មេដឹកនាំបក្សប្រឆាំង លោក កឹម សុខា បានអះអាងថា រដ្ឋាភិបាលប្រទេសជប៉ុនចង់ឃើញកម្ពុជាមានការបោះឆ្នោតដោយសេរី ត្រឹមត្រូវ និងយុត្តិធម៌ ក្នុងការបោះឆ្នោតជ្រើសរើសតំណាងរាស្ត្រនៅឆ្នាំ២០២៣ ខាងមុខនេះ។
ប្រធានគណបក្សសង្គ្រោះជាតិដែលកំពុងរងការរឹតត្បិតសេរីភាព លោក កឹម សុខា បានសរសេរលើគណនីហ្វេសប៊ុករបស់លោកកាលពីថ្ងៃទី៧ ខែសីហា ថា លោកបានជួបពិភាក្សាការងារជាមួយអគ្គនាយកទទួលបន្ទុកកិច្ចការអាស៊ាន និងអាស៊ីបូព៌ា និងជាឧបការីរដ្ឋមន្ត្រីការបរទេសជប៉ុន លោក KANO Takehiro នៅក្នុងស្ថានទូតជប៉ុនប្រចាំកម្ពុជា កាលពីសៅរ៍ ទី៦ សីហា កន្លងទៅ។ ក្នុងនោះ លោក KANO Takehiro បញ្ជាក់ថា រដ្ឋាភិបាលជប៉ុននៅតែប្រកាន់យកនូវគោលការណ៍ប្រជាធិបតេយ្យជាគុណតម្លៃក្នុងការទំនាក់ទំនង និងកិច្ចសហប្រតិបត្តិការអន្តរជាតិរបស់ខ្លួនជាមួយប្រទេសជាមិត្តជានិច្ច។
មេដឹកនាំបក្សប្រឆាំងដែលមិនទាន់មានសេរីភាពពេញលេញឡើងវិញ លោក កឹម សុខា បញ្ជាក់ថា រដ្ឋាភិបាលជប៉ុននៅតែចង់ឃើញកម្ពុជាមានការបោះឆ្នោតដោយសេរី ត្រឹមត្រូវ និងយុត្តិធម៌ ដោយការបើកទូលាយឲ្យប្រជាពលរដ្ឋខ្មែរគ្រប់រូបមានសិទ្ធិជ្រើសរើសគណបក្សនយោបាយ ឬអ្នកដឹកនាំដែលខ្លួនស្រឡាញ់ពេញចិត្ត ស្របតាមឆន្ទៈរបស់ពួកគេ ជាពិសេសក្នុងការបោះឆ្នោតជាតិឆ្នាំ២០២៣ ខាងមុខនេះ។
ការអះអាងនេះ ធ្វើឡើងស្របពេលដែលមេដឹកនាំបក្សប្រឆាំង លោក កឹម សុខា ត្រូវបានមេដឹកនាំបក្សកាន់អំណាច លោក ហ៊ុន សែន ចោទប្រកាន់ពីបទក្បត់ជាតិដែលបានបង្ខាំងដំណើរការចូលរួមក្នុងកិច្ចការនយោបាយរបស់លោកអស់រយៈពេលជិត ៥ឆ្នាំកន្លងមកនេះ។
ប្រធានគណបក្សសង្គ្រោះជាតិ លោក កឹម សុខា ត្រូវអាជ្ញាធរក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេសក្នុងបំណងផ្តួលរំលំរដ្ឋាភិបាលកម្ពុជា ប៉ុន្តែរហូតមកទល់នឹងពេលនេះ តុលាការកម្ពុជាមិនទាន់អាចកាត់ទោសលោកពីបទល្មើសណាមួយនៅឡើយទេ ហើយសវនាការរបស់លោកនៅតែត្រូវបានអូសបន្លាយបន្លាយពីសំណាក់តុលាការកម្ពុជាអស់រយៈពេលជិត ៥ឆ្នាំ បើគិតមកទល់នឹងខែសីហា ឆ្នាំ២០២២ នេះ។
ទាក់ទិននឹងបញ្ហានេះ ក្រសួងការបរទេសសហរដ្ឋអាមេរិក បានចេញសេចក្តីប្រកាសព័ត៌មានកាលពីថ្ងៃទី៥ ខែសីហា ឆ្នាំ២០២២ បន្ទាប់ពីរដ្ឋមន្ត្រីការបរទេសអាមេរិក លោក Antony Blinken ជួបជាមួយលោក កឹម សុខា ថា រដ្ឋមន្ត្រីការបរទេសអាមេរិករូបនេះពិតជាមានការខកចិត្តយ៉ាងខ្លាំងចំពោះការកាត់ក្តីរយៈពេលប្រាំឆ្នាំលើសំណុំរឿងប្រធានគណបក្សសង្គ្រោះជាតិ លោក កឹម សុខា ដែលមានហេតុផលនយោបាយ ហើយនៅតែគ្មានដំណោះស្រាយរហូតមកទល់នឹងពេលនេះ។
រដ្ឋមន្ត្រីការបរទេសអាមេរិក លោក Antony Blinken បញ្ជាក់ថា កម្ពុជានឹងទទួលបានអត្ថប្រយោជន៍យ៉ាងច្រើនពីការស្ដារសិទ្ធិនយោបាយ និងការបើកលំហសេរីភាពឲ្យមេដឹកនាំបក្សប្រឆាំង លោក កឹម សុខា អាចចូលរួមក្នុងដំណើរការប្រជាធិបតេយ្យនៅកម្ពុជា ជាពិសេសនៅមុនការបោះឆ្នោតជាតិឆ្នាំ២០២៣ ខាងមុខនេះ។
ចំណែករដ្ឋមន្ត្រីការបរទេសអូស្ត្រាលី អ្នកស្រី Penny Wong បានអះអាងក្រោយជួបជាមួយប្រធានគណបក្សសង្គ្រោះជាតិ លោក កឹម សុខា អំឡុងពេលចូលរួមកិច្ចប្រជុំរដ្ឋមន្ត្រីការបរទេសអាស៊ានកាលពីចុងសប្តាហ៍កន្លងទៅថា រដ្ឋាភិបាលអូស្ត្រាលីតែងតែផ្តល់តម្លៃចំពោះការលើកស្ទួយសិទ្ធិមនុស្ស និងលទ្ធិប្រជាធិបតេយ្យនៅក្នុងតំបន់ ក៏ដូចជានៅកម្ពុជាផងដែរ។
ចាប់តាំងពីឆ្នាំ២០១៧ មក តុលាការកម្ពុជាបានបើកសវនាការលើករណីលោក កឹម សុខា ចំនួន ៥០លើករួចហើយ តែមិនទាន់មានភស្តុតាងណាមួយដែលត្រឹមត្រូវតាមច្បាប់អាចកាត់ទោសលោកបាននៅឡើយទេ។
ជុំវិញបញ្ហានេះ មេដឹកនាំបក្សកាន់អំណាច លោក ហ៊ុន សែន ធ្លាប់បានអះអាងថា សំណុំរឿងរបស់លោក កឹម សុខា អាចនឹងត្រូវដោះស្រាយនៅឆ្នាំ២០២៤ បន្ទាប់ពីការបោះឆ្នោតជាតិឆ្នាំ២០២៣ រួចរាល់៕