បុរសខ្លាំងកម្ពុជា លោក ហ៊ុន សែន អះអាងថា រដ្ឋធម្មនុញ្ញកម្ពុជាបានចែងយ៉ាងច្បាស់អំពីគោលការណ៍នៃការបែងចែកអំណាចកំពូលទាំងបីដាច់ដោយឡែកពីគ្នា គឺអំណាចនីតិប្រតិបត្តិ មានរដ្ឋាភិបាល អំណាចនីតិប្បញ្ញត្តិ មានរដ្ឋសភា និងអំណាចតុលាការផងដែរ ហើយរដ្ឋធម្មនុញ្ញក៏ត្រូវបានចាត់ទុកជាច្បាប់កំពូលរបស់កម្ពុជាយ៉ាងរឹងមាំថែមទៀត។
មេដឹកនាំប្រើអំណាចរំលោភរដ្ឋធម្មនុញ្ញនៃប្រទេសរបស់ខ្លួនរូបនេះ បានអះអាងក្នុងខួបលើកទី២៩ឆ្នាំដែលកម្ពុជាបានប្រកាសឱ្យប្រើប្រាស់រដ្ឋធម្មនុញ្ញជាផ្លូវការ កាលពីចុងសប្តាហ៍កន្លងទៅថា ច្បាប់ និងសេចក្តីសម្រេចទាំងឡាយនៃស្ថាប័ននានារបស់រដ្ឋ ត្រូវតែស្របទៅនឹងរដ្ឋធម្មនុញ្ញជាដាច់ខាត ក្នុងនោះ រដ្ឋធម្មនុញ្ញក៏បានអនុម័តនូវសិទ្ធិជាមូលដ្ឋានរបស់ពលរដ្ឋ និងគោលការណ៍នីតិរដ្ឋផងដែរ។
លោកបន្ថែមថា កម្ពុជាបានប្ដេជ្ញាគោរពដាច់ខាតនូវរបបរាជានិយមអាស្រ័យរដ្ឋធម្មនុញ្ញ និងរបបប្រជាធិបតេយ្យសេរីពហុបក្សដោយឥតងាករេ។
លោក ហ៊ុន សែន រំលឹកថា នៅក្នុងមហាប្រាសាទទេវាវិនិច្ឆ័យក្នុងព្រះបរមរាជវាំង ព្រះករុណាព្រះបាទ សម្តេចព្រះ នរោត្តម សីហនុ បានឡាយព្រះហស្តលេខាលើព្រះរាជក្រមប្រកាសឱ្យប្រើរដ្ឋធម្មនុញ្ញរបស់កម្ពុជាជាផ្លូវការ កាលពីថ្ងៃទី២៤ ខែកញ្ញា ឆ្នាំ១៩៩៣ កន្លងទៅ ដូច្នេះគិតមកទល់នឹងឆ្នាំ២០២២ នេះ រដ្ឋធម្មនុញ្ញកម្ពុជាមានអាយុកាល ២៩ឆ្នាំហើយ។
ការអះអាងរបស់ប្រមុខរដ្ឋាភិបាលកម្ពុជា លោក ហ៊ុន សែន នេះ ធ្វើឡើងស្របពេលដែលមជ្ឈដ្ឋានជាតិ និងអន្តរជាតិកំពុងថ្កោលទោសមេដឹកនាំរូបនេះយ៉ាងធ្ងន់ធ្ងរអំពីការរំលោភរដ្ឋធម្មនុញ្ញរបស់ខ្លួននាពេលកន្លងមក។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី២៦ កញ្ញា នេះថា ស្មារតីដើមនៃការបង្កើតរដ្ឋធម្មនុញ្ញ គឺដើម្បីធានានូវភាពជាម្ចាស់របស់ពលរដ្ឋខ្មែរលើវាសនារបស់កម្ពុជាផង ដើម្បីបញ្ចប់ជម្លោះផ្ទៃក្នុងផង និងដើម្បីធានានូវការអនុវត្តច្បាប់នានាដោយអព្យាក្រឹតផង ដែលជាគោលការណ៍គ្រឹះមួយសម្រាប់ធានានូវសុខសន្តិភាពរបស់កម្ពុជាឱ្យបានយូរអង្វែង។
លោក ស៊ឹង សែនករុណា ត្អូញត្អែរថា ពិតមែនតែខ្លឹមសារក្នុងរដ្ឋធម្មនុញ្ញបានចែងច្បាស់ពីគោលការណ៍អំណាចរបស់ស្ថាប័នកំពូលៗរបស់កម្ពុជា ដើម្បីឱ្យការអនុវត្តច្បាប់ប្រកបដោយយុត្តិធម៌ដែលនឹងនាំមកនូវសុភមង្គលសម្រាប់ពលរដ្ឋខ្មែរ ប៉ុន្តែការអនុវត្តជាក់ស្តែងរបស់រដ្ឋាភិបាលកម្ពុជា ត្រូវគេមើលឃើញថាបានរំលោភទៅលើអំណាចនីតិប្រតិបត្តិ អំណាចនីតិប្បញ្ញត្តិ និងអំណាចតុលាការ ក្រោយរដ្ឋធម្មនុញ្ញដែលត្រូវបានធ្វើវិសោធនកម្មជាច្រើនលើកច្រើនសាចាប់តាំងពីឆ្នាំ១៩៩៤ មក ក្នុងនោះក៏បានធ្វើឱ្យបាត់បង់នូវសិទ្ធិមូលដ្ឋានរបស់ពលរដ្ឋយ៉ាងធ្ងន់ធ្ងរផងដែរ។
មន្ត្រីជាន់ខ្ពស់សមាគមការពារសិទ្ធិមនុស្សរូបនេះ អំពាវនាវឱ្យមេដឹកនាំនយោបាយគ្រប់និន្នាការទាំងអស់ នាំគ្នាការពារខ្លឹមសារដើមនៃរដ្ឋធម្មនុញ្ញរបស់ខ្លួនឱ្យបានដូចដើមឡើងវិញ ព្រោះថាវត្ថុបំណងរួមគ្រប់ភាគីដែលបានបង្កើតច្បាប់កំពូលនេះឡើង មិនមែនដើម្បីឱ្យគណបក្សណាមួយដឹកនាំកម្ពុជាដោយផ្តាច់មុខនោះទេ គឺត្រូវចេះសហការគ្នាធ្វើការក្នុងរដ្ឋសភាជាតិ ដើម្បីប្រយោជន៍ជាតិ និងប្រជាជន និងដើម្បីកុំឱ្យមានវិបត្តិនយោបាយដូចសព្វថ្ងៃនេះ ជាដើម។
រដ្ឋធម្មនុញ្ញកម្ពុជាបានបង្កើតឡើងកាលពីថ្ងៃទី២៤ ខែកញ្ញា ឆ្នាំ១៩៩៣ ដែលឡាយព្រះហស្ដលេខាឲ្យប្រើប្រាស់ជាផ្លូវការដោយព្រះបាទ នរោត្តម សីហនុ ដែលបានផ្ដួចផ្ដើមឡើងក្នុងកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១។
គិតតាំងពីឆ្នាំ១៩៩៤ មក រដ្ឋធម្មនុញ្ញកម្ពុជា ត្រូវបានធ្វើវិសោធនកម្ម ឬកែប្រែចំនួន ១០លើករួចមកហើយ ប៉ុន្តែត្រូវគេរិះគន់ថា ការធ្វើវិសោធនកម្មកន្លងមកនោះសុទ្ធសឹងតែដើម្បីការកេងចំណេញផលប្រយោជន៍របស់បក្សកាន់អំណាចទាំងអស់៕