29 C
Phnom Penh

សកម្មជន​ថា​លោក ហ៊ុន សែន និង​មន្ត្រី​ពាក់ព័ន្ធ​ត្រូវតែ​ទទួល​ខុសត្រូវ​ចំពោះ​ការ​បំផ្លាញ​ព្រៃ​សួនសត្វ​ភ្នំ​តាម៉ៅ

ដោយ ឌឹ ខេមបូឌា ដេលី

បទវិភាគ

សកម្មជន​ការពារ​ព្រៃឈើ អះអាង​ថា លោក ហ៊ុន សែន និង​រដ្ឋមន្ត្រី​ដែល​ពាក់ព័ន្ធ​ដែល​ចុះហត្ថលេខា​ឱ្យ​ក្រុមហ៊ុន​ឯកជន​ឈូស​ឆាយ​ព្រៃ​នៅ​តំបន់​ឧទ្យាន​សួនសត្វ​ភ្នំ​តាម៉ៅ​ជិត ៦០០​ហិកតារ គឺជា​អ្នក​ដែល​ត្រូវ​ទទួល​ខុសត្រូវ​ចំពោះ​មុខ​ច្បាប់។

សកម្មជន​ការពារ​ព្រៃឈើ​កម្ពុជា លោក ហេង ស្រស់ បាន​លើកឡើង​ក្នុង​កម្មវិធី Idea Talk កាលពី​រាត្រី​ថ្ងៃ​អង្គារ ទី​៩ សីហា ថា ទាំង​អ្នក​ដែល​ចុះហត្ថលេខា​យល់ព្រម​ឱ្យ​ឈូស​ឆាយ ទាំង​ក្រុមហ៊ុន​ឯកជន និង​មន្ត្រី​ពាក់ព័ន្ធ ដូចជា​ក្រសួង​កសិកម្ម និង​ក្រសួង​បរិស្ថាន ជាដើម សុទ្ធតែ​បាន​ដឹង​គ្រប់​គ្នា​ហើយ​ថា តំបន់​ឧទ្យាន​សួនសត្វ​ភ្នំ​តាម៉ៅ​នេះ​ជា​តំបន់​អភិរក្ស ចុះ​ហេតុ​ដូចម្តេច​បាន​ជា​ពួកគេ​នាំគ្នា​រំលោភ​បំពាន​ទៅ​ឈូស​ឆាយ​ព្រៃ​នៅ​តំបន់​នោះ​ទៀត ដូច្នេះ​អ្នក​ទាំងនោះ​ត្រូវតែ​ទទួល​ខុសត្រូវ​ចំពោះ​មុខ​ច្បាប់​ដោយ​គ្មាន​ករណី​លើកលែង​ដាច់ខាត។

លោក ហេង ស្រស់ អះអាង​ថា ដោយសារតែ​រដ្ឋាភិបាល​កម្ពុជា​ដឹកនាំ​ដោយ​គ្មាន​ការ​ទទួល​ខុសត្រូវ និង​គ្មាន​តម្លាភាព​ដាក់​ទោស​ទៅ​លើ​អ្នក​ដែល​ប្រព្រឹត្ត​ខុស​បែប​នេះ​ហើយ ទើប​បាន​ជា​តំបន់​អភិរក្ស ឧទ្យាន​ជាតិ និង​ដែន​ជម្រក​សត្វព្រៃ​ទូទាំង​ប្រទេស ត្រូវ​រង​នូវ​ការ​បំផ្លិចបំផ្លាញ​គ្មាន​សល់​ពី​សំណាក់​ក្រុមហ៊ុន​ឯកជន ដែល​ទទួល​បាន​សិទ្ធិ​ពី​រដ្ឋាភិបាល​ដោយ​មាន​ការ​ជ្រោមជ្រែង​ពី​ក្រសួង​ពាក់ព័ន្ធ​នានា ជាពិសេស​ក្រសួង​បរិស្ថាន និង​ក្រសួង​កសិកម្ម ជាដើម ក្នុង​ពេល​បច្ចុប្បន្ន​នេះ។

សកម្មជន​ការពារ​ព្រៃឈើ​កម្ពុជា​រូប​នេះ​បញ្ជាក់​ថា ឧក្រិដ្ឋកម្ម​ព្រៃឈើ​ដែល​បណ្តាល​មកពី​ក្រុមហ៊ុន​រកស៊ី​ឈើ​ខុសច្បាប់ និង​ក្រុម​ឧកញ៉ា​ដែល​ទទួល​បាន​សិទ្ធិ​កាប់​បំផ្លាញ​ព្រៃឈើ​ដោយ​ស្រប​ច្បាប់​សព្វថ្ងៃ​នេះ គឺ​ដោយសារតែ​ពួកគេ​បាន​ឃុបឃិត​គ្នា​ជា​ប្រព័ន្ធ​ជាមួយ​មន្ត្រី​គ្រាក់ៗ​ក្នុង​ជួរ​រដ្ឋាភិបាល​កម្ពុជា ទើប​ពួកគេ​មិន​ដែល​ទទួល​ទោស​ពី​បទល្មើស​នៃ​ការ​កាប់​បំផ្លាញ​ព្រៃឈើ​រហូត​មក ខណៈ​ប្រមុខ​រដ្ឋាភិបាល​កម្ពុជា លោក ហ៊ុន សែន ក៏​មិន​ដែល​ខ្វាយខ្វល់​ពី​របាយការណ៍​សង្គម​ស៊ីវិល ឬ​ការ​រាយការណ៍​របស់​សកម្មជន​ព្រៃឈើ​ដែល​បាន​ដាក់​ជូន​នា​ពេល​កន្លងមក​នោះ​ដែរ។

កាលពី​ថ្ងៃទី​១ ខែ​សីហា ឆ្នាំ​២០២២ ក្រុមហ៊ុន​ឯកជន​ចំនួន​៣ រួម​មាន​ក្រុមហ៊ុន Bati Tourism & Development ក្រុមហ៊ុន TP Moral Group និង​ក្រុមហ៊ុន China Poipet Satellite City បាន​សហការ​គ្នា​ដោយ​មាន​ការ​ឯកភាព​ពី​ក្រសួង​កសិកម្ម រុក្ខាប្រមាញ់ និង​នេសាទ ដាក់​គ្រឿងចក្រ​ជាច្រើន​គ្រឿង​ឈូស​ឆាយ​ព្រៃឈើ​នៅ​ឧទ្យាន​សួនសត្វ​ភ្នំ​តាម៉ៅ ដែល​ស្ថិត​នៅ​ក្នុង​ឃុំ​កណ្ដឹង ស្រុក​បាទី ខេត្ត​តាកែវ ដើម្បី​ប្រកប​អាជីវកម្ម​របស់​ពួកគេ។

ការ​ឈូស​ឆាយ​ព្រៃឈើ​នៅ​ឧទ្យាន​សួនសត្វ​ភ្នំ​តាម៉ៅ​នេះ ត្រូវ​សកម្មជន​ព្រៃឈើ​រក​ឃើញ​ថា ក្រុមហ៊ុន​ទាំងនេះ​មាន​បំណង​បង្កើត​អាជីវកម្ម​ដី​ឡូត៍​ដែល​អាច​លក់​បាន​ក្នុង​តម្លៃ​ប្រមាណ​ជា ៣៦​ដុល្លារ​អាមេរិក​ក្នុង ១​ម៉ែត្រ​ការ៉េ។ ដូច្នេះ​ទំហំ​ដី​ជិត ៦០០​ហិកតារ​ដែល​ពួកគេ​ទទួល​បាន​សិទ្ធិ​កាន់កាប់​ពី​រដ្ឋាភិបាល​កម្ពុជា ដែល​មាន​ទំហំ​ស្មើ​នឹង ៦​លាន​ម៉ែត្រ​ការ៉េ​នោះ ពួកគេ​នឹង​ទទួល​បាន​ចំណូល​ត្រឡប់​មកវិញ​ប្រមាណ​ជាង ២០០​លាន​ដុល្លារ​អាមេរិក​ពី​ការ​ឈូស​ឆាយ​ព្រៃ​នៅ​តំបន់​ឧទ្យាន​សួនសត្វ​ភ្នំ​តាម៉ៅ​នោះ។

យ៉ាងណាក៏ដោយ កាលពី​ថ្ងៃទី​៧ ខែ​សីហា ឆ្នាំ​២០២២ លោក​នាយករដ្ឋមន្ត្រី ហ៊ុន សែន សម្រេច​លុប​ចោល​ទាំងអស់​ចំពោះ​ការ​អនុញ្ញាត​ឱ្យ​ដោះដូរ និង​អភិវឌ្ឍ​តំបន់​ភ្នំ​តាម៉ៅ បន្ទាប់ពី​ក្រុមហ៊ុន​ទាំង​៣ ខាងលើ បាន​ឈូស​ឆាយ​ព្រៃ​នៅ​ឧទ្យាន​សួនសត្វ​ភ្នំ​តាម៉ៅ​អស់​ប្រមាណ​ជិត ៦០០​ហិកតារ​ក្នុង​ចំណោម​ដី​ព្រៃ ១៥០០​ហិកតារ​ដែល​លោក ហ៊ុន សែន ផ្ដល់​ឲ្យ​ក្រោម​គម្រោង​អភិវឌ្ឍន៍​របស់​ក្រុមហ៊ុន​ទាំងនោះ។

យោង​តាម​មាត្រា​៩៤ នៃ​ច្បាប់​ស្ដីពី​រដ្ឋបាល​ព្រៃឈើ បុគ្គល​ណា​ដែល​ប្រព្រឹត្ត​បទល្មើស​ព្រៃឈើ​ធ្វើ​ឱ្យ​ប៉ះពាល់​ខូចខាត​ដល់​មជ្ឈដ្ឋាន​ព្រៃឈើ ត្រូវ​ចេញ​ថ្លៃ​ស្ដារ ឬ​ជួសជុល​ការ​ខូចខាត​ឱ្យ​មាន​លក្ខខណ្ឌ​ដូច​ដើម​ឡើងវិញ ខណៈ​ដែល​មាត្រា​៩៣ នៃ​ច្បាប់​នេះ ក៏​បាន​បញ្ញត្តិ​ដែរ​ថា ចំពោះ​បទឧក្រិដ្ឋ​ត្រូវ​ផ្ដន្ទាទោស​ដាក់​ពន្ធនាគារ​ចន្លោះ​ពី ៥ ទៅ ១០​ឆ្នាំ និង​ត្រូវ​រឹបអូស​វត្ថុ​តាង​ទាំងអស់​មក​ជា​សម្បត្តិ​រដ្ឋ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស