27 C
Phnom Penh

តំណាង​សហជីព​ណាហ្គា​ថា​ក្រសួង​ការងារ​ទាមទារ​ឲ្យ​ពួកគេ​ប្រាប់​កូដករ​ឈប់​តវ៉ា​និង​ទទួល​ប្រាក់​សំណង

ដោយ ឌឹ ខេមបូឌា ដេលី

បទវិភាគ

តំណាង​សហជីព​ក្រុមហ៊ុន​ណាហ្គា​វើលដ៍ (Naga World) អះអាង​ថា ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​បង្គាប់​ឲ្យ​ពួកគាត់​អនុវត្ត​តាម​កិច្ចសន្យា​មុន​ពេល​ចេញពី​ពន្ធនាគារ ដោយ​ឲ្យ​កូដករ​ឈប់​តវ៉ា​អំឡុង​ពេល​ចរចា ស្រប​ពេល​ពួកគេ​កំពុង​ជាប់​បណ្ដឹង​នៅ​តុលាការ។

ការ​អះអាង​នេះ បន្ទាប់ពី​តំណាង និង​សមាជិក​សហជីព នៅ​ថ្ងៃ​សុក្រ ទី​២៩ កក្កដា បាន​ចូល​ជួប​ចរចា​ជាមួយ​ក្រសួង​ការងារ​ជា​ថ្មី​ទៀត ដើម្បី​ស្វែងរក​ដំណោះស្រាយ​វិវាទ​ការងារ​ដែល​បាន​អូស​បន្លាយ​រយៈពេល​ជាង​កន្លះ​ឆ្នាំ​មក​ហើយ។

តំណាង​សហជីព​ប្រាប់​កូដករ​នៅ​មុខ​ក្រសួង​ការងារ ថា ក្នុង​ជំនួប​នា​ព្រឹក​ថ្ងៃ​នេះ មន្ត្រី​ក្រសួង​បាន​រំឭក​ឲ្យ​តំណាង​សហជីព និង​សមាជិក​អនុវត្ត​តាម​កិច្ចសន្យា​ដែល​ពួកគាត់​បាន​ផ្ដិត​មេដៃ​ស្នើសុំ​នៅ​ក្រៅ​ឃុំ​បណ្ដោះអាសន្ន​កាលពី​ពេល​កន្លងទៅ។ ជា​ការ​ឆ្លើយតប ពួកគាត់​បាន​និយាយ​ទៅ​កាន់​មន្ត្រី​ក្រសួង​វិញ​ថា ពួកគាត់​មិន​បាន​ភ្លេច​ចំពោះ​កិច្ចសន្យា​ដែល​បាន​ផ្ដិត​មេដៃ​នៅ​ក្នុង​ពន្ធនាគារ​ឡើយ។

តំណាង​សហជីព​រូប​នោះ​បន្ត​ទៀត​ថា ពួកគាត់​បាន​ប្រាប់​ទៅ​ក្រុម​កូដករ​ឲ្យ​ឈប់​តវ៉ា​ហើយ ប៉ុន្តែ​ការ​សម្រេច​បន្ត​ធ្វើ​កូដកម្ម ឬ​អត់​នោះ វា​អាស្រ័យ​លើ​កូដករ​ជា​អ្នក​សម្រេច ដោយ​តំណាង និង​សមាជិក​សហជីព​មិន​អាច​បង្ខំ​ក្រុម​កូដករ​បាន​ឡើយ។

ជាមួយ​គ្នា​នេះ ក្រសួង​ក៏​បាន​ឲ្យ​តំណាង​សហជីព​ជួយ​សម្របសម្រួល​ជាមួយ​ក្រុម​កូដករ ដោយ​ទទួល​យក​កញ្ចប់​ថវិកា​ដែល​ថៅកែ​ក្រុមហ៊ុន​ផ្ដល់​ឲ្យ ហើយ​ទៅ​រក​ការងារ​ថ្មី ដើម្បី​បញ្ចប់​វិវាទ។ មួយ​វិញ​ទៀត ក្រសួង​ថា​នា​ពេល​ខាងមុខ​នេះ ក្រសួង និង​តុលាការ អាច​នឹង​មាន​ចំណាត់ការ​ណា​មួយ​ទៅ​លើ​ពួកគាត់ បើ​ការ​តវ៉ា​របស់​កូដករ​នៅតែ​បន្ត​នោះ។

ក្រុម​កូដករ​ចាត់ទុក​ការ​លើកឡើង​របស់​មន្ត្រី​ក្រសួង​ការងារ ថា​ជា​សារ​គំរាម​ដល់​តំណាង និង​ពួកគេ​ជា​កូដករ។ តែ​យ៉ាងណា ពួកគេ​ថា​ប្រសិនបើ​ក្រសួង​ការងារ​នៅតែ​បង្ខំ​ឲ្យ​ទទួល​យក​សំណង​ដោយ​មិន​ដោះស្រាយ​តាម​អ្វី​ដែល​កូដករ​ទាមទារ​ទេ វា​មិន​អាច​បញ្ចប់​វិវាទ​ការងារ​នោះ​បាន​ដែរ ដោយ​កូដកម្ម​នៅតែ​បន្ត​កើតឡើង​ដដែល ដោយ​ថា​អ្វី​ដែល​ពួកគេ​ចង់​បាន​នោះ គឺ​ទទួល​យក​សហជីព​ដែល​ក្រុមហ៊ុន​បាន​បញ្ឈប់​នោះ​ចូល​ធ្វើការ​វិញ។

សង្គម​ស៊ីវិល និង​អង្គការ​អន្តរជាតិ លើកឡើង​ថា ការ​ដែល​ក្រុមហ៊ុន​ណាហ្គា​វើលដ៍​មិន​ដោះស្រាយ​វិវាទ​ការងារ​ដែល​បាន​អូស​បន្លាយ​ជាង ៦​ខែ​មក​នេះ ជា​ចេតនា​រើសអើង និង​ចង់​លុបបំបាត់​សហជីព​ឯករាជ្យ​នៅ​ក្នុង​ក្រុមហ៊ុន​ល្បែង​ស៊ីសង​មួយ​នេះ។

បើ​តាម​តំណាង​សហជីព ឱ្យ​ដឹង​ថា ចាប់តាំងពី​មាន​វិវាទ​ជាមួយ​ក្រុមហ៊ុន​ណាហ្គា​វើលដ៍​កាលពី​ចុង​ឆ្នាំ​២០២១ មក តំណាង​សហជីព​បាន​ជួប​ចរចា​ជាមួយ​ក្រសួង​ការងារ និង​ថៅកែ​ក្រុមហ៊ុន​ចំនួន ១៤​លើក​ហើយ ប៉ុន្តែ​មិន​ទទួល​បាន​លទ្ធផល​ឡើយ។

ការ​មិន​មាន​ដំណោះស្រាយ​នេះ បាន​ជំរុញ​ឲ្យ​ក្រុម​កូដករ​បន្ត​ចេញ​ធ្វើ​កូដកម្ម​រាល់​ថ្ងៃ ទោះបី​ត្រូវ​បាន​ក្រុម​អាជ្ញាធរ​រាជធានី​ភ្នំពេញ​រារាំង រុញច្រាន និង​ប្រើប្រាស់​អំពើ​ហិង្សា ព្រមទាំង​បៀតបៀន​លើ​ពួកគេ​ជា​ស្ត្រី​ក៏ដោយ។

វិវាទ​ការងារ​ក្រុមហ៊ុន​ណាហ្គា​វើលដ៍​នេះ បាន​កើតឡើង​អស់​រយៈពេល​ជាង ១​ឆ្នាំ​មក​ហើយ ក្រោយ​ពេល​ដែល​ក្រុមហ៊ុន​នេះ​បាន​បញ្ឈប់​បុគ្គលិក​ចំនួន ១៣២៩​នាក់​ក្នុង​ចំណោម​បុគ្គលិក​សរុប​ជាង ៨០០០​នាក់​ពី​ការងារ ក្រោម​ហេតុផល​ថា ជួប​វិបត្តិ​ហិរញ្ញវត្ថុ​ដោយសារតែ​បញ្ហា​ជំងឺ​កូវីដ-១៩ ប៉ុន្តែ​នៅ​ដើម​ឆ្នាំ​២០២១ កន្លងទៅ ក្រុមហ៊ុន​នេះ​ទទួល​បាន​ប្រាក់ចំណេញ​សុទ្ធ​ចំនួន​ជាង ១២០​លាន​ដុល្លារ​ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស