បេក្ខជនអនាគតអ្នកស្នងអំណាចត្រកូល ហ៊ុន លោក ហ៊ុន ម៉ាណែត លើកឡើងថា ពលរដ្ឋខ្មែរមិនគួរនាំគ្នាទៅចាប់អារម្មណ៍នឹងការគប់ស្បែកជើងលើប្រមុខរដ្ឋាភិបាលកម្ពុជានោះទេ ខណៈអ្នកឃ្លាំមើលអះអាងថា លោក ហ៊ុន សែន តែងប្រើវេទិការបស់ខ្លួនបញ្ចេញកំហឹងលើលោក អ៊ុក ទូច ដែលជាម្ចាស់ស្បែកជើង។
កូនប្រុសច្បងរបស់បុរសខ្លាំងក្រាញអំណាចតត្រកូល លោក ហ៊ុន សែន គឺលោក ហ៊ុន ម៉ាណែត បានលើកឡើងក្នុងពិធីសំណេះសំណាលជាមួយសិល្បករកាលពីពេលថ្មីៗនេះថា គួរតែនាំគ្នាផ្សព្វផ្សាយពីព្រឹត្តិការណ៍លោក ហ៊ុន សែន ចូលរួមកិច្ចប្រជុំកំពូលអាស៊ានជាមួយប្រធានាធិបតីសហរដ្ឋអាមេរិក លោក ចូ បៃដិន ទើបជារឿងដែលគួរតែធ្វើ មិនគួរនាំគ្នារំលេចនូវរឿងអវិជ្ជមានដែលលោក អ៊ុក ទូច គប់ស្បែកជើងលើលោក ហ៊ុន សែន នោះទេ។
ទាយាទទទួលមត៌កអំណាចពីឪពុករូបនេះបញ្ជាក់ថា រឿងគប់ស្បែកជើងលើលោក ហ៊ុន សែន ពលរដ្ឋខ្មែរមិនគួរនាំគ្នាខំរំលេចឱ្យរឿងនោះកាន់តែល្បីខ្ទរខ្ទារនោះឡើយ ប៉ុន្តែគួរនាំគ្នាបង្ហាញពីព្រឹត្តិការណ៍ដែលលោក ហ៊ុន សែន ជួបជាមួយពលរដ្ឋខ្មែររាប់ពាន់នាក់ដែលទៅទទួលគាត់នៅលើទឹកដីសហរដ្ឋអាមេរិកវិញ ប្រសើរជាង។
ការអះអាងនេះ ធ្វើឡើងបង្ហាញពីភាពផ្ទុយគ្នាទាំងស្រុងទៅនឹងទង្វើរបស់លោក ហ៊ុន សែន ដែលបានប្រើវេទិកាជួបជុំជាមួយក្រុមគ្រូពេទ្យស្ម័គ្រចិត្តកូវីដ-១៩ ជិតមួយម៉ោង ដោយបញ្ចេញកំហឹងដាក់សហរដ្ឋអាមេរិកផង និងគំរាមពីសន្តិសុខរបស់លោក អ៊ុក ទូច ផងដែរចំពោះករណីគប់ស្បែកជើងកន្លងទៅនោះ។
មេដឹកនាំដែលតែងប្រមាថជីវិតពលរដ្ឋខ្លួនឯង លោក ហ៊ុន សែន ធ្លាប់គំរាមថា ប្រសិនបើអ្នកដែលគប់ស្បែកជើងលើរូបលោកត្រូវមានទោស ហើយសហរដ្ឋអាមេរិកបណ្តេញបុគ្គលនេះចេញពីអាមេរិកឱ្យមករស់នៅកម្ពុជាវិញ នោះគ្រោះថ្នាក់ផ្សេងៗនឹងកើតមានលើលោក អ៊ុក ទូច ដោយចៀសមិនផុតនោះទេ។
លោក ហ៊ុន សែន ធ្លាប់អះអាងថា ប្រសិនបើនៅសហរដ្ឋអាមេរិកដែលគេចាត់ទុកថាជាបិតាប្រជាធិបតេយ្យ និងនីតិរដ្ឋ អាចគប់ស្បែកជើងទៅលើអ្នកដែលខ្លួនមិនពេញចិត្តថាជាការបញ្ចេញមតិ នោះនៅកម្ពុជាក៏នឹងមានការគប់ស្បែកជើងទៅលើក្រុមដែលប្រឆាំងនឹងរដ្ឋាភិបាលរបស់លោកផងដែរ។
កាលពីថ្ងៃទី១១ ខែឧសភា ឆ្នាំ២០២២ ពលរដ្ឋខ្មែរ-អាមេរិកាំងមួយរូប គឺលោក អ៊ុក ទូច បានយកស្បែកជើងគប់ទៅលើលោកនាយករដ្ឋមន្ត្រី ហ៊ុន សែន អំឡុងពេលជួបជាមួយអ្នកគាំទ្ររបស់លោកក្នុងរដ្ឋធានីវ៉ាស៊ីនតុន កាលពីខែឧសភា ឆ្នាំ២០២២ កន្លងទៅនេះ។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់ The Cambodia Daily នៅថ្ងៃទី១៥ សីហា នេះថា ការប្រើពេលជិតមួយម៉ោងដែលលោក ហ៊ុន សែន ព្រមានទៅលើលោក អ៊ុក ទូច គឺជាការបំផុសសាច់រឿងឱ្យរីកធំរួចបាត់ទៅហើយ។ លោកបន្តថា គ្មានពលរដ្ឋខ្មែរណាជាអ្នកពង្រីករឿងនេះឱ្យធំនោះទេ គឺមានតែលោក ហ៊ុន សែន ខ្លួនឯងប៉ុណ្ណោះ។
លោក ហ៊ុន កុសល អះអាងថា ការលើកឡើងរបស់លោក ហ៊ុន ម៉ាណែត នៅពេលនេះដើម្បីជួយលាងជម្រះភាពអាម៉ាស់របស់ប្រមុខរដ្ឋាភិបាលកម្ពុជា ដែលត្រូវបានលោក អ៊ុក ទូច គប់ស្បែកជើងលើ ហើយលោក អ៊ុក ទូច ក៏មិនទាន់ត្រូវបានកាត់ទោសដោយសហរដ្ឋអាមេរិកនោះដែរចំពោះអំពើគប់ស្បែកជើងនេះ។
លោក ហ៊ុន កុសល អះអាងថា បើលោក ហ៊ុន ម៉ាណែត ជាអ្នកចេះដោះស្រាយបញ្ហាពិតប្រាកដ គាត់គួរតែផ្តល់យោបល់ឱ្យលោក ហ៊ុន សែន រក្សាភាពស្ងៀមស្ងាត់បន្ទាប់ពីករណីនេះបានកើតឡើងភ្លាមៗនោះ ទើបជារឿងដែលគួរត្រូវធ្វើជាង ហើយការរក្សាភាពស្ងៀមស្ងាត់នេះ ក៏ជាសកម្មភាពឱ្យគេមើលឃើញពីគុណធម៌របស់លោកនាយករដ្ឋមន្ត្រីផងដែរ៕