លោកឧកញ៉ា ហ៊ុន តូ ក្មួយប្រុសរបស់បុរសខ្លាំងកម្ពុជា លោក ហ៊ុន សែន ដែលល្បីខាងអាក្រក់ៗ និងជាអគ្គនាយកក្រុមហ៊ុន L.H.R ASEAN Investment CO. LTD ដែលចូលចិត្តជិះរថយន្តម៉ាក Lamborghini ហើយកន្លងមកជាប់សង្ស័យពីបទរត់ពន្ធគ្រឿងញៀន និងការលាងលុយកខ្វក់នៅប្រទេសអូស្ត្រាលី នោះ ត្រូវបានសង្ស័យជាថ្មីថាមានទំនាក់ទំនងនឹងប្រតិបត្តិការជួញដូរមនុស្សដ៏ធំនៅកម្ពុជា ដែលគ្រប់គ្រងដោយឧក្រិដ្ឋជនជនជាតិចិន។
សារព័ត៌មាន The Australian ដែលបានចេញផ្សាយក្នុងរយៈពេលប៉ុន្មានថ្ងៃមកនេះ បានដាក់ចំណងជើងធំៗរបស់ខ្លួនដោយភ្ជាប់ជាមួយរូបថតឧកញ៉ា ហ៊ុន តូ ជាមួយនឹងរថយន្ត McLaren P1 តម្លៃ ១,៥លានដុល្លារនៅកម្ពុជា ប្តូរទៅបើកឡាន Lamborghini Aventador Roadster តម្លៃ ៤សែន ៥ម៉ឺនដុល្លារនៅអូស្ត្រាលី និងរូបថតជួបជុំគ្រួសារនៅថ្ងៃខួបកំណើត។
សារព័ត៌មាន The Australian បានសរសេរថា លោក ហ៊ុន តូ ក្មួយប្រុសរបស់មេដឹកនាំផ្ដាច់ការកម្ពុជា លោក ហ៊ុន សែន នៅទីក្រុងមែលប៊ន គឺជានាយកក្រុមហ៊ុនមួយដែលត្រូវសង្ស័យថាមានទំនាក់ទំនងនឹងប្រតិបត្តិការជួញដូរមនុស្សដ៏ធំនៅកម្ពុជា ដែលគ្រប់គ្រងដោយក្រុមឧក្រិដ្ឋជនលាងលុយជនជាតិចិន។
សារព័ត៌មានដដែលបានសរសេរថា អាជ្ញាធរអូស្ត្រាលីបានបង្ហាញពីបណ្ដាញឧក្រិដ្ឋកម្មដ៏មានឥទ្ធិពលរបស់ប្រទេសចិន កំពុងទទួលបានភាពងាយស្រួលក្នុងការចូលប្រទេសអូស្ត្រាលី តាមរយៈអ្នកមានខ្មែរដែលមានទំនាក់ទំនងយ៉ាងស៊ីជម្រៅជាមួយនឹងរបបលោក ហ៊ុន សែន ដែលពុករលួយ។
ប្រភពដដែលបានឲ្យដឹងថា អ្នកកាសែតស៊ើបអង្កេតរបស់អូស្ត្រាលីដ៏ល្បីឈ្មោះ គឺអ្នកស្រី Mary Ann Jolley បានបង្ហាញប្រតិបត្តិការឆបោកតាមអ៊ីនធឺណិតដ៏ធំរបស់ចិននៅក្នុងប្រទេសកម្ពុជា ដោយមានការសង្ស័យថាមានទំនាក់ទំនងទៅប្រទេសអូស្ត្រាលី។ អ្នកស្រីបានរកឃើញថា បុគ្គលដែលត្រូវបានគេជួញដូរនោះមានចំនួនរាប់ពាន់នាក់ ត្រូវបានបង្ខំឱ្យបោកប្រាស់ទៅតាមគោលដៅនានាជុំវិញពិភពលោកតាមប្រព័ន្ធអ៊ីនធឺណិត។
បុរសចិនម្នាក់និយាយថា គាត់ត្រូវបានគេរត់ពន្ធ និងជួញដូរចូលមកកាន់ប្រទេសកម្ពុជា។ បុរសរូបនេះនិយាយថា ជនរងគ្រោះណាដែលហ៊ានប្រឆាំងនឹងការបញ្ជា នោះពួកគេនឹងរងនូវទារុណកម្មដោយការវាយនឹងដំបងឆក់។
ក្មួយប្រុសរបស់លោក ហ៊ុន សែន គឺលោក ហ៊ុន តូ ដែលទៅប្រទេសអូស្ត្រាលីញឹកញាប់ គឺជានាយកក្រុមហ៊ុនជាច្រើន រួមទាំងធនាគារ Heng He ជាក្រុមហ៊ុនវិនិយោគចិនដ៏ធំមួយនៅកម្ពុជា ដែលជាប់ពាក់ព័ន្ធនឹងឧក្រិដ្ឋកម្មបច្ចេកវិទ្យា។
សារព័ត៌មានដដែលសរសេរថា សារព័ត៌មាន The Australian មិនបានលើកឡើងថា លោក ហ៊ុន តូ មានជាប់ពាក់ព័ន្ធផ្ទាល់ ឬមានចំណេះដឹងអំពីប្រតិបត្តិការជួញដូរមនុស្សនោះទេ គ្រាន់តែថាមានតែការស៊ើបអង្កេតអាជីវកម្មរបស់គាត់ប៉ុណ្ណោះ។
ទោះជាយ៉ាងណា ឧកញ៉ា ហ៊ុន តូ ធ្លាប់បានថ្លែងទៅកាន់អ្នកស្រី Mary Ann Jolley ដោយបាននិយាយថា លោកមិនបានដឹងអំពីប្រតិបត្តិការឧក្រិដ្ឋកម្មបច្ចេកវិទ្យានោះទេ។ លោកក៏មិនបានឆ្លើយតបនឹងសំណើរបស់កាសែត The Australian សម្រាប់ការធ្វើអត្ថាធិប្បាយនោះដែរ។
អគ្គនាយកក្រុមហ៊ុន L.H.R ASEAN Investment CO. LTD កាលពីឆ្នាំ២០១២ ត្រូវបានកាសែត The Sydney Morning Herald និងកាសែត The Age បានចុះផ្សាយដោយដកស្រង់ការស៊ើបអង្កេតពីគណៈកម្មការឧក្រិដ្ឋកម្មអូស្ត្រាលី ថា អាជ្ញាធរអូស្ត្រាលីបានតាមដានការផ្ទេរលុយដោយសង្ស័យថាជាលុយបានពីការរត់ពន្ធគ្រឿងញៀនចេញពីបនល្បែងកាស៊ីណូ Crown នៅទីក្រុងម៉ែលប៊ន ដែលគេសង្ស័យថាស្ថិតក្រោមការត្រួតពិនិត្យរបស់លោក ហ៊ុន តូ។
ប្រតិបត្តិការតាមដានសំដៅលើលោក ហ៊ុន តូ រកឃើញការដឹកគ្រឿងញៀនប្រភេទហេរ៉ូអ៊ីនចូលប្រទេសអូស្ត្រាលី ដោយបង្កប់ក្នុងឈើដែលបានអាររួច។ គ្រឿងញៀនដឹកចូលអូស្ត្រាលី មានទឹកប្រាក់ប្រមាណ ១ពាន់លានដុល្លារក្នុងមួយឆ្នាំៗ។ ការតាមដានរបស់អាជ្ញាធរអូស្ត្រាលី ធ្វើឡើងបន្ទាប់ពីតុលាការអូស្ត្រាលីចាប់ និងផ្ដន្ទាទោសជនជាតិខ្មែរមួយរូបឈ្មោះ ថៃ ផែនី កាលឆ្នាំ២០០៥ ដែលជាមនុស្សរបស់លោក ហ៊ុន តូ។ លោក ថៃ ផែនី គឺជាបងប្អូនជីដូនមួយរបស់ភរិយាលោក ហ៊ុន តូ គឺលោកស្រី Jackie Thai។
សារព័ត៌មានដដែលបានរាយការណ៍នៅក្នុងអត្ថបទរបស់ខ្លួនដែលមានខ្លឹមសារថា អាជ្ញាធរអូស្ត្រាលីមានគម្រោងចាប់ខ្លួនឧកញ៉ា ហ៊ុន តូ ក៏ប៉ុន្តែត្រូវបានអាក់ខានទៅវិញដោយសារតែស្ថានទូតអូស្ត្រាលីប្រចាំទីក្រុងភ្នំពេញ មិនបានផ្តល់ទិដ្ឋាការដល់លោក ហ៊ុន តូ ដោយខ្លាចប៉ះពាល់ទំនាក់ទំនងការទូតរវាងកម្ពុជា និងអូស្ត្រាលី។
កាសែតនោះក៏បានបញ្ជាក់ថា ក្នុងពេលនោះ លោក គិត ម៉េង ក៏មានទំនាក់ទំនងរកស៊ីជាមួយលោក ហ៊ុន តូ ដែរ ប៉ុន្តែមិនបានលើកឡើងថា លោក គិត ម៉េង ពាក់ព័ន្ធក្នុងសកម្មភាពឧក្រិដ្ឋនោះទេ។
សារព័ត៌មានក្នុងស្រុករបស់អូស្ត្រាលីខ្លះបានរកឃើញថា លោកស្រី Jackie Thai ដែលជាភរិយាលោក ហ៊ុន តូ កំពុងកាន់កាប់ភូមិគ្រឹះជាច្រើនកន្លែងនៅជុំវិញក្រុងមែលប៊ន ក្នុងរយៈពេលប៉ុន្មានទសវត្សរ៍ចុងក្រោយនេះ។ នៅក្នុងឆ្នាំ២០១៦ លោកស្រីបានទម្លាក់លុយជិត ១លានដុល្លារអូស្ត្រាលី ឬស្មើនឹងជាង ៨សែនដុល្លារអាមេរិក ដើម្បីទិញដីឡូត៍ពីរកន្លែងជាប់គ្នា ហើយបានសាងសង់ភូមិគ្រឹះដ៏ធំស្កឹមស្កៃនៅទីនោះ។
លោកស្រី Jackie Thai បានបង្កើតមុខជំនួញនៅអូស្ត្រាលីជាលើកដំបូងមួយរបស់លោកស្រីកាលពីឆ្នាំ២០១៥ ហើយបានបង្កើតមុខជំនួញរួមគ្នាជាមួយប្តី ២បន្ថែមទៀតក្នុងឆ្នាំ២០២០ ដោយបានដាក់ឈ្មោះអាជីវកម្មមួយនោះថា J & H Capital Investment Pty Ltd។
ក្រោយពីត្រឡប់មកពីប្រទេសអូស្ត្រាលីវិញក្នុងឆ្នាំ២០១៥ លោក ហ៊ុន តូ បានថ្លែងនៅក្នុងសន្និសីទសារព័ត៌មាននៅឯអាកាសយានដ្ឋានអន្តរជាតិភ្នំពេញ ដើម្បីឆ្លើយតបទៅនឹងអត្ថបទរបស់សារព័ត៌មាន The Sydney Morning Herald និងកាសែត The Age ថាជាការផ្សព្វផ្សាយគ្មានមូលដ្ឋាន និងគ្មានភស្តុតាងច្បាស់លាស់។
លោកបញ្ជាក់ថា ប្រទេសអូស្ត្រាលីមានច្បាប់ ប្រទេសកម្ពុជាក៏មានច្បាប់ ដូច្នេះបើលោកពាក់ព័ន្ធដូចការចុះផ្សាយមែន នោះមិនចាំបាច់អាជ្ញាធរអូស្ត្រាលីចាប់នោះទេ គឺនាយករដ្ឋមន្ត្រី ហ៊ុន សែន ច្បាស់ជាបញ្ជាឲ្យសមត្ថកិច្ចចាប់ខ្លួនលោកនៅក្នុងប្រទេសកម្ពុជាបាត់ទៅហើយ។
កាលពីថ្ងៃទី១៩ ខែកក្កដា ឆ្នាំ២០២២ ក្រសួងការបរទេសអាមេរិក បានបញ្ចេញរបាយការណ៍ប្រចាំឆ្នាំ២០២២ ស្ដីពីការជួញដូរមនុស្ស ដោយក្នុងនោះ អាមេរិកបានទម្លាក់កម្ពុជា វៀតណាម តំបន់ម៉ាកាវ និងប្រទេសផ្សេងទៀតពីបញ្ជីស្ថិតក្រោមការឃ្លាំមើលនៅកម្រិត២ (Tier 2 Watch List) ទៅកម្រិតបីដែលជាកម្រិតដ៏អាក្រក់មួយ និងអាចរងទណ្ឌកម្ម។ ការទម្លាក់កម្ពុជាមកកម្រិត៣ នេះ ធ្វើឡើងក្រោមហេតុផលថា កម្ពុជាមានកិច្ចខិតខំតិចតួច និងមិនបានគោរពតាមស្តង់ដារនៃការលុបបំបាត់ការជួញដូរមនុស្ស។
បើតាមរបាយការណ៍ក្រសួងការបរទេសអាមេរិក បញ្ជាក់ថា ប្រទេសកម្ពុជាស្ថិតនៅក្នុងចំណាត់ថ្នាក់ទី៣ ដែលអាចធ្វើឱ្យមានការរឹតត្បិតលើជំនួយបរទេស បើទោះបីជានេះមិនមែនជាការចាំបាច់ និងជាការសម្រេចចិត្តផ្នែកនយោបាយរបស់ប្រធានាធិបតីសហរដ្ឋអាមេរិកក៏ដោយ៕