ជំនួយការរដ្ឋមន្ត្រីក្រសួងការបរទេសសហរដ្ឋអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក Daniel J. Kritenbrink ថ្លែងថា ប្រទេសកម្ពុជាអាចនឹងទទួលបាននូវផលប្រយោជន៍ជាទីគាប់ចិត្តសម្រាប់ពលរដ្ឋខ្លួនពីដំណោះស្រាយនយោបាយ តាមរយៈបើកសិទ្ធិសេរីភាពនយោបាយឲ្យលោក កឹម សុខា ឡើងវិញ។
លោក Daniel J. Kritenbrink បានសរសេរលើបណ្ដាញសង្គមធ្វីតធឺ កាលពីថ្ងៃទី១៣ ខែកក្កដា ឆ្នាំ២០២២ នេះថា លោកពិតជាមានសេចក្តីសោមនស្សរីករាយជាខ្លាំងដែលបានជួបជាមួយប្រធានគណបក្សសង្គ្រោះជាតិ លោក កឹម សុខា ក្នុងអំឡុងពេលដំណើរទស្សនកិច្ចរបស់លោកទៅកម្ពុជារយៈពេល ២ថ្ងៃ កាលពីដើមសប្តាហ៍នេះ។
ការអះអាងរបស់រដ្ឋមន្ត្រីការបរទេសអាមេរិកនេះ ធ្វើឡើងបន្ទាប់ពីលោកបានធ្វើដំណើរទស្សនកិច្ចនៅប្រទេសកម្ពុជា និងបានជួបពិភាក្សាការងារជាមួយប្រធានគណបក្សសង្គ្រោះជាតិ លោក កឹម សុខា កាលពីពេលថ្មីៗនេះ។
ជុំវិញសំណុំរឿងមេដឹកនាំបក្សប្រឆាំង លោក កឹម សុខា នេះ ឯកអគ្គរដ្ឋទូតសហរដ្ឋអាមេរិក លោក ផាទ្រិក មើលហ្វី (W. Patrick Murphy) ធ្លាប់បានលើកឡើងកាលពីពេលថ្មីៗនេះថា សហរដ្ឋអាមេរិកនៅតែខកចិត្តចំពោះសវនាការដែលមានចរិតនយោបាយរបស់មេដឹកនាំបក្សប្រឆាំងដែលនៅតែអូសបន្លាយដោយគ្មានដំណោះស្រាយ។ ក្នុងនោះ លោកបញ្ជាក់ថា ប្រទេសកម្ពុជានឹងទទួលបានផលប្រយោជន៍ពីការស្ដារនីតិសម្បទានៃសិទ្ធិនយោបាយរបស់លោក កឹម សុខា ឡើងវិញ ប្រសិនបើធ្វើឱ្យមាននូវលំហប្រជាធិបតេយ្យល្អប្រសើរឡើងវិញនោះ។
ទាក់ទិននឹងបញ្ហានេះ កាលពីថ្ងៃទី១១ ខែឧសភា ឆ្នាំ២០២២ មុនកិច្ចប្រជុំកំពូលអាស៊ាន-សហរដ្ឋអាមេរិកមួយថ្ងៃ ព្រឹទ្ធសភាសហរដ្ឋអាមេរិកបានធ្វើសេចក្តីសម្រេចចិត្តមួយដែលបានកំណត់ឱ្យរាជរដ្ឋាភិបាលកម្ពុជា ប្ដេជ្ញាឱ្យបាននូវការការពារសិទ្ធិមនុស្ស ស្ដារប្រជាធិបតេយ្យ ការកាត់ទោសក្រុមប្រឆាំង សកម្មជនសង្គមស៊ីវិល និងត្រូវទម្លាក់ចោលរាល់បទចោទប្រកាន់ដែលមានចរិតនយោបាយទាំងអស់ដែលកំពុងធ្វើទុក្ខបុកម្នេញលើអ្នកទាំងនោះសព្វថ្ងៃនេះ។
ជុំវិញសំណុំរឿងមេដឹកនាំបក្សប្រឆាំង លោក កឹម សុខា នេះ រដ្ឋមន្ត្រីការបរទេសសហរដ្ឋអាមេរិក លោក អេថូនី ប្ល៊ីងឃិន (Anthony Blinken) កាលពីពាក់កណ្តាលខែឧសភា ឆ្នាំ២០២២ បានទទូចឱ្យរដ្ឋាភិបាលកម្ពុជាទម្លាក់ចោលបទចោទប្រកាន់លើប្រធានគណបក្សសង្គ្រោះជាតិ លោក កឹម សុខា ដើម្បីឱ្យលោកមានសិទ្ធិពេញលេញក្នុងការចូលរួមកិច្ចការនយោបាយដោយសេរី ជាពិសេសគឺអាចចូលរួមការបោះឆ្នោតនាពេលខាងមុខនេះឡើងវិញ៕