ក្រសួងការងារកម្ពុជា បានកំណត់ជាផ្លូវការស្ដីពីការកំណត់ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប ចំនួន ២០០ដុល្លារអាមេរិកក្នុងមួយខែសម្រាប់ឆ្នាំ២០២៣ បន្ទាប់ពីប្រមុខរដ្ឋាភិបាលកម្ពុជា លោក ហ៊ុន សែន បន្ថែម ២ដុល្លារ។
ក្រសួងការងារ និងបណ្ដុះបណ្ដាលវិជ្ជាជីវៈ បានចេញប្រកាសព័ត៌មាននៅថ្ងៃទី២១ ខែកញ្ញា ឆ្នាំ២០២២ នេះថា ចាប់ពីថ្ងៃទី១ ខែមករា ឆ្នាំ២០២៣ តទៅ កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូបដែលពេញសិទ្ធិ នឹងមានប្រាក់ឈ្នួលអប្បបរមាចំនួន ២០០ដុល្លារអាមេរិកក្នុងមួយខែ ដោយឡែកកម្មករនិយោជិតសាកល្បង នឹងទទួលបានត្រឹមតែ ១៩៨ដុល្លារអាមេរិកប៉ុណ្ណោះ។
ប្រភពដដែលអះអាងថា ប្រាក់អត្ថប្រយោជន៍ផ្សេងទៀតដែលកម្មករនិយោជិតធ្លាប់ទទួលបានកន្លងមក ត្រូវបានរក្សាទុកនៅដដែល មានដូចជាប្រាក់សោហ៊ុយធ្វើដំណើរ និងស្នាក់នៅចំនួន ៧ដុល្លារអាមេរិកក្នុងមួយខែ និងប្រាក់រង្វាន់ធ្វើការទៀងទាត់ចំនួន ១០ដុល្លារអាមេរិកក្នុងមួយខែ ជាដើម។
ក្រសួងបញ្ជាក់ថា ប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្តចំនួន ២ពាន់រៀលក្នុងមួយថ្ងៃ ឬការទទួលបានបាយមួយពេលដោយឥតគិតថ្លៃ និងប្រាក់រង្វាន់អតីតភាពការងារចាប់ពី ២ដុល្លារដល់ ១១ដុល្លារអាមេរិកក្នុងមួយខែសម្រាប់កម្មករនិយោជិតដែលបានធ្វើការចាប់ពីឆ្នាំទី២ ដល់ឆ្នាំទី១១ ជាដើម នឹងបន្តទទួលបានដដែល ដូច្នេះជាមធ្យម កម្មករនិយោជិតម្នាក់ៗនឹងទទួលបានប្រាក់បៀវត្សរ៍យ៉ាងតិចចំនួនពី ២១៧ដុល្លាររហូតដល់ ២២៨ដុល្លារអាមេរិកឯណោះក្នុងមួយខែៗ។
នៅថ្ងៃទី២១ ខែកញ្ញា ឆ្នាំ២០២២ នេះ ក្រុមប្រឹក្សាជាតិប្រាក់ឈ្នួលអប្បបរមា បានបើកកិច្ចប្រជុំស្ដីពីការកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ក្នុងនោះ ភាគីកម្មករនិយោជិតបានកំណត់យកតួលេខចំនួន ៣ផ្សេងគ្នា គឺតួលេខ ២០៦ដុល្លារ ២១០ដុល្លារ និង ២១៣ដុល្លារអាមេរិក ប៉ុន្តែភាគីថៅកែរោងចក្រ និងភាគីរដ្ឋាភិបាលបានកំណត់យកតួលេខ ១៩៨ដុល្លារអាមេរិកដូចគ្នា។
ប្រភពដដែលបញ្ជាក់ថា កិច្ចប្រជុំនេះបានសម្រេចបោះឆ្នោតដោយសម្ងាត់ ក្នុងនោះតួលេខ ១៩៨ដុល្លារអាមេរិកទទួលបាន ៤៦សំឡេងលើ ៥១សំឡេង ខណៈតួលេខ ២១៣ដុល្លារទទួលបានតែ ៥សំឡេងប៉ុណ្ណោះ ដោយឡែកតួលេខផ្សេងទៀតមិនទទួលបានសំឡេងគាំទ្រនោះទេ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានសរសេរលើគណនីហ្វេសប៊ុករបស់លោកនៅថ្ងៃទី២១ កញ្ញា នេះថា ការបង្កើតសហជីព គឺដើម្បីជួយការពារសិទ្ធិ និងជួយរកផលប្រយោជន៍ឱ្យកម្មករនិយោជិត ប៉ុន្តែបើមើលលទ្ធផលសំឡេងឆ្នោតបោះគាំទ្រនៅពេលនេះ គឺមានតែ ៥សំឡេងប៉ុណ្ណោះដែលគិតពីប្រយោជន៍របស់កម្មករនិយោជិតស្ដីពីប្រាក់ឈ្នួលអប្បបរមាលើតួលេខ ២១៣ដុល្លារអាមេរិក។
លោក ស៊ឹង សែនករុណា ត្អូញត្អែរថា ដោយឡែកសំឡេងដែលគាំទ្រថៅកែរោងចក្រដែលកំណត់ប្រាក់ឈ្នួលអប្បបរមា ១៩៨ដុល្លារអាមេរិកវិញនោះ គឺមានរហូតដល់ទៅ ៤៦សំឡេងឯណោះក្នុងចំណោមសំឡេងសរុប ៥១នាក់នៃអង្គបោះឆ្នោត។ ដូច្នេះ តាមលទ្ធផលនេះ អាចបញ្ជាក់ថា តំណាងភាគីកម្មករនិយោជិតដែលជាសហជីព ភាគច្រើនការពារផលប្រយោជន៍របស់ថៅកែក្រុមហ៊ុន ជាជាងការពារផលប្រយោជន៍របស់កម្មករសព្វថ្ងៃនេះ។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា ដើម្បីឱ្យកម្មករនិយោជិតទទួលបានប្រាក់ឈ្នួលសមរម្យអាចធានាជីវភាពរស់នៅប្រចាំថ្ងៃបានល្អ ទាល់តែពួកគេអាចទទួលបានប្រាក់ឈ្នួលគោលយ៉ាងហោចណាស់ចំនួន ២៥០ដុល្លារក្នុងមួយខែ ក្នុងនោះរដ្ឋាភិបាលក៏ត្រូវទប់ស្កាត់ការឡើងថ្លៃទំនិញលើទីផ្សារថែមទៀត ដូចជាការឡើងថ្លៃសាំងដូចពេលនេះ ជាដើម៕