25 C
Phnom Penh

ក្រសួង​បរិស្ថាន៖ ការ​ចោទ​ថា​ព្រៃឈើ​ខ្មែរ​កំពុង​បន្ត​រង​ការ​កាប់​បំផ្លាញ គឺជា​ចេតនា​បំផ្លាញ​មុខមាត់​កម្ពុជា​តែប៉ុណ្ណោះ

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​ក្រសួង​បរិស្ថាន បដិសេធ​ការ​ចោទប្រកាន់​ថា​ព្រៃឈើ​នៅ​កម្ពុជា​កំពុង​បន្ត​រង​នូវ​ការ​កាប់​បំផ្លាញ គឺជា​ចេតនា​បង្កប់​សារ​នយោបាយ​ដែល​លាប​ពណ៌ ដើម្បី​បំផ្លាញ​មុខមាត់​កម្ពុជា​របស់​ក្រុម​អ្នក​ស្រឡាញ់​ព្រៃឈើ​តែ​សម្បក​ក្រៅ​តែប៉ុណ្ណោះ ខណៈ​រដ្ឋាភិបាល​កម្ពុជា​កំពុង​ដាំ​ដើមឈើ​ស្តារ​ឡើងវិញ​នៅ​តាម​តំបន់​ដែល​មាន​ការ​រិចរិល។

អ្នក​នាំពាក្យ​ក្រសួង​បរិស្ថាន លោក នេត្រ ភក្ត្រា បាន​លើកឡើង​នៅ​ក្នុង​សន្និសីទ​សារព័ត៌មាន​ស្ដីពី​យុទ្ធនាការ​អន្ទាក់​សូន្យ នៅ​ក្នុង​តំបន់​ធនធាន​ធម្មជាតិ​កម្ពុជា​កន្លងមក​ថា អ្វី​ដែល​ពួកគេ​កំពុងតែ​និយាយ គឺជា​ការ​លាប​ពណ៌​មក​លើ​កម្ពុជា ជា​យុទ្ធនាការ​ដើម្បី​បំផ្លាញ​មុខមាត់​កម្ពុជា​ប៉ុណ្ណោះ។

លោក​ថា កម្ពុជា​បាន​ដឹង​ហើយ​ថា កម្ពុជា​មាន​ពីរ គឺ​កម្ពុជា​ពិត​ដែល​ពលរដ្ឋ​មើល​ឃើញ​ជាក់ស្តែង​សព្វថ្ងៃ​នេះ និង​កម្ពុជា​នៅ​លើ​បបូរ​មាត់​របស់​ក្រុម​ជនបរទេស​ខ្លះ និង​ក្រុម​ខ្លះ​ទៀត​ដែល​មិន​បាន​តម្កល់​ផល​ប្រយោជន៍​ជាតិ​ជា​ធំ។

លោក នេត្រ ភត្ត្រា អះអាង​ថា រដ្ឋាភិបាល​កម្ពុជា​កំពុង​ដាំ​ដើមឈើ​ស្ដារ​ឡើងវិញ​នៅ​តាម​តំបន់​ដែល​មាន​ការ​រិចរិល ដែល​នេះ​ជា​សក្ខីភាព​មួយ​បញ្ជាក់​យ៉ាង​ច្បាស់​ពី​កិច្ច​ខិតខំ​ប្រឹងប្រែង និង​ការ​តាំងចិត្ត​ខ្ពស់​របស់​កម្ពុជា ដើម្បី​រក្សា​ព្រៃឈើ និង​អភិរក្ស​ជីវចម្រុះ​នានា​សព្វថ្ងៃ​នេះ។

អ្នក​នាំពាក្យ​ក្រសួង​បរិស្ថាន​រូប​នេះ​បញ្ជាក់​ថា ការ​អភិរក្ស​ធនធាន​ធម្មជាតិ​របស់​រដ្ឋាភិបាល​កម្ពុជា​បច្ចុប្បន្ន​នេះ បាន​លើក​មុខមាត់​កម្ពុជា​លើ​ឆាក​អន្តរជាតិ​យ៉ាង​ខ្លាំង ដែល​ខុស​ស្រឡះ​ពី​ក្រុម​និយម​បរទេស​មួយ​ចំនួន​ដែល​តែងតែ​ដើរ​លាប​ពណ៌​បង្កប់​នូវ​សារ​នយោបាយ​ក្នុង​ចេតនា​បំផ្លាញ​កិត្តិយស​កម្ពុជា​លើ​ឆាក​អន្តរជាតិ ដោយ​មិន​បាន​តម្កល់​ផល​ប្រយោជន៍​រួម​សម្រាប់​មាតុភូមិ​របស់​ខ្លួន។

នៅ​ដើម​ខែ​កញ្ញា ឆ្នាំ​២០២២ នេះ ក្រសួង​បរិស្ថាន​បាន​បញ្ចេញ​របាយការណ៍​របស់​ខ្លួន​ថា ចាប់តាំងពី​ឆ្នាំ​១៩៩៣ មក ផ្ទៃដី​អភិរក្ស​របស់​កម្ពុជា​មាន​ត្រឹមតែ ៣​សែន ២​ម៉ឺន​ហិកតារ​ប៉ុណ្ណោះ ប៉ុន្តែ​មក​ដល់​ខែ​កញ្ញា ឆ្នាំ​២០២២ នេះ ផ្ទៃ​អភិរក្ស​ដែល​ស្ថិត​នៅ​ក្រោម​ការ​គ្រប់គ្រង​របស់​ក្រសួង​បរិស្ថាន បាន​កើនឡើង​ដល់ ៧​សែន ៣​ម៉ឺន​ហិកតារ​ឯណោះ។

របាយការណ៍​ដដែល​បញ្ជាក់​ថា តំបន់​ការពារ និង​អភិរក្ស​ធនធាន​ធម្មជាតិ​ក៏​មាន​ការ​កើនឡើង​ពី ២៣​តំបន់​រហូត​ដល់ ៧៦​តំបន់​ផង​ដែរ ដែល​នេះ​គឺជា​ការ​បង្ហាញ​ពី​ឆន្ទៈ​ដ៏​មោះមុត​របស់​រដ្ឋាភិបាល​កម្ពុជា​លើ​កិច្ចការពារ និង​អភិរក្ស​ធនធាន​ធម្មជាតិ​សព្វថ្ងៃ​នេះ។

ក្រសួង​បរិស្ថាន គូស​បញ្ជាក់​ថា បច្ចុប្បន្ន​នេះ​កម្ពុជា​មាន​ព្រៃឈើ ៤៦,៨៦​ភាគរយ​ដែល​មាន​ប្រមាណ ៨,៥​លាន​ហិកតារ ក្នុង​នោះ ៤១​ភាគរយ​ដែល​មាន​ប្រមាណ ៣,៧​លាន​ហិកតារ គឺជា​តំបន់​ដែល​ត្រូវ​បាន​កំណត់​ជា​តំបន់​អភិរក្ស រួម​មាន​ឧទ្យាន​ជាតិ ដែន​ជម្រក​សត្វព្រៃ តំបន់​ការពារ​ទេសភាព តំបន់​ប្រើប្រាស់​ច្រើន​យ៉ាង តំបន់​រ៉ាមសារ និង​តំបន់​ឧទ្យាន​ជាតិ​សមុទ្រ ជាដើម។

យ៉ាងណាក៏ដោយ អង្គការ​លើកលែង​ទោស​អន្តរជាតិ (Amnesty International) បាន​ចេញ​របាយការណ៍​មួយ​កាលពី​ថ្ងៃទី​២៨ ខែ​មករា ឆ្នាំ​២០២២ បាន​បង្ហាញ​ថា ព្រៃឈើ​កម្ពុជា​កំពុងតែ​ត្រូវ​រង​នូវ​ការ​កាប់​បំផ្លាញ​យ៉ាង​ធ្ងន់ធ្ងរ ក្នុង​នោះ​គេ​រក​ឃើញ​ថា ព្រៃឈើ​ចំនួន ៦២៧១​ហិកតារ​ត្រូវ​បាន​កាប់​បំផ្លាញ​នៅ​ក្នុង​ដែន​ជម្រក​សត្វព្រៃ​ចំនួន​ពីរ គឺ​ដែន​ជម្រក​សត្វព្រៃ​ព្រៃឡង់ និង​ដែន​ជម្រក​សត្វព្រៃ​ព្រះរការ ដោយ​ការ​កាប់​ឈើ​ខុស​ច្បាប់​យ៉ាង​ច្រើន​សន្ធឹកសន្ធាប់​ដែល​គ្មាន​ការ​ទប់ស្កាត់​ពី​អាជ្ញាធរ​មាន​សមត្ថកិច្ច​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស