លោក ហ៊ុន សែន អះអាងទៅកាន់អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំកម្ពុជា ថា កម្ពុជាចង់ឲ្យតួអង្គទាំងអស់នៅក្នុងដំណើរការប្រជាធិបតេយ្យមានការទទួលខុសត្រូវ ធ្វើការរិះគន់ដោយស្ថាបនា មិនបង្កើតការស្អប់ខ្ពើមរវាងពូជសាសន៍ ហើយការអនុវត្តច្បាប់នានារបស់កម្ពុជាកន្លងមក គឺដើម្បីការពារសន្តិសុខជាតិ និងសណ្ដាប់ធ្នាប់សាធារណៈ និងការពារអាយុជីវិត។
បុរសខ្លាំងដែលចូលចិត្តប្រើកណ្ដាប់ដៃដែក លោក ហ៊ុន សែន បានលើកឡើងក្នុងជំនួបជាមួយអ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំនៅកម្ពុជា លោក វីទិត ម៉ុនតាប៊ន (Vitit MUNTARBHORN) នៅថ្ងៃអង្គារ ទី១៦ សីហា នេះថា ពាក់ព័ន្ធនឹងលំហប្រជាធិបតេយ្យ និងការបោះឆ្នោតដែលកំពុងស្ថិតក្នុងដំណាក់កាលនៃការអនុវត្តជាសកល លទ្ធិប្រជាធិបតេយ្យត្រូវដើរតួទន្ទឹមនឹងនីតិរដ្ឋជាចាំបាច់ ដូច្នេះការអនុវត្តលទ្ធិប្រជាធិបតេយ្យដោយគ្មាននីតិរដ្ឋ នឹងធ្វើឲ្យមានភាពអនាធិបតេយ្យជាមិនខាន។
បុរសខ្លាំងរូបនេះអះអាងថា កម្ពុជាចង់ឲ្យតួអង្គទាំងអស់នៅក្នុងដំណើរការប្រជាធិបតេយ្យមានការទទួលខុសត្រូវ គោរពសិទ្ធិមនុស្ស និងលទ្ធិប្រជាធិបតេយ្យ និងការរក្សាសន្តិភាព ស្ថិរភាព មានការអាស្រ័យគ្នាទៅវិញទៅមក ខណៈការចោទប្រកាន់ថា បទប្បញ្ញត្តិជាច្រើនត្រូវបានរដ្ឋាភិបាលអនុម័តដើម្បីរឹតបន្តឹងលំហសង្គមស៊ីវិល គឺពុំផ្អែកលើមូលដ្ឋានត្រឹមត្រូវការពិតនោះទេ។
បុរសខ្លាំងដើរបញ្ច្រាសទិសរំលោភច្បាប់កម្ពុជា លោក ហ៊ុន សែន បញ្ជាក់ថា ការអនុវត្តច្បាប់របស់រដ្ឋាភិបាលកម្ពុជាកន្លងមក គឺក្នុងគោលបំណងដើម្បីការពារសន្តិសុខជាតិ និងសណ្ដាប់ធ្នាប់សាធារណៈ ការពារអាយុជីវិត សុខមាលភាពរបស់ពលរដ្ឋ និងបរិស្ថានឱ្យមានប្រសិទ្ធភាពខ្ពស់។
នៅថ្ងៃទី១៦ ខែសីហា ឆ្នាំ២០២២ នេះ អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំកម្ពុជា លោក វីទិត ម៉ុនតាប៊ន (Vitit MUNTARBHORN) បានជួបជាមួយបុរសខ្លាំង លោក ហ៊ុន សែន ក្នុងដំណើរទស្សនកិច្ចលើកដំបូងរបស់លោកនៅកម្ពុជាពេលនេះ ក្នុងនោះ លោក វីទិត ម៉ុនតាប៊ន បានលើកឡើងអំពីលំហសង្គមស៊ីវិល លំហប្រជាធិបតេយ្យ ការបោះឆ្នោត និងតួនាទីរបស់កម្ពុជាក្នុងការជំរុញសិទ្ធិមនុស្សក្នុងនាមជាប្រធានអាស៊ានផងដែរ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់ The Cambodia Daily នៅថ្ងៃទី១៦ សីហា នេះថា ការរិះគន់របស់អង្គការសង្គមស៊ីវិល សកម្មជននយោបាយ សកម្មជនសង្គមនានាក្នុងរយៈពេលកន្លងមក គឺសុទ្ធសឹងតែរិះគន់ដើម្បីស្ថាបនាទៅតាមតួនាទីរបស់ពួកគេរៀងៗខ្លួនលើការដឹកនាំរបស់រដ្ឋាភិបាលដែលមិនត្រឹមត្រូវប៉ុណ្ណោះ គ្មានបំណងអុចអាលឱ្យមានការស្អប់ណាមួយនោះឡើយ។
លោក ស៊ឹង សែនករុណា លើកឡើងថា ការរិះគន់ដោយការស្អប់ និងហិង្សា គឺតែងតែកើតចេញមកពីអ្នកគាំទ្របក្សកាន់អំណាចរហូតមក ប៉ុន្តែមិនដែលមានចំណាត់ការផ្លូវច្បាប់ទៅលើអ្នកទាំងនោះឡើយ។ ផ្ទុយទៅវិញ អ្នកគាំទ្រគណបក្សផ្សេងដែលគ្រាន់តែរិះគន់ចំណុចអវិជ្ជមានរបស់រដ្ឋាភិបាលដោយគ្រាន់តែប្រើពាក្យសម្ដី បែរជាទទួលរងនូវការធ្វើទុក្ខបុកម្នេញតាមផ្លូវច្បាប់គ្រប់បែបយ៉ាងទៅវិញ។
មន្ត្រីសង្គមស៊ីវិលរូបនេះបញ្ជាក់ថា ដោយសារតែមានការអនុវត្តច្បាប់មិនមានតម្លាភាពបែបនេះហើយ បានជាមានការរិះគន់ពីមជ្ឈដ្ឋានជាតិ និងអន្តរជាតិកន្លងមកថា កម្ពុជាបានអនុវត្តច្បាប់ដែលមានលក្ខណៈស្តង់ដារពីរ ដែលធ្វើឱ្យប្រព័ន្ធយុត្តិធម៌របស់ខ្លួនធ្លាក់ចុះរហូតទៅក្នុងចំណាត់ថ្នាក់លេខ១៣៨ ក្នុងចំណោមប្រទេស១៣៩ ដែលមាននីតិរដ្ឋអាក្រក់បំផុតក្នុងការមិនធានាបាននូវការអនុវត្តច្បាប់ឱ្យបានត្រឹមត្រូវ។
អង្គការឃ្លាំមើលសេរីភាពពិភពលោកដែលមានមូលដ្ឋានក្នុងរដ្ឋធានី Washington សហរដ្ឋអាមេរិក Freedom House បានចេញរបាយការណ៍របស់ខ្លួនសម្រាប់ឆ្នាំ២០២២ នេះថា ប្រព័ន្ធនយោបាយរបស់កម្ពុជាត្រូវបានលោក ហ៊ុន សែន និងគណបក្សប្រជាជនកម្ពុជាគ្រប់គ្រងអស់រយៈពេលជាងបីទសវត្សហើយ ខណៈគណបក្សប្រឆាំង បណ្ដាញសារព័ត៌មានឯករាជ្យ និងអ្នកតវ៉ាទាមទារសិទ្ធិសេរីភាព រងនូវការធ្វើទុក្ខបុកម្នេញជាប្រចាំ ដោយការបំភិតបំភ័យ ការកាត់ទោសក្រោមហេតុផលនយោបាយ និងអំពើហិង្សា ដែលធ្វើឱ្យពលរដ្ឋខ្មែររស់នៅក្នុងបរិយាកាសនៃការគាបសង្កត់ និងការភ័យខ្លាចយ៉ាងខ្លាំងក្នុងពេលបច្ចុប្បន្ននេះ៕