28 C
Phnom Penh

រុស្ស៊ី​គំរាម​ថា​បើ​តំបន់​គ្រីមៀរ​រង​ការ​វាយប្រហារ នោះ​ជា​ថ្ងៃ​បញ្ចប់​ពិភពលោក​និង​អ៊ុយក្រែន

ដោយ ឌឹ ខេមបូឌា ដេលី

បទវិភាគ

អតីត​ប្រធានាធិបតី​រុស្ស៊ី លោក Dmitry Medvedev ដែល​បច្ចុប្បន្ន​ជា​នាយករង​នៃ​ក្រុមប្រឹក្សា​សន្តិសុខ​ជាតិ​រុស្ស៊ី ព្រមាន​ថា បើ​ដែនដី​គ្រីមៀរ ត្រូវ​រង​ការ​វាយប្រហារ​ពី​អ៊ុយក្រែន ឬ​ពី​ប្រទេស​ណា​មួយ គឺជា​ការ​ត្រូវ​កំណត់​ថា ជា​ថ្ងៃ​អវសាន​នៃ​ពិភពលោក ហើយ​អ៊ុយក្រែន​នឹង​រង​ការ​វាយប្រហារ​ឲ្យ​ក្លាយ​ជា​ផេះ​តែម្ដង។

បើ​តាម​សារព័ត៌មាន Newsweek លោក Dmitry Medvedev បាន​ធ្វើការ​ព្រមាន​ដូចនេះ​ខណៈ​លោក​វាយប្រហារ​ទៅ​លើ​អ៊ុយក្រែន និង​លោក​ខាងលិច​ដែល​នៅតែ​អះអាង​ថា ដែនដី​គ្រីមៀរ គឺជា​ដែនដី​អ៊ុយក្រែន។ លោក​បញ្ជាក់​ថា នេះ​ជា​ការ​គំរាមកំហែង​ជា​លក្ខណៈ​ប្រព័ន្ធ​ចំពោះ​រុស្ស៊ី ហើយ​រាល់​ការ​វាយប្រហារ​ពី​ខាង​ក្រៅ​ណា​មួយ​ទៅលើ​តំបន់​គ្រីមៀរ គឺ​មាន​ន័យ​ថា​ជា​ថ្ងៃ​អវសាន​នៃ​ពិភពលោក ជាពិសេស​គឺ​ប្រទេស​អ៊ុយក្រែន។

សេចក្ដី​ថ្លែងការណ៍​របស់​នាយករង​នៃ​ក្រុមប្រឹក្សា​សន្តិសុខ​ជាតិ​រុស្ស៊ី ត្រូវ​បាន​ដកស្រង់​សម្ដី​ចុះផ្សាយ​ដោយ​ទីភ្នាក់ងារ​សារព័ត៌មាន TASS របស់​រុស្ស៊ី កាលពី​ថ្ងៃ​អាទិត្យ​ចុង​សប្ដាហ៍​កន្លងទៅ​នេះ ដែល​ធ្វើឡើង​ខណៈ​លោក​ថ្លែង​សុន្ទរកថា​ទៅ​កាន់​អតីត​យុទ្ធជន​រុស្ស៊ី​សម័យ​សង្គ្រាម​លោក​លើក​ទី​២។

តាម​ការ​ព្រមាន​របស់​លោក Medvedev ប្រសិនបើ​អ៊ុយក្រែន ឬ​ប្រទេស​ជា​សមាជិក NATO ណា​មួយ​ជឿ​ថា​គ្រីមៀរ មិន​មែន​ជា​ទឹកដី​របស់​រុស្ស៊ី គឺជា​ការ​គំរាមកំហែង​ជា​លក្ខណៈ​ប្រព័ន្ធ ហើយ​ការ​វាយប្រហារ​ណា​មួយ​លើ​តំបន់​នេះ នឹង​ជំរុញ​ឱ្យ​មាន​ការ​ចាត់​វិធានការ​ឆ្លើយតប​យ៉ាង​លឿន​បំផុត​ដែល​លោក​ព្រមាន​ថា ជា​ថ្ងៃ​អវសាន​នៃ​ពិភពលោក។

លោក Medvedev គឺជា​មនុស្ស​ស្និទ្ធ​បំផុត​នឹង​លោក វ៉្លាឌីមៀរ ពូទីន ប្រធានាធិបតី​រុស្ស៊ី។ លោក​បាន​ធ្វើការ​គំរាម​បែប​នេះ គឺជា​ញឹកញាប់​មក​ហើយ​ចាប់តាំងពី​លោក ពូទីន បញ្ជា​ឲ្យ​លើក​ទ័ព​វាយ​លុកលុយ​ប្រទេស​អ៊ុយក្រែន នៅ​ថ្ងៃទី​២៤ ខែ​កុម្ភៈ ឆ្នាំ​២០២២។

កន្លងមក លោក​គំរាម​ប្រើប្រាស់​អាវុធ​នុយក្លេអ៊ែរ​ឆ្លើយតប​ទៅ​នឹង​ប្រទេស​ទាំងឡាយ​ណា​ដែល​លើក​ទ័ព​អន្តរាគមន៍​ជួយ​អ៊ុយក្រែន។

តែ​យ៉ាងណាក៏ដោយ កាលពី​ពេល​ថ្មីៗ​នេះ លោក វូឡូឌីមៀរ ហ្សេឡេនស្គី ប្រធានាធិបតី​អ៊ុយក្រែន បាន​លើកឡើង​ថា តំបន់​គ្រីមៀរ​នៅតែ​ជា​ដែនដី​អ៊ុយក្រែន ដែល​លោក​ថា កងទ័ព​អ៊ុយក្រែន​នឹង​វាយ​ចូល​តំបន់​នេះ​នៅ​ពេល​ណា​អ៊ុយក្រែន​អាច​វាយ​កាន់កាប់​បាន​មក​វិញ​នូវ​ភាគ​ខាងត្បូង​ប្រទេស។

ចំណែក​ឯ​មេដឹកនាំ​ក្រុម​បស្ចិម​ប្រទេស នៅតែ​ចាត់ទុក​តំបន់​គ្រីមៀរ ជា​ទឹកដី​របស់​អ៊ុយក្រែន ហើយ​ថា​តំបន់​មួយ​នេះ​អាច​នឹង​ក្លាយ​ជា​គោលដៅ​នៃ​ការ​វាយប្រហារ​ដោយ​ប្រព័ន្ធ​មីស៊ីល HIMARS ដែល​កងទ័ព​អ៊ុយក្រែន​ទទួល​បាន​ពី​សហរដ្ឋ​អាមេរិក និង​កំពុង​ត្រូវ​បាន​ដាក់​ពង្រាយ​នៅ​ឯ​សមរភូមិ​ប្រយុទ្ធ​គ្នា​ជាមួយ​កងទ័ព​រុស្ស៊ី នៅ​ភាគ​ខាងត្បូង និង​ខាងកើត​ប្រទេស។

គ្រីមៀរ ស្ថិត​នៅ​ខាងត្បូង​ប្រទេស​អ៊ុយក្រែន។ តំបន់​នេះ​មាន​ផ្ទៃដី​ជាង ២​ម៉ឺន ៧​ពាន់​គីឡូម៉ែត្រ​ក្រឡា ហើយ​មាន​ប្រជាជន​ជាង ២​លាន​នាក់​រស់នៅ។ គ្រីមៀរ បាន​ធ្លាក់​ទៅ​ជា​តំបន់​ឧបសម្ពន្ធ​របស់​រុស្ស៊ី នៅ​ខែ​មីនា ឆ្នាំ​២០១៤ បន្ទាប់ពី​អាជ្ញាធរ​តំបន់​នោះ​ធ្វើការ​បោះឆ្នោត​ប្រជាមតិ​ដោយ​មាន​ការ​យល់ព្រម​ពី​លោក Viktor Yanukovych ដែល​ជា​ប្រធានាធិបតី​អ៊ុយក្រែន នៅ​ពេល​នោះ។ តែ​បុរស​នេះ​ត្រូវ​បាន​ប្រជាជន​អ៊ុយក្រែន ដេញ​ចេញពី​អំណាច ដោយ​ចោទ​ពី​បទ​ក្បត់​ជាតិ។ បច្ចុប្បន្ន លោក Yanukovych និង​គ្រួសារ​លោក​កំពុង​រស់នៅ​ក្នុង​ប្រទេស​រុស្ស៊ី នៅ​ក្រោម​ការ​ការពារ​សន្តិសុខ​ដោយ​របប​លោក ពូទីន។

ជាមួយ​គ្នា​នេះ​ដែរ មន្ត្រី​យោធា​អ៊ុយក្រែន​ម្នាក់​បាន​និយាយ​ថា រុស្ស៊ី​កំពុង​ត្រៀម​ខ្លួន​ធ្វើ​ប្រតិបត្តិការ​វាយលុក​ដំណាក់កាល​ថ្មី​មួយ​នៅ​ក្នុង​ប្រទេស​អ៊ុយក្រែន បន្ទាប់ពី​ទីក្រុង​មូស្គូ បញ្ជា​ឱ្យ​កងទ័ព​របស់​ខ្លួន​បង្កើន​ការ​វាយប្រហារ​លើ​អ៊ុយក្រែន​ពី​គ្រប់​ទិសទី​ទាំងអស់​នៅ​ក្នុង​តំបន់​សមរភូមិ​ភាគ​ខាងកើត​ប្រទេស។ បើ​តាម​ការ​ចេញ​ផ្សាយ​ដោយ​ទីភ្នាក់ងារ​សារព័ត៌មាន Reuters រុស្ស៊ី បាន​បាញ់​មីស៊ីល​លើ​ទីក្រុង​ជាច្រើន​របស់​អ៊ុយក្រែន ក្នុង​រយៈពេល​ប៉ុន្មាន​ថ្ងៃ​ចុងក្រោយ​នេះ។

អ្នក​នាំពាក្យ​នៃ​ទីភ្នាក់ងារ​ស៊ើបការណ៍​សម្ងាត់​យោធា​អ៊ុយក្រែន លោក Vadym Skibitskyi បាន​ឱ្យ​ដឹង​ថា មិន​ត្រឹមតែ​វាយប្រហារ​ដោយ​មីស៊ីល​ពី​លើ​អាកាស និង​បាញ់​ចេញពី​នាវាចម្បាំង​ប៉ុណ្ណោះ​ទេ គឺ​មាន​ការ​វាយប្រហារ​ចេញពី​គ្រប់​ទិស​ទាំងអស់ ដែល​នេះ​គឺជា​ប្រតិបត្តិការ​វាយលុក​របស់​រុស្ស៊ី កំពុង​ស្ថិត​នៅ​ក្នុង​ដំណាក់កាល​ថ្មី។

លោក​បន្ត​ថា កងទ័ព​រុស្ស៊ី កំពុង​ប្រមូល​កម្លាំង​ទ័ព​ឡើងវិញ​ដើម្បី​វាយលុក​លើ​ទីក្រុង Sloviansk ដែល​ជា​ទីក្រុង​ដ៏​សំខាន់​មួយ​ទៀត​នៅ​ក្នុង​តំបន់ Donetsk ភាគ​ខាងកើត​នៃ​ប្រទេស​ដែល​កំពុង​គ្រប់គ្រង​ដោយ​កងទ័ព​អ៊ុយក្រែន។

គិត​មក​ដល់​ថ្ងៃទី​១៨ ខែ​កក្កដា នេះ សង្គ្រាម​ដែល​មហាអំណាច​រុស្ស៊ី ឈ្លានពាន​អ៊ុយក្រែន មាន​រយៈពេល​ជិត ១៥០​ថ្ងៃ​ហើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស