31 C
Phnom Penh

រដ្ឋមន្ត្រី​អាមេរិក​ជំរុញ​ឱ្យ​កម្ពុជា​ជម្រះ​មន្ទិល​អំពី​វត្តមាន​កងទ័ព​ចិន​និង​សេរីភាព​លោក កឹម សុខា

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ការបរទេស​សហរដ្ឋ​អាមេរិក ជំរុញ​ឱ្យ​ប្រមុខ​រដ្ឋាភិបាល​កម្ពុជា លោក ហ៊ុន សែន បង្ហាញ​ពី​តម្លាភាព​ឱ្យ​បាន​ច្បាស់លាស់​អំពី​វត្តមាន​កងទ័ព​ចិន​នៅ​មូលដ្ឋាន​ទ័ព​ជើងទឹក​រាម និង​ធានា​ឱ្យ​មេដឹកនាំ​បក្ស​ប្រឆាំង លោក កឹម សុខា អាច​ចូលរួម​ដោយ​សេរី​ក្នុង​ដំណើរការ​នយោបាយ​នៅ​ឆ្នាំ​២០២៣ ខាងមុខ។

អ្នក​នាំពាក្យ​ក្រសួង​ការបរទេស​អាមេរិក លោក នេត ប្រាយ (Ned Price) បាន​ចេញ​សេចក្ដី​ប្រកាស​ព័ត៌មាន​កាលពី​ថ្ងៃទី​៤ សីហា នេះ​ថា រដ្ឋមន្ត្រី​ការបរទេស​សហរដ្ឋ​អាមេរិក លោក Antony Blinken បាន​លើកឡើង​ក្នុង​ជំនួប​ជាមួយ​លោក​នាយករដ្ឋមន្ត្រី ហ៊ុន សែន កាលពី​ថ្ងៃទី​០៤ ខែ​សីហា ឆ្នាំ​២០២២ នេះ ដោយ​ជំរុញ​ឱ្យ​លោក ហ៊ុន សែន បង្ហាញ​ពី​តម្លាភាព​ឱ្យ​បាន​ច្បាស់លាស់​ជុំវិញ​វត្តមាន​កងទ័ព​ចិន​នៅ​មូលដ្ឋាន​ទ័ព​ជើងទឹក​រាម ព្រោះ​ថា​វត្តមាន​ផ្ដាច់មុខ​របស់​ចិន គឺជា​ការ​ប្រថុយ​នឹង​ការ​បំផ្លាញ​អធិបតេយ្យភាព សន្តិសុខ​ក្នុង​តំបន់ និង​ឯកភាព​អាស៊ាន​របស់​កម្ពុជា​យ៉ាង​ធ្ងន់ធ្ងរ​ទៅ​ថ្ងៃ​មុខ។

លោក Antony Blinken ក៏​បាន​ជំរុញ​ឱ្យ​លោក ហ៊ុន សែន ធ្វើ​ឱ្យ​មាន​វឌ្ឍនភាព​នៃ​ដំណើរការ​លទ្ធិប្រជាធិបតេយ្យ​ដូចជា​ការ​ទម្លាក់​ចោល​ការ​ចោទប្រកាន់​លោក កឹម សុខា ប្រធាន​គណបក្ស​សង្គ្រោះ​ជាតិ និង​ការ​គោរព​សិទ្ធិមនុស្ស ដោយ​ធានា​ឱ្យ​ពលរដ្ឋ​កម្ពុជា​ទាំងអស់ រួម​ទាំង​សកម្មជន​នយោបាយ និង​ពលរដ្ឋ​ខ្មែរ​អាមេរិកាំង គឺ​កញ្ញា សេង ធារី ផង ត្រូវតែ​មាន​ការ​ដោះលែង​ពី​ការ​ឃុំ​ខ្លួន​ពី​បទ​ចោទប្រកាន់​ពាក់ព័ន្ធ​នឹង​នយោបាយ ដើម្បី​ឱ្យ​ពួកគេ​មាន​សេរីភាព​ពេញលេញ​ឡើងវិញ​នៅ​មុន​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ។

លោក Antony Blinken បាន​រំឭក​ឡើងវិញ​នូវ​ការ​ប្ដេជ្ញា​ចិត្ត​របស់​សហរដ្ឋ​អាមេរិក​ចំពោះ​ពលរដ្ឋ​កម្ពុជា និង​សេចក្តី​ប្រាថ្នា​របស់​ពួកគេ ក្នុង​នាម​ជា​ប្រទេស​ដែល​មាន​ភាព​រីកចម្រើន​ខាង​ប្រជាធិបតេយ្យ និង​ឯករាជ្យ ដែល​សំឡេង​ទាំងអស់​របស់​ពួកគេ​នឹង​ត្រូវ​បាន​ស្តាប់ និង​គោរព​ដោយ​ស្វ័យភាព​ក្នុង​ការ​ការពារ​ពី​សំណាក់​រដ្ឋាភិបាល​កម្ពុជា។

កាលពី​ថ្ងៃទី​០៤ ខែ​សីហា ឆ្នាំ​២០២២ ប្រមុខ​រដ្ឋាភិបាល​កម្ពុជា លោក ហ៊ុន សែន បាន​សរសេរ​លើ​ទំព័រ​ហ្វេសប៊ុក​របស់​លោក​បន្ទាប់ពី​ជួប​ពិភាក្សា​ជាមួយ​លោក Antony Blinken នូវ​ខ្លឹមសារ​មួយ​ចំនួន ប៉ុន្តែ​មិន​ដូច​គ្នា​ទៅ​នឹង​សេចក្តី​ប្រកាស​ព័ត៌មាន​របស់​រដ្ឋមន្ត្រី​ការបរទេស​អាមេរិក​នោះ​ទេ ក្នុង​នោះ លោក ហ៊ុន សែន គ្រាន់តែ​បញ្ជាក់​ថា លោក Antony Blinken បាន​អរគុណ​កម្ពុជា​ដែល​បាន​ផ្ដល់​ដី​ឱ្យ​សហរដ្ឋ​អាមេរិក​សង់​ស្ថានទូត និង​អនុញ្ញាត​ឱ្យ​កប៉ាល់ Westerdam ចូល​ចត ជាដើម។

លើស​ពី​នេះ លោក ហ៊ុន សែន បាន​រៀបរាប់​ថា រដ្ឋមន្ត្រី​ការបរទេស​សហរដ្ឋ​អាមេរិក​ក៏​បាន​អរគុណ​កម្ពុជា​ផង​ដែរ​ចំពោះ​កិច្ចប្រឹងប្រែង​របស់​កម្ពុជា​ក្នុង​នាម​ជា​ប្រធាន​អាស៊ាន ក្នុង​ការ​ស្វែងរក​ដំណោះស្រាយ​លើ​បញ្ហា​នៅ​មីយ៉ាន់ម៉ា និង​ទិសដៅ​របស់​សហរដ្ឋ​អាមេរិក​ក្នុង​ការ​បង្កើត​ឱ្យ​មាន​ទំនាក់ទំនង​ជា​វិជ្ជមាន​ជាមួយ​កម្ពុជា ដោយ​ឈរ​លើ​មូលដ្ឋាន​នៃ​កិច្ច​សហប្រតិបត្តិការ​ដែល​មាន​ស្រាប់ ដូចជា ទីផ្សារ​នាំចេញ និង​ជំនួយ​សម្រាប់​ការ​អភិវឌ្ឍ ជាដើម។

ប្រធាន​វេទិកា​ពលរដ្ឋ លោក គឹម សុខ បាន​ប្រាប់ The Cambodia Daily នៅ​ថ្ងៃទី​៥ សីហា នេះ​ថា សេចក្តី​ប្រកាស​ព័ត៌មាន​របស់​ក្រសួង​ការបរទេស​អាមេរិក បង្ហាញ​ថា សហរដ្ឋ​អាមេរិក​នឹង​មិន​ដក​ដៃ​ជាដាច់ខាត​ក្នុង​ការ​ជំរុញ​ឲ្យ​មេដឹកនាំ​កម្ពុជា លោក ហ៊ុន សែន លើកស្ទួយ​សិទ្ធិមនុស្ស និង​ស្ដារ​លទ្ធិប្រជាធិបតេយ្យ ហើយ​ត្រូវ​ជម្រះ​មន្ទិល​ឲ្យ​ជ្រះ​ស្រឡះ​ចំពោះ​វត្តមាន​កងទ័ព​ជើងទឹក​ចិន​នៅ​កំពង់ផែ​ជើងទឹក​រាម​របស់​កម្ពុជា ប្រសិនបើ​លោក ហ៊ុន សែន ចង់​ឲ្យ​មាន​ទំនាក់ទំនង​ប្រសើរ​ឡើងវិញ​រវាង​កម្ពុជា និង​អាមេរិក​នោះ។

លោក គឹម សុខ គូស​បញ្ជាក់​ថា ការ​វិវឌ្ឍ​ស្ថានការណ៍​ទៅ​មុខ​មិន​ស្ថិត​លើ​ការ​ភូតភរ​កុហក​របស់​លោក ហ៊ុន សែន នោះ​ទេ ប៉ុន្តែ​រឿង​ពិត គឺ​ស្ថិត​នៅ​ត្រង់​ថា ការ​លើកឡើង​របស់​សហរដ្ឋ​អាមេរិក តើ​រដ្ឋាភិបាល​លោក ហ៊ុន សែន នឹង​ធ្វើ​ការ​កែលំអ ឬ​ក៏​អត់​ប៉ុណ្ណោះ។

លោក​បន្ត​ថា ប្រសិនបើ​រដ្ឋាភិបាល​កម្ពុជា​មិន​ធ្វើ​ឲ្យ​មាន​ការ​វិវឌ្ឍ​ទៅ​មុខ​ឲ្យ​បាន​ល្អ​ប្រសើរ​នូវ​ការ​ស្ដារ​លទ្ធិប្រជាធិបតេយ្យ និង​សិទ្ធិមនុស្ស​ទេ នោះ​ទំនាក់ទំនង​ការទូត​រវាង​កម្ពុជា និង​អាមេរិក​មិន​អាច​ឈាន​ទៅ​រក​ភាព​ជា​ដៃគូ​បាន​ឡើយ ខណៈ​ផលប្រយោជន៍​សេដ្ឋកិច្ច​របស់​កម្ពុជា​ក៏​នឹង​ត្រូវ​រឹតត្បិត​កាន់តែ​ខ្លាំង។

លោក​បន្ត​ថា ប្រសិនបើ​ប្រធាន​គណបក្ស​សង្គ្រោះ​ជាតិ លោក កឹម សុខា មិន​អាច​ចូលរួម​ការ​បោះឆ្នោត​នៅ​ឆ្នាំ​២០២៣ ខាងមុខ​នេះ​បាន​ទេ មាន​ន័យ​ថា ប្រជាធិបតេយ្យ​នៅ​កម្ពុជា គឺ​ស្លាប់​យ៉ាង​ពិតប្រាកដ ព្រោះ​ថា​ដំណើរ​នៃ​ការ​គ្រប់គ្រង​អំណាច​តាម​បែប​សន្តតិវង្ស​ដូចជា​កូរ៉េ​ខាងជើង ក៏​កំពុងតែ​កើត​មាន​ផង​ដែរ​នូវ​ការ​ផ្ទេរ​អំណាច​ពី​ឪពុក​ទៅ​កូន​នៅ​កម្ពុជា។

ប្រធាន​គណបក្ស​សង្គ្រោះ​ជាតិ លោក កឹម សុខា ជួប​សម្ដែង​ការ​គួរសម និង​ពិភាក្សា​ជាមួយ​លោក Antony BLINKEN រដ្ឋមន្ត្រី​ការបរទេស​សហរដ្ឋ​អាមេរិក ថ្ងៃទី​៥ ខែ​សីហា ឆ្នាំ​២០២២។

លោក Antony Blinken បាន​ជួប​ជាមួយ​ប្រធាន​គណបក្ស​សង្គ្រោះ​ជាតិ លោក កឹម សុខា នៅ​ថ្ងៃទី​៥ ខែ​សីហា ឆ្នាំ​២០២២ នេះ ហើយ​ក្នុង​ជំនួប​នោះ​ក៏​មាន​ការ​លើកឡើង​ជុំវិញ​ការ​ស្ដារ​លទ្ធិប្រជាធិបតេយ្យ និង​លើកស្ទួយ​សិទ្ធិមនុស្ស​នៅ​កម្ពុជា​យ៉ាង​ច្រើន​ផង​ដែរ។

ក្រៅពី​ជំនួប​ជាមួយ​រដ្ឋមន្ត្រី​ការបរទេស​សហរដ្ឋ​អាមេរិក លោក Antony Blinken ប្រធាន​គណបក្ស​សង្គ្រោះ​ជាតិ លោក កឹម សុខា ក៏​បាន​ជួប​ជាមួយ​រដ្ឋមន្ត្រី​ការបរទេស​អូស្ត្រាលី អ្នកស្រី ផេននី វង់ (Penny Wong) នៅ​ថ្ងៃ​សុក្រ​នេះ​ដែរ។ ចំណែក​តំណាង​ជាន់ខ្ពស់​ទទួល​បន្ទុក​កិច្ចការ​បរទេស និង​សន្តិសុខ នយោបាយ និង​ជា​អនុប្រធាន​គណៈកម្មការ​អឺរ៉ុប លោក ចូសិប បូររែល គ្រោង​នឹង​ជួប​ជាមួយ​លោក កឹម សុខា នៅ​ថ្ងៃ​សៅរ៍​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស