សាលាឧទ្ធរណ៍រាជធានីភ្នំពេញតម្កល់សេចក្ដីសម្រេចរបស់តុលាការថ្នាក់ក្រោមទុកជាបានការដដែល ដោយឲ្យសកម្មជនសង្គម និងសិទ្ធិមនុស្ស ៧នាក់ ព្រមទាំងមន្ត្រីអតីតបក្សប្រឆាំងជាប់ពន្ធនាគារម្នាក់ៗ ២០ខែ និងទោសនៅសល់ត្រូវព្យួរសាកល្បងរយៈពេល ២ឆ្នាំ។
ប្រធានក្រុមប្រឹក្សាជំនុំជម្រះសាលាឧទ្ធរណ៍រាជធានីភ្នំពេញ កាលពីរសៀលថ្ងៃចន្ទ នេះ បានប្រកាសសាលដីកាដោយតម្កល់សេចក្ដីសម្រេចរបស់សាលាដំបូងរាជធានីភ្នំពេញទុកជាបានការដដែល។
ការសម្រេចបែបនេះ ដោយប្រធានក្រុមប្រឹក្សាជំនុំជម្រះសំអាងថា ការសម្រេចរបស់សាលាដំបូងរាជធានីភ្នំពេញកាលពីថ្ងៃទី២៦ ខែតុលា ឆ្នាំ២០២១ កន្លងទៅ ដោយផ្ដន្ទាទោសលើសកម្មជនសង្គម សិទ្ធិមនុស្ស និងអ្នកនយោបាយបក្សប្រឆាំងជារឿងត្រឹមត្រូវ។
សកម្មជនសង្គម និងសិទ្ធិមនុស្សដែលត្រូវតុលាការកាត់ទោសកាលពីឆ្នាំ២០២១ ក្នុងនោះយុវជនខ្មែរថាវរៈ លោក ថា ឡាវី កញ្ញា អេង ម៉ាឡៃ លោក កើត សារ៉ាយ កញ្ញា ឈឿន ដារ៉ាវី និងលោក ហ៊ុន វណ្ណៈ និងសមាជិកសមាគមសម្ព័ន្ធនិស្សិតបញ្ញវន្តខ្មែរ រួមមានលោក មាន ព្រហ្មមុនី និងលោក មួង សុភ័ក្ត្រ ដែលពួកគេត្រូវបានសមត្ថកិច្ចចាប់ខ្លួនកាលពីអំឡុងខែសីហា និងខែកញ្ញា ឆ្នាំ២០២០ ដោយតុលាការចោទប្រកាន់ពីបទ «ញុះញង់ឱ្យមានភាពវឹកវរដល់សន្តិសុខសង្គម»។
ការចោទប្រកាន់របស់តុលាការ ធ្វើឡើងបន្ទាប់ពីពួកគេបានចូលរួមតវ៉ាទាមទារឱ្យដោះលែងមេដឹកនាំសហជីព លោក រ៉ុង ឈុន នៅទីលានប្រជាធិបតេយ្យកាលពីអំឡុងខែសីហា និងខែកញ្ញា ឆ្នាំ២០២០។
នៅថ្ងៃទី២៦ ខែតុលា ឆ្នាំ២០២១ សាលាដំបូងរាជធានីភ្នំពេញបានកាត់ទោសឱ្យយុវជនខ្មែរថាវរៈ និងសមាគមសម្ព័ន្ធនិស្សិតបញ្ញវន្តខ្មែរ ដាក់ពន្ធនាគារម្នាក់ៗ ២០ខែ និងពិន័យជាប្រាក់ចំនួន ២លានរៀល ប៉ុន្តែតុលាការបានបង្គាប់ឱ្យពួកគេអនុវត្តទោសក្នុងពន្ធនាគារជាង ១ឆ្នាំ ខណៈទោសដែលនៅសល់ត្រូវបានព្យួរសាកល្បងរយៈពេល ២ឆ្នាំ។ ពួកគេត្រូវបានសមត្ថកិច្ចដោះលែងកាលពីថ្ងៃទី១២ ខែវិច្ឆិកា ឆ្នាំ២០២១៕