសេដ្ឋកិច្ចរបស់ប្រទេសមហាអំណាចលើប្រទេសរុស្ស៊ី នាពេលកន្លងមក។
លោក ហ៊ុន សែន អំពាវនាវឱ្យពលរដ្ឋ ជាពិសេសអ្នកបំពេញការងារនៅស្ថាប័នសាធារណៈទាំងអស់ត្រូវប្រើអគ្គិសនីដោយសន្សំសំចៃ ស្របពេលដែលតម្លៃអគ្គិសនីនៅប្រទេសកំពុងឡើងថ្លៃខ្ពស់ ក្នុងនោះត្រូវអនុវត្តចាប់ផ្តើមពីស្ថាប័នរដ្ឋមុនគេ ដើម្បីកាត់បន្ថយការខាតបង់ ព្រោះថាបើមិនប្រុងប្រយ័ត្នទេ កម្ពុជានឹងទទួលការខាតបង់កាន់តែធំជាងនេះ។
ការអះអាងនេះ ធ្វើឡើងបន្ទាប់ពីរដ្ឋាភិបាលកម្ពុជាបានរកឃើញថា ខ្លួនកំពុងប្រឈមនឹងការខាតបង់នូវទឹកប្រាក់ចំនួន ១០០លានដុល្លារអាមេរិកលើសេវាអគ្គិសនីសម្រាប់ឆ្នាំ២០២២ នេះ។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី៧ កក្កដា នេះថា លោកឯកភាពនឹងការអំពាវនាវរបស់រដ្ឋាភិបាលដែលស្នើឱ្យពលរដ្ឋ ឬស្ថាប័នរដ្ឋប្រើប្រាស់អគ្គិសនីនៅតាមស្ថាប័នរបស់ខ្លួនដោយការសន្សំសំចៃ ដើម្បីចៀសវាងការខ្ជះខ្ជាយថវិកាជាតិ ព្រោះថាថវិកាជាតិ គឺជាលុយដែលពលរដ្ឋបង់ពន្ធសព្វថ្ងៃនេះ។
បណ្ឌិត យ៉ង សាំងកុមារ ដាក់ការសង្ស័យថា ការប្រកាសខាតបង់របស់ក្រុមហ៊ុនអគ្គិសនីកម្ពុជាហាក់មិនអាចទទួលយកបាននោះទេ ព្រោះថាតម្លៃអគ្គិសនីនៅកម្ពុជាដែលប្រជាពលរដ្ឋប្រើប្រាស់សព្វថ្ងៃនេះមានតម្លៃខ្ពស់រួចទៅហើយ បើប្រៀបធៀបនឹងប្រទេសជិតខាង ដូច្នេះការប្រកាសខាតរហូតដល់ទៅ ១០០លានដុល្លារបែបនេះហាក់មិនទំនងទាល់តែសោះ។
មន្ត្រីជាន់ខ្ពស់គណបក្សក្រៅរដ្ឋាភិបាលរូបនេះទាមទារឱ្យក្រុមហ៊ុនអគ្គិសនីកម្ពុជា បញ្ចេញរបាយការណ៍របស់ខ្លួនដោយមានការធ្វើសវនកម្មឱ្យបានច្បាស់លាស់ ថាបើខាតបង់ តើខាតដោយសារអ្វីខ្លះ ចៀសវាងការប្រកាសដែលគ្មានតម្លាភាព។ បណ្ឌិត យ៉ង សាំងកុមារ អំពាវនាវឱ្យរដ្ឋាភិបាលកម្ពុជាត្រូវតែធានាឱ្យបាននូវតម្លៃសមរម្យលើសេវាអគ្គិសនីសម្រាប់ប្រជាពលរដ្ឋ ព្រោះថានេះគឺជាកាតព្វកិច្ចរបស់រដ្ឋាភិបាលត្រូវទទួលខុសត្រូវចំពោះការដឹកនាំរបស់ខ្លួន។
លោកបន្ថែមថា រដ្ឋាភិបាលគួរតែពិចារណាពង្រីកប្រភពអគ្គិសនីកកើតឡើងវិញ ដូចជាវារីអគ្គិសនី និងថាមពលព្រះអាទិត្យ ជាដើម ដើម្បីធានានូវការប្រើប្រាស់របស់ប្រជាពលរដ្ឋក្នុងតម្លៃសមរម្យទៅថ្ងៃមុខ។
ការប្រើប្រាស់អគ្គិសនីប្រចាំថ្ងៃនៅកម្ពុជាសព្វថ្ងៃនេះមានកម្រិតខ្ពស់បំផុតក្នុងរង្វង់ ២២០០មេហ្គាវ៉ាត់ ហើយប្រភពអគ្គិសនីដែលកម្ពុជាកំពុងប្រើប្រាស់នេះមានប្រភពមកពីថាមពលស្អាត ក្នុងនោះថាមពលជីវម៉ាសចំនួន ៦១% ប្រភពពីរោងចក្រធ្យូងថ្មមានជាង ៣៣% និងប្រភពពីប្រេងឥន្ធនៈមានក្រោម ៥% ផងដែរ។
បច្ចុប្បន្ននេះ ការប្រើប្រាស់អគ្គិសនីរបស់ប្រជាពលរដ្ឋមានតម្លៃខុសៗគ្នាទៅតាមចំនួនគីឡូវ៉ាត់ដែលគ្រួសារនីមួយៗបានប្រើប្រាស់ ក្នុងនោះតម្លៃ ៣៨០រៀលក្នុងមួយគីឡូវ៉ាត់ (kWh) សម្រាប់អ្នកប្រីអគ្គិសនីចាប់ពី ១ ដល់ ១០kWh ក្នុងមួយខែ និងតម្លៃ ៦១០រៀលក្នុងមួយគីឡូវ៉ាត់ (kWh) សម្រាប់អ្នកប្រើអគ្គិសនីចាប់ពី ៥១ ដល់ ២០០ kWh ក្នុងមួយខែ។ ចំណែកតម្លៃ ៧៤០រៀលក្នុងមួយ kWh គឺចំពោះអ្នកប្រើអគ្គិសនីអស់ចាប់ពី ២០១ kWh ឡើងទៅក្នុងមួយខែ។
ទាក់ទិននឹងបញ្ហានេះ កាលពីថ្ងៃទី២៩ ខែធ្នូ ឆ្នាំ២០២១ លោក ហ៊ុន សែន ធ្លាប់បានចេញមុខអន្តរាគមន៍ឱ្យអគ្គិសនីកម្ពុជាលុបបំណុលជាង ២លានដុល្លារអាមេរិក ដែលស្មើនឹង ៩ពាន់លានរៀលរបស់ក្រសួងការពារជាតិ ប៉ុន្តែលោក ហ៊ុន សែន ក៏បានរិះគន់ផងដែរពីភាពខ្ជះខ្ជាយរបស់មន្ត្រីកងកម្លាំងប្រដាប់អាវុធតាមអង្គភាព ក្នុងការប្រើប្រាស់អគ្គិសនីរបស់ក្រសួងនាពេលកន្លងមក។
ជុំវិញបញ្ហានេះ ក្រុមអ្នកសង្កេតការណ៍រិះគន់ថា បើក្រសួងនីមួយៗមិនប្រើប្រាស់ថវិកាជាតិឱ្យមានតម្លាភាពទេ វាជាសកម្មភាពជញ្ជក់ឈាមរាស្ត្រតាមរយៈនៃការបង់ពន្ធប៉ុណ្ណោះ គឺមិនមែនប្រមូលពន្ធដើម្បីអភិវឌ្ឍជាតិនោះទេ។ ដូច្នេះ ក្រសួងស្ថាប័នគ្រប់វិស័យទាំងអស់ត្រូវតែពិនិត្យលើការងាររបស់ខ្លួនឡើងវិញ ដើម្បីធានាសុចរិតភាពក្នុងការប្រើប្រាស់លុយជាតិដែលប្រជាពលរដ្ឋបង់ពន្ធសព្វថ្ងៃនេះ៕