លោកនាយករដ្ឋមន្ត្រី ហ៊ុន សែន អះអាងថា ប្រទេសវៀតណាម ជាទីផ្សារដ៏សំខាន់សម្រាប់ទទួលយកកសិផលនាំចេញពីប្រទេសកម្ពុជា ដែលបានរួមចំណែកជួយឲ្យកម្ពុជាកាន់តែរីកចម្រើន។
ការលើកឡើងរបស់លោក ហ៊ុន សែន ក្នុងជំនួបជាមួយសមាជិកគណៈកម្មាធិការកណ្តាលបក្សកុម្មុយនីស្តវៀតណាម សមាជិកាគណៈកម្មាធិការអចិន្ត្រៃយ៍ អ្នកស្រី ង្វៀន ធីថាញ់ នៅទីស្ដីការគណៈរដ្ឋមន្ត្រីនាថ្ងៃទី២ ខែសីហា ឆ្នាំ២០២២។
ក្នុងជំនួបទ្វេភាគីនោះ លោក ហ៊ុន សែន បានលើកឡើងថា ការរីកចម្រើនរបស់វៀតណាម បានរួមចំណែកជួយដល់ការរីកចម្រើនរបស់កម្ពុជា ដោយសារទំនាក់ទំនងល្អនៃប្រទេសទាំងពីរ ក្នុងនោះកម្ពុជាបានទទួលអ្នកវិនិយោគវៀតណាមដ៏ច្រើន រួមទាំងកិច្ចសហប្រតិបត្តិការលើវិស័យផ្សេងៗទៀត រួមទាំងវិស័យថាមពល។
លោកថា ភាពរីកចម្រើននេះហើយបានធ្វើឲ្យទំហំពាណិជ្ជកម្មនៃប្រទេសទាំងពីរកើនទៅដល់ជាង ១០ពាន់លានដុល្លារ ដែលជាទំហំមួយដ៏ធំ។ លោក ហ៊ុន សែន ថាវៀតណាមជាទីផ្សារដ៏សំខាន់មួយសម្រាប់ទទួលយកកសិផលនាំចេញពីកម្ពុជាផងដែរ។
ទិន្នន័យរបស់ការិយាល័យពាណិជ្ជកម្មវៀតណាមនៅកម្ពុជា ចេញកាលពីខែមករា ឆ្នាំ២០២២ បានឲ្យដឹងថា បើទោះជាមានផលប៉ះពាល់ពីជំងឺកូវីដ-១៩ ក៏ពាណិជ្ជកម្មកម្ពុជា-វៀតណាមបានកើនឈានដល់ ៩,៣ពាន់លានដុល្លារក្នុងឆ្នាំ២០២១ ដែលជាការឈានទៅមុខយ៉ាងខ្លាំងចំនួន ៧៥% បើធៀបនឹងឆ្នាំ២០២០។
ទិន្នន័យវៀតណាមក៏បានបញ្ជាក់ដែរថា ក្រុមផលិតផលចំនួន ១៤ប្រភេទក្នុងចំណោម ១១ប្រភេទដែលកម្ពុជាបាននាំចេញទៅប្រទេសវៀតណាម ជាមួយនឹងកំណើនវិជ្ជមានរួមមាន បន្លែ ផ្លែឈើ គ្រាប់ស្វាយចន្ទី កៅស៊ូ និងផលិតផលផ្សេងៗទៀត។
ចំណែកផលិតផលវៀតណាមចំនួន ២៤ ក្នុងចំណោម ២៩ក្រុមដែលនាំចូលមកកម្ពុជាឃើញថាមានកំណើនខ្លាំងក្នុងរយៈពេល ១១ខែធៀបនឹងរយៈពេលដូចគ្នាកាលពីឆ្នាំមុន រួមមានបន្លែ ដំឡូង និងផ្លែឈើ ចំណីសត្វ និងវត្ថុធាតុដើម ប្រេងឥន្ធនៈ និងប្រេង ជី និងផលិតផលផ្សេងៗទៀត៕