27 C
Phnom Penh

រដ្ឋសភា​នឹង​ប្រជុំ​ពេញ​អង្គ​ដើម្បី​ពិភាក្សា​លើ​ការ​សុំ​កែ​រដ្ឋធម្មនុញ្ញ​នៅ​ថ្ងៃទី​២៨ កក្កដា

ដោយ ឌឹ ខេមបូឌា ដេលី

បទវិភាគ

រដ្ឋសភា​គ្រោង​បើក​កិច្ចប្រជុំ​ពេញ​អង្គ​ដើម្បី​ពិភាក្សា​លើ​សេចក្ដី​ព្រាង​វិសោធនកម្ម​នៃ​រដ្ឋធម្មនុញ្ញ និង​ច្បាប់​ធម្មនុញ្ញ​បន្ថែម​នៅ​ថ្ងៃទី​២៨ ខែ​កក្កដា ឆ្នាំ​២០២២ ខាងមុខ​នេះ ខណៈ​អ្នក​ឃ្លាំមើល​រិះគន់​ថា ការ​ធ្វើ​វិសោធនកម្ម​នេះ​មិន​បាន​បម្រើ​ដល់​ផលប្រយោជន៍​របស់​ពលរដ្ឋ​ខ្មែរ​នោះ​ឡើយ។

ក្នុង​សេចក្ដី​ប្រកាស​ព័ត៌មាន​របស់​រដ្ឋសភា​ស្ដីពី​លទ្ធផល​នៃ​កិច្ចប្រជុំ​គណៈកម្មាធិការ​អចិន្ត្រៃយ៍​រដ្ឋសភា នៅ​ថ្ងៃទី​២៥ ខែ​កក្កដា ឆ្នាំ​២០២២ នេះ បាន​ឱ្យ​ដឹង​ថា របៀបវារៈ​ដែល​អង្គប្រជុំ​នៃ​គណៈកម្មាធិការ​អចិន្ត្រៃយ៍​យក​មក​ពិភាក្សា​នៅ​ថ្ងៃទី​២៨ ខែ​កក្កដា ឆ្នាំ​២០២២ ក្នុង​នោះ​សេចក្ដី​ព្រាងច្បាប់​ស្ដីពី​វិសោធនកម្ម​នៃ​រដ្ឋធម្មនុញ្ញ​ដែល​រដ្ឋាភិបាល​បាន​ស្នើ។

សភា​បញ្ជាក់​ថា សេចក្ដី​ព្រាងច្បាប់​សុំ​កែ​រដ្ឋធម្មនុញ្ញ​មាត្រា​ចំនួន ៦ ក្នុង​នោះ​មាន​មាត្រា​១៩​ថ្មី (មួយ) មាត្រា​៨៩ មាត្រា​៩៨​ថ្មី មាត្រា​១០២​ថ្មី មាត្រា​១១៩​ថ្មី (មួយ) និង​មាត្រា​១២៥​ថ្មី នៃ​រដ្ឋធម្មនុញ្ញ រួម​នឹង​មាត្រា​៣​ថ្មី និង​មាត្រា​៤​ថ្មី នៃ​ច្បាប់​ធម្មនុញ្ញ​បន្ថែម​ផង​ដែរ។

បើ​តាម​រដ្ឋសភា ឱ្យ​ដឹង​ថា សេចក្ដី​ព្រាង​វិសោធនកម្ម​រដ្ឋធម្មនុញ្ញ និង​ច្បាប់​ធម្មនុញ្ញ​បន្ថែម រដ្ឋសភា​បាន​ទទួល​ពី​គណៈរដ្ឋមន្ត្រី​កាលពី​ថ្ងៃទី​១៥ ខែ​កក្កដា ឆ្នាំ​២០២២ ហើយ​គណៈកម្មាធិការ​អចិន្ត្រៃយ៍​នៃ​រដ្ឋសភា​ក៏​បាន​បញ្ជូន​សេចក្ដី​ព្រាង​វិសោធនកម្ម​រដ្ឋធម្មនុញ្ញ និង​ច្បាប់​ធម្មនុញ្ញ​បន្ថែម​នេះ​ទៅ​ឱ្យ​គណៈកម្មការ​ជំនាញ​ពិនិត្យ​សិក្សា កាលពី​ថ្ងៃទី​១៩ ខែ​កក្កដា ឆ្នាំ​២០២២។

ក្រោយពី​មាន​ការ​សម្រេច​អនុម័ត​ពី​ក្រុមប្រឹក្សា​ធម្មនុញ្ញ​នោះ នៅ​ថ្ងៃទី​១៤ ខែ​កក្កដា រដ្ឋមន្ត្រី​ក្រសួង​យុត្តិធម៌ និង​ជា​សមាជិក​ជាន់ខ្ពស់​នៃ​គណបក្ស​ប្រជាជន​កម្ពុជា លោក កើត រិទ្ធ បាន​បកស្រាយ​ថា ការ​កែ​រដ្ឋធម្មនុញ្ញ និង​ច្បាប់​ធម្មនុញ្ញ​បន្ថែម​ទាំង ៨​មាត្រា​នោះ ក្នុង​បំណង​ដើម្បី​បំពេញ​សេចក្តី​ខ្វះ​ចន្លោះ​នៃ​រដ្ឋធម្មនុញ្ញ និង​ស្ថាប័ន​កំពូល​របស់​ជាតិ​ដំណើរការ​ទៅ​ដោយ​រលូន ក្នុង​ការ​ធានា​នូវ​ស្ថិរភាព​នយោបាយ និង​ការពារ​ប្រយោជន៍​ជាតិ។

ប៉ុន្តែ​ការ​កែ​រដ្ឋធម្មនុញ្ញ​លើក​ទី​១០ នេះ ត្រូវ​បាន​គណបក្ស​ក្រៅ​រដ្ឋាភិបាល​យល់​ថា បាន​កាត់បន្ថយ​អំណាច​សភា ដោយ​បើក​សិទ្ធិ​អំណាច​ឲ្យ​គណបក្ស​នយោបាយ​អាច​ធ្វើ​សេចក្ដី​ស្នើ​ទៅ​ព្រះមហាក្សត្រ​ដើម្បី​ចាត់តាំង ឬ​តែងតាំង​នាយករដ្ឋមន្ត្រី ខណៈ​មាត្រា​៩៨​ថ្មី ក៏​បាន​បន្ថយ​អំណាច​តំណាងរាស្ត្រ​ក្នុង​ការ​ធ្វើ​ញត្តិ​បន្ទោស​រដ្ឋាភិបាល ពោល​គឺ​ពី​សំឡេង ៣០​នាក់​ទៅ​ដល់ ៤២​នាក់ ទើប​អាច​ធ្វើ​ញត្តិ​ស្ដីបន្ទោស ឬ​ទម្លាក់​រដ្ឋាភិបាល។

ចំណែក​វេទិកា​ពលរដ្ឋ​ចាត់ទុក​ការ​កែ​រដ្ឋធម្មនុញ្ញ​លើក​នេះ គឺ​ដើម្បី​អនុវត្ត​ផែនការ​ផ្ទេរ​អំណាច​ឱ្យ​លោក ហ៊ុន ម៉ាណែត តែប៉ុណ្ណោះ ដោយ​មិន​បាន​បម្រើ​ដល់​ផលប្រយោជន៍​ជាតិ និង​ពលរដ្ឋ​ខ្មែរ​នោះ​ទេ។ ក្រុម​នេះ​បាន​ស្នើ​ឲ្យ​លោក ហ៊ុន សែន ប្រធាន​គណបក្ស​កាន់​អំណាច​ត្រូវ​បញ្ឈប់​ជាបន្ទាន់​នូវ​គម្រោង​ធ្វើ​វិសោធនកម្ម​រដ្ឋធម្មនុញ្ញ​នោះ​វិញ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស