វេទិកាពលរដ្ឋស្នើឲ្យលោក ហ៊ុន សែន ប្រធានគណបក្សកាន់អំណាចត្រូវបញ្ឈប់ជាបន្ទាន់នូវគម្រោងធ្វើវិសោធនកម្មរដ្ឋធម្មនុញ្ញ ដោយសារគម្រោងនេះគ្រាន់តែជាការអនុវត្តផែនការផ្ទេរអំណាចឱ្យលោក ហ៊ុន ម៉ាណែត តែប៉ុណ្ណោះ មិនបានបម្រើដល់ផលប្រយោជន៍ជាតិ និងពលរដ្ឋនោះទេ។
ក្នុងសេចក្ដីថ្លែងការណ៍របស់វេទិកាពលរដ្ឋ ចុះថ្ងៃទី១៧ ខែកក្កដា ឆ្នាំ២០២២ ឱ្យដឹងថា ការធ្វើវិសោធនកម្មរដ្ឋធម្មនុញ្ញដែលលោក ហ៊ុន សែន បានស្នើនោះ មិនបានបម្រើផលប្រយោជន៍ពលរដ្ឋឡើយ។ ផ្ទុយទៅវិញ ការកែនេះដើម្បីបំពេញសេចក្ដីត្រូវការអំណាចអ្នកដឹកនាំ និងធ្វើឲ្យជាតិកាន់តែស្មុគស្មាញ។
ជាក់ស្ដែង ការកែមាត្រា១២៥ថ្មី ធ្វើឡើងដើម្បីបើកផ្លូវឲ្យមានការចាត់តាំងនាយករដ្ឋមន្ត្រីថ្មី និងបង្កើតរដ្ឋាភិបាលថ្មីមួយនៅពេលណាក៏បានតាមការចង់បានរបស់លោក ហ៊ុន សែន។
ចំណែកការកែមាត្រា១១៩ថ្មី ដែលត្រូវកែដែរនោះ ដើម្បីបង្កភាពងាយស្រួលចាត់តាំងលោក ហ៊ុន ម៉ាណែត ជានាយករដ្ឋមន្ត្រីថ្មីតាមវិធីប្រគល់អំណាចឲ្យគណបក្សនយោបាយមានអាសនៈច្រើនជាងគេក្នុងរដ្ឋសភាជាអ្នកស្នើឲ្យព្រះមហាក្សត្រចាត់តាំងនាយករដ្ឋមន្ត្រីថ្មី ដែលជាការបំបាត់ចោលនូវអំណាចរដ្ឋសភា ប្រធាន និងអនុប្រធាននៃរដ្ឋសភា ពោលគឺផ្ទុយពីអំណាចដឹកនាំជាតិតាមគោលការណ៍សភានិយម។
ចំពោះមាត្រា៩៨ថ្មី និងមាត្រា៨៩ ដែលត្រូវកែនោះ គឺដើម្បីការពារអំណាចរដ្ឋាភិបាលថ្មីមួយដែលដឹកនាំដោយលោក ហ៊ុន ម៉ាណែត នៅពេលខាងមុខកុំឲ្យមានអ្នកណាហ៊ានប៉ះពាល់ជាមួយតែប៉ុណ្ណោះ។
វេទិកាពលរដ្ឋស្នើទៅលោក ហ៊ុន សែន ប្រធានគណបក្សប្រជាជនកម្ពុជា ដែលជារដ្ឋាភិបាលដឹកនាំបច្ចុប្បន្នដោយរដ្ឋសភាឯកបក្ស និងក្រុមប្រឹក្សាធម្មនុញ្ញដែលកើតពីការបោះឆ្នោតមិនយុត្តិធម៌ ត្រូវបញ្ឈប់ជាបន្ទាន់នូវគម្រោងធ្វើវិសោធនកម្មរដ្ឋធម្មនុញ្ញដែលមានគោលដៅត្រឹមតែជាការអនុវត្តផែនការផ្ទេរអំណាចឲ្យលោក ហ៊ុន ម៉ាណែត។
ក្រុមនេះបានផ្ដល់អនុសាសន៍ដល់រដ្ឋាភិបាលដែលដឹកនាំដោយលោក ហ៊ុន សែន គួរផ្ដោតការយកចិត្តទុកដាក់ដោះស្រាយបញ្ហាជាអាទិភាព ដូចជាវិបត្តិនយោបាយ ប្រជាធិបតេយ្យជាតិ បញ្ហាដីធ្លី ការហិនហោចនៃធនធានធម្មជាតិ ភាពអយុត្តិធម៌សង្គម ឱនភាពសេដ្ឋកិច្ចពាណិជ្ជកម្ម បញ្ហាសាំងឡើងថ្លៃ ព្រមទាំងកំណើនអត្រានៃការអត់ការងារធ្វើ និងការធ្វើចំណាកស្រុក។
មួយវិញទៀត ទំហំបំណុលជាតិដែលជំពាក់បរទេស ភាពក្រីក្រដែលជំរុញឱ្យពលរដ្ឋជំពាក់បំណុលធនាគារស្ទើរគ្រប់ក្រុមគ្រួសារ និងរឿងទឹកដីព្រំដែន ដែលទាំងអស់នេះជាបញ្ហាត្រូវដោះស្រាយដើម្បីបម្រើសេចក្ដីត្រូវការរបស់ពលរដ្ឋ និងបម្រើផលប្រយោជន៍ប្រទេសជាតិពិតប្រាកដ។
ការស្នើនេះ ធ្វើឡើងស្របពេលប្រធាន និងសមាជិកនៃក្រុមប្រឹក្សាធម្មនុញ្ញកាលពីថ្ងៃទី១៣ ខែកក្កដា ឆ្នាំ២០២២ បានសម្រេចអនុម័តគាំទ្រដោយគ្មានសំឡេងជំទាស់ ដើម្បីស្នើថ្វាយព្រះមហាក្សត្របើកផ្លូវឱ្យរដ្ឋាភិបាលធ្វើវិសោធនកម្មមាត្រាក្នុងរដ្ឋធម្មនុញ្ញចំនួន៦ និងច្បាប់ធម្មនុញ្ញបន្ថែមចំនួន ២មាត្រា។
ទាក់ទិននឹងរឿងកែរដ្ឋធម្មនុញ្ញនេះ លោកមេធាវី សេក សោភ័ណ្ឌ បានសរសេរលើទំព័រហ្វេសប៊ុករបស់លោកនៅថ្ងៃទី១៨ កក្កដា នេះថា រដ្ឋធម្មនុញ្ញត្រូវបានវិសោធនកម្ម ៩ដង និងអាចលើកទី១០ នេះទៀត មិនដែលឃើញវិសោធនកម្មមួយណាគូសបញ្ជាក់ពីកាតព្វកិច្ចរបស់រដ្ឋធានាសិទ្ធិ (រូបវន្ត និងអរូបវន្ត) របស់ពលរដ្ឋម្តងណាសោះ ឃើញតែគោលដៅធានាការពារតែអង្គការរដ្ឋតែប៉ុណ្ណោះ។
លោកបញ្ជាក់ថា រូបលោកបានព្យាយាមស្តាប់មូលហេតុនៃការវិសោធនកម្មរដ្ឋធម្មនុញ្ញ មិនមានឮពាក្យ “សិទ្ធិ សេរីភាព ទ្រព្យរដ្ឋ និងប្រជាពលរដ្ឋ“ នោះទេ ទោះបីជាពលរដ្ឋជាម្ចាស់អំណាច ម្ចាស់សិទ្ធិ និងជាម្ចាស់វាសនាប្រទេសជាតិក៏ដោយ។
យ៉ាងណាក៏ដោយ ក្រោយពីក្រុមប្រឹក្សាធម្មនុញ្ញសម្រេចអនុម័តឱ្យធ្វើវិសោធនកម្មរដ្ឋធម្មនុញ្ញនោះ រដ្ឋមន្ត្រីក្រសួងយុត្តិធម៌ និងជាសមាជិកជាន់ខ្ពស់គណបក្សប្រជាជនកម្ពុជា លោក កើត រិទ្ធ បានធ្វើសន្និសីទបកស្រាយថា ការវិសោធនកម្មលើកទី១០ នេះ មានបំណងបំពេញភាពខ្វះចន្លោះនៃរដ្ឋធម្មនុញ្ញដើម ដើម្បីឱ្យស្ថាប័នកំពូលរបស់ជាតិដំណើរការទៅដោយរលូន ធានាស្ថិរភាពនយោបាយ និងការពារប្រយោជន៍ជាតិ។
ចំណែកការកែមាត្រា៩៨នៃរដ្ឋធម្មនុញ្ញ ត្រង់ការធ្វើញត្តិបន្ទោសរាជរដ្ឋាភិបាលវិញ លោក កើត រិទ្ធ បកស្រាយថា ការកែសំឡេងពីចំនួន ៣០ ទៅចំនួន ៤២នាក់វិញ ធ្វើឡើងដើម្បីការពាររដ្ឋាភិបាលពីការទម្លាក់ចេញពីតំណែងនៅថ្ងៃក្រោយ។
រដ្ឋធម្មនុញ្ញនៃព្រះរាជាណាចក្រកម្ពុជា ដែលត្រូវបានប្រកាសឱ្យប្រើកាលពីថ្ងៃទី២៤ ខែកញ្ញា ឆ្នាំ១៩៩៣ ប៉ុន្តែចាប់តាំងពីឆ្នាំ១៩៩៣ មកដល់ឆ្នាំ២០២២ នេះ រដ្ឋាភិបាលដឹកនាំដោយលោក ហ៊ុន សែន បានធ្វើវិសោធនកម្មចំនួន ១០លើកហើយ៕