កូដករណាហ្គាវើលដ៍ជាស្ត្រីបង្ហាញការខកចិត្តចំពោះក្រសួងកិច្ចការនារី ដែលបណ្ដោយឲ្យក្រុមសមត្ថកិច្ចប្រើប្រាស់អំពើហិង្សា និងបៀតបៀនលើពួកគេជាបន្តបន្ទាប់នៅពេលពួកគេចេញទាមទារឲ្យមានដំណោះស្រាយវិវាទការងារ។
កាលពីថ្ងៃទី១១ កញ្ញា តំណាងសហជីព និងកូដករណាហ្គាវើលដ៍ជាង ១៥០នាក់ បានយកញត្តិទៅដាក់នៅក្រសួងការងារ រួចហើយក៏បាននាំគ្នាដើរហែក្បួនពីក្រសួងការងារឆ្ពោះទៅកាន់ទីស្ដីការគណៈរដ្ឋមន្ត្រី ក្នុងបំណងដាក់ញត្តិបន្តទៀត ដើម្បីសុំកិច្ចអន្តរាគមន៍ពីលោក ហ៊ុន សែន ឲ្យជួយពន្លឿនការដោះស្រាយបញ្ចប់វិវាទការងារជាមួយក្រុមហ៊ុនណាហ្គាវើលដ៍។
អំឡុងពេលដែលពួកគេធ្វើដំណើរដោយថ្មើរជើងពីក្រសួងការងារឆ្ពោះទៅកាន់ទីស្ដីការគណៈរដ្ឋមន្ត្រីនោះ ក៏ត្រូវបានក្រុមសមត្ថកិច្ចចម្រុះជាច្រើន បានរារាំង រុញច្រាន បៀតបៀន និងបានប្រើប្រាស់អំពើហិង្សាលើស្ត្រីជាកូដករ។
ក្រុមកូដករដៃកាន់បដា បានលើកឡើងក្នុងអំឡុងពេលកងកម្លាំងចម្រុះចុះរារាំងថា នេះមិនមែនជាលើកទី១ នោះទេដែលសមត្ថកិច្ចបានបៀតបៀន និងប្រើអំពើហិង្សា ព្រមទាំងប្រមាថពួកគេជាស្ត្រី។ ពួកគេលើកឡើងថា អាជ្ញាធរមិនបានបំពេញតួនាទី និងកាតព្វកិច្ចការពារប្រជារាស្ត្រហើយ ថែមទាំងចេញមុខការពារថៅកែក្រុមហ៊ុនដែលបានរំលោភច្បាប់ការងារទៀត។
ការលើកឡើងរបស់ក្រុមកូដករនាពេលនេះ បន្ទាប់ពីស្ត្រីជាកូដករត្រូវបានសមត្ថកិច្ចវាយជិតភ្នែក និងបានទាញអាវ ខណៈអ្នកផ្សេងបានរងរបួសស្រាល ក្រោយប៉ះទង្គិចគ្នាជាមួយក្រុមសមត្ថកិច្ច និងកងសន្តិសុខខណ្ឌទួលគោករាប់សិបនាក់នៅចំណុចស្ពានអាកាសស្តុបតិចណូ។
ពួកគេបង្ហាញការខកចិត្តដែលរដ្ឋមន្ត្រីក្រសួងកិច្ចការនារី អ្នកស្រី អ៊ឹង កន្ថាផាវី មិនព្រមចេញអន្តរាគមន៍ចាត់វិធានការច្បាប់លើកងកម្លាំងសមត្ថកិច្ច និងក្រុមសណ្ដាប់ធ្នាប់រាជធានីភ្នំពេញដែលបានប្រើអំពើហិង្សា និងបៀតបៀនលើពួកគេ ទោះបីជាមានវីដេអូចែករំលែកលើបណ្ដាញសង្គមជាបន្តបន្ទាប់ក្ដី។ ពួកគេស្នើទៅលោកនាយករដ្ឋមន្ត្រី ហ៊ុន សែន ឲ្យជួយអន្តរាគមន៍ ដោយពួកគេបង្ហាញជំនឿថា វិវាទការងារនឹងមានដំណោះស្រាយបាន បើលោក ហ៊ុន សែន ចេញអន្តរាគមន៍នោះ។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា ថ្លែងថា ចាប់តាំងពីក្រុមកូដករណាហ្គាវើលដ៍ចេញធ្វើកូដកម្មរយៈពេលជិត ៩ខែកន្លងមកនេះ សមត្ថកិច្ចនិងសន្តិសុខតែងតែប្រើអំពើហិង្សាលើពួកគេជាហូរហែ ដោយអ្នកខ្លះរងរបួសធ្ងន់ ស្រាល សន្លប់ និងខ្លះទៀតត្រូវបានចាប់ដាក់ពន្ធនាគារ ជាដើម ខណៈជនបង្កមិនទាន់ឃើញមានវិធានការច្បាប់នៅឡើយ។
លោកជំរុញឲ្យរដ្ឋាភិបាល និងក្រសួងមហាផ្ទៃ ចាត់វិធានការច្បាប់ឱ្យបានតឹងរ៉ឹងទៅលើជនបង្កហិង្សាលើក្រុមកូដករណាហ្គាវើលដ៍ ដើម្បីលុបបំបាត់ការរំលោភសិទ្ធិមនុស្ស និងវប្បធម៌និទ្ទណ្ឌភាពនៅកម្ពុជា។
វិវាទការងារក្រុមហ៊ុនណាហ្គាវើលដ៍ បានកើតឡើងជាង ១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន ១៣២៩នាក់ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។
ទោះបីជាកម្ពុជាកំពុងជួបវិបត្តិកូវីដ-១៩ ក្ដី ប៉ុន្តែក្រុមហ៊ុនណាហ្គាវើលដ៍នៅក្នុងឆ្នាំ២០១៩ ក្រុមហ៊ុនល្បែងស៊ីសងប្រចាំទីក្រុងភ្នំពេញមួយនេះទទួលបានប្រាក់ចំណេញកើនឡើងជិតដល់ ៣២១,២លានដុល្លារក្នុងរយៈពេល ៣ខែដំបូងក្នុងឆ្នាំ២០១៩ ដែលបានកើនឡើង ៣២% បើធៀបនឹងរយៈពេលដូចគ្នាកាលពីឆ្នាំ២០១៨។ ចំណែកនៅដើមឆ្នាំ២០២១ កន្លងទៅ ក្រុមហ៊ុននេះទទួលបានប្រាក់ចំណេញសុទ្ធចំនួនជាង ១២០លានដុល្លារ។
ក្រោយពីបញ្ឈប់តំណាង និងសមាជិកសហជីព ក្រុមបុគ្គលិកបាននាំគ្នាចេញធ្វើកូដកម្មជិត ៩ខែមកនេះ ដើម្បីទាមទារឲ្យថៅកែក្រុមហ៊ុនល្បែងទទួលយកសហជីពចូលធ្វើការងារ និងទម្លាក់បទចោទប្រកាន់លើតំណាងសហជីពទាំងអស់ផងដែរ។
ក្រុមកូដករអះអាងថា ការបញ្ឈប់នោះដោយថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះតែម្តង បើទោះបីជាច្បាប់តម្រូវឱ្យមានសហជីពក្នុងក្រុមហ៊ុនយ៉ាងណាក្តី៕