29 C
Phnom Penh

អ្នក​ឃ្លាំមើល៖ ភាព​អនាធិបតេយ្យ​នៃ​អំពើ​អយុត្តិធម៌​បញ្ជាក់​ថា​កម្ពុជា​ជា​ប្រទេស​គ្មាន​សន្តិភាព

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​សង្គម ព្រមាន​ថា កម្ពុជា​គឺជា​ប្រទេស​ដែល​គ្មាន​សន្តិភាព ដោយសារតែ​ប្រទេស​ក្រីក្រ​មួយ​នេះ​ញាំញី​ទៅ​ដោយ​អំពើ​អយុត្តិធម៌ និង​អំពើ​ជួញដូរ​មនុស្ស និង​អំពើ​ឃាតកម្ម​ជាច្រើន។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃទី​៣ ខែ​តុលា ថា ជា​រឿង​គួរ​ឱ្យ​អាម៉ាស់​បំផុត​ដែល​កម្ពុជា​បាន​ធ្លាក់​ចូល​ទៅ​ក្នុង​បញ្ជី​ប្រផេះ និង​ជាប់​ចំណាត់ថ្នាក់​លេខ​៣ ដ៏​អាក្រក់​ក្នុង​ចំណោម​ប្រទេស​ដែល​លាង​លុយ​កខ្វក់ និង​ប្រព្រឹត្ត​អំពើ​ជួញដូរ​មនុស្ស​ធ្ងន់ធ្ងរ ដែល​តម្រូវ​ឱ្យ​មាន​ការ​តាមដាន​កាន់តែ​ខ្លាំង​ក្នុង​ឆ្នាំ​២០២២ នេះ ប៉ុន្តែ​បុរស​ខ្លាំង​កម្ពុជា លោក ហ៊ុន សែន បែរ​អួតអាង​ថា កម្ពុជា​មាន​សន្តិភាព​ក្រោម​ការ​ដឹកនាំ​របស់​លោក​ទៅវិញ។

លោក គឹម សុខ លើកឡើង​ថា កេរ្តិ៍​ឈ្មោះ​របស់​កម្ពុជា​តាមរយៈ​នៃ​ការ​រក​ឃើញ​ថា​ជា​ទីតាំង​សម្រាប់​លាង​លុយ​កខ្វក់ ជា​កន្លែង​ជួញដូរ​មនុស្ស កន្លែង​ប្រព្រឹត្ត​ល្បែង​ខុស​ច្បាប់ និង​ជា​កន្លែង​ប្រព្រឹត្ត​អំពើ​ឃាតកម្ម​យ៉ាង​អនាធិបតេយ្យ​សព្វថ្ងៃ​នេះ ត្រូវ​គេ​ចាត់​ចូល​ក្នុង​ប្រទេស​ដែល​មាន​ហានិភ័យ​ខ្ពស់​បំផុត ជាពិសេស​ផ្នែក​ខាង​អំពើ​អយុត្តិធម៌ និង​អសន្តិសុខ​សង្គម​នៅ​លើ​ឆាក​អន្តរជាតិ។

លោក​បន្ត​ថា សព្វថ្ងៃ​នេះ កម្ពុជា​មិនមែន​ជា​ប្រទេស​ដែល​ពោរពេញ​ទៅ​ដោយ​សន្តិភាព និង​សុភមង្គល​ដូច​ការ​អះអាង​របស់​បុរស​ខ្លាំង លោក ហ៊ុន សែន នោះ​ឡើយ។

ប្រធាន​វេទិកា​ពលរដ្ឋ​រូប​នេះ​បញ្ជាក់​ថា ក្រោម​ការ​ដឹកនាំ​របស់​លោក ហ៊ុន សែន កម្ពុជា​មិន​ត្រឹមតែ​គ្មាន​សន្តិភាព​ក្នុង​ជំនាន់​ដឹកនាំ​របស់​គាត់​នោះ​ទេ គឺ​កម្ពុជា​នឹង​បន្ត​នៅ​ក្រោម​ការ​ដឹកនាំ​ដែល​កាន់តែ​អាក្រក់​ជាង​នេះ​ទៀត​នៅ​ក្នុង​ការ​ដឹកនាំ​របស់​លោក ហ៊ុន ម៉ាណែត ទៅ​ថ្ងៃ​មុខ​បន្ថែម​ទៀត ប្រសិនបើ​គ្មាន​ការ​ងើប​ឡើង​តវ៉ា​ទៅ​នឹង​ការ​ដឹកនាំ​ផ្ដាច់មុខ​របស់​គ្រួសារ​ត្រកូល «ហ៊ុន» ទេ​នោះ។

ចំណែក​ប្រធាន​កម្មវិធី​សុចរិតភាព​ធុរកិច្ច និង​ធនធាន​រ៉ែ​នៃ​អង្គការ​តម្លាភាព​កម្ពុជា លោក តុង សុប្រាជ្ញ បាន​លើកឡើង​ក្នុង​កម្មវិធី​នេះ​ដែរ​ថា សន្តិភាព​ពិតប្រាកដ​គឺ​សំដៅ​ដល់​សេចក្តី​សុខ​ផ្លូវកាយ និង​ផ្លូវចិត្ត​របស់​ពលរដ្ឋ។

លោក​បន្ត​ថា ការ​ដឹកនាំ​របស់​រដ្ឋាភិបាល​សព្វថ្ងៃ​នេះ​ត្រូវ​គេ​មើល​ថា ពោរពេញ​ទៅ​ដោយ​ការ​គំរាមកំហែង ហើយ​ការ​រស់នៅ​របស់​ពលរដ្ឋ​ពោរពេញ​ដោយ​ការ​ភ័យខ្លាច ហើយ​ការ​ដឹកនាំ​បែប​នេះ​មិន​ត្រូវ​បាន​ចាត់ទុក​ថា​មាន​សន្តិភាព​ពេញលេញ​នោះ​ទេ។

លោក តុង សុប្រាជ្ញ បញ្ជាក់​ថា នៅ​ពេល​ដែល​កម្ពុជា​ត្រូវ​បាន​គេ​ចាត់​ចូល​ទៅ​ក្នុង​ចំណោម​ប្រទេស​លាង​លុយ​កខ្វក់ និង​ជួញដូរ​មនុស្ស​ដូច​សព្វថ្ងៃ​នេះ គេ​មិន​ត្រឹមតែ​ចាត់ទុក​កម្ពុជា​ជា​ប្រទេស​ដែល​គ្មាន​សន្តិភាព​នោះ​ទេ ប៉ុន្តែ​កម្ពុជា​នឹង​រង​នូវ​ផល​ប៉ះពាល់​ផ្នែក​សេដ្ឋកិច្ច​ជាតិ​ធ្ងន់ធ្ងរ​ទៅ​ថ្ងៃ​មុខ​ថែម​ទៀត ដោយសារតែ​រដ្ឋាភិបាល​បណ្តែតបណ្តោយ​ឱ្យ​មាន​ការ​ធ្វើ​ចរាចរណ៍​លុយ​ខ្មៅ​នៅ​ក្នុង​ប្រទេស​របស់​ខ្លួន​សព្វថ្ងៃ​នេះ។

កាលពី​ថ្ងៃទី​២៩ ខែ​កញ្ញា ឆ្នាំ​២០២២ បុរស​ខ្លាំង​កម្ពុជា​ឧស្សាហ៍​ប្រើ​កណ្ដាប់ដៃ​ដែក លោក ហ៊ុន សែន បាន​លើកឡើង​ក្នុង​វេទិកា​ជាតិ​អន្តរ​សាសនា​ប្រឆាំង​ការ​ជួញដូរ​មនុស្ស​លើក​ទី​៦ ថា ការ​ជួញដូរ​មនុស្ស​ដែល​កំពុង​កើតមាន​នៅ​កម្ពុជា​សព្វថ្ងៃ​នេះ គឺ​ដោយសារតែ​កម្ពុជា​មាន​សន្តិភាព ទើប​អ្នក​ទាំងនោះ​នាំគ្នា​សម្រុក​ចូល​ទៅ​កម្ពុជា​បែប​នេះ។

បន្ថែម​ពី​នេះ កាលពី​ចុង​ឆ្នាំ​២០២១ លោក ហ៊ុន សែន ធ្លាប់​បាន​ព្រមាន​ថា ទោះ​ត្រូវ​លះបង់​ក្នុង​តម្លៃ​ណា​ក៏ដោយ ក៏​លោក​ត្រូវតែ​ការពារ​ឯករាជ្យ សន្តិភាព​ឱ្យ​បាន​លុះ​ដល់​ជីវិត​ចុងក្រោយ ក្នុង​នោះ លោក ហ៊ុន សែន បញ្ជាក់​ថា ទោះ​ត្រូវ​កម្ទេច​ក្រុម​ប្រឆាំង​ឲ្យ​អស់​ចាប់ពី ១០០ ទៅ ២០០​នាក់​ក៏ដោយ ប្រសិនបើ​ពួកគេ​បំផ្លាញ​សន្តិភាព​ដែល​លោក​ខំ​កសាង​ឡើង​ដោយ​លំបាក​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស