32 C
Phnom Penh

សង្គម​ស៊ីវិល​ស្វាគមន៍​រដ្ឋាភិបាល​បន្ត​ឧបត្ថម្ភ​ប្រាក់​ដល់​ពលរដ្ឋ​ក្រីក្រ បើ​មិន​កេង​ចំណេញ​នយោបាយ

ដោយ ឌឹ ខេមបូឌា ដេលី

បទវិភាគ

សង្គម​ស៊ីវិល​ស្វាគមន៍​រដ្ឋាភិបាល​កម្ពុជា​ដែល​បន្ត​ឧបត្ថម្ភ​សាច់ប្រាក់​ដល់​ពលរដ្ឋ​ដែល​រងគ្រោះ​ដោយ​កូវីដ-១៩ និង​ពលរដ្ឋ​ក្រីក្រ ប្រសិនបើ​ការ​ជួយ​នោះ​ធ្វើឡើង​ដោយ​មិន​ឆ្លៀត​ឱកាស​កេង​ចំណេញ​នយោបាយ។

អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា បាន​ប្រាប់​សារព័ត៌មាន The Cambodia Daily នៅ​ថ្ងៃទី​៦ តុលា នេះ​ថា វិបត្តិ​សេដ្ឋកិច្ច​របស់​ពលរដ្ឋ​ដែល​រងគ្រោះ​ដោយសារ​ជំងឺ​កូវីដ-១៩ គឺជា​រឿង​ចាំបាច់​ណាស់​ដែល​រដ្ឋាភិបាល​ត្រូវ​យកចិត្ត​ទុកដាក់ និង​ដោះស្រាយ​ឲ្យ​បាន​ទាន់​ពេលវេលា។ ដោយឡែក​ការ​ផ្តល់​នូវ​ការ​ឧបត្ថម្ភ​របស់​រដ្ឋាភិបាល​លើ​ការ​ដោះស្រាយ​បញ្ហា​នេះ សង្គម​ស៊ីវិល​ក៏​មាន​ការ​តាមដាន ត្រួតពិនិត្យ និង​វាយតម្លៃ​តាមរយៈ​ភស្តុតាង​ដែល​ខ្លួន​ទទួល​បាន​ច្បាស់លាស់​ដែរ មិនមែន​អង្គការ​ក្រៅ​រដ្ឋាភិបាល​ចេះ​តែ​រិះគន់​ដោយ​គ្មាន​មូលដ្ឋាន​ត្រឹមត្រូវ​នោះ​ទេ។

មន្ត្រី​សង្គម​ស៊ីវិល​រូប​នេះ​លើកឡើង​ថា លោក​អំពាវនាវ​ឲ្យ​រដ្ឋាភិបាល​បំពេញ​កាតព្វកិច្ច​របស់​ខ្លួន​ឲ្យ​បាន​ល្អ​ចំពោះ​ពលរដ្ឋ​ដូច​អ្វី​ដែល​ខ្លួន​បាន​អះអាង​បន្ត​ទៀត ព្រោះ​ថា​អង្គការ​សង្គម​ស៊ីវិល​នឹង​អបអរ​សាទរ​ជានិច្ច​ចំពោះ​សកម្មភាព​របស់​រដ្ឋាភិបាល ដែល​មាន​បំណង​ជួយ​ទៅ​ដល់​ពលរដ្ឋ​ដែល​កំពុង​ជួប​ការ​លំបាក​ដោយ​ពិតប្រាកដ។ ប៉ុន្តែ​អង្គការ​សង្គម​ស៊ីវិល​ឯករាជ្យ​ទាំងអស់ ក៏​នឹង​មិន​ស្វាគមន៍​ដែរ​នូវ​សកម្មភាព​ណា​មួយ​ដែល​បង្កប់​នូវ​ការ​កេង​ចំណេញ​នយោបាយ​ចំពោះ​ពលរដ្ឋ ជាពិសេស​ការ​ទាក់ទាញ​យក​សន្លឹកឆ្នោត​នៅ​មុន​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ ជាដើម។

នៅ​ថ្ងៃទី​៦ ខែ​តុលា ឆ្នាំ​២០២២ នេះ ប្រមុខ​រដ្ឋាភិបាល​កម្ពុជា លោក ហ៊ុន សែន បាន​លើកឡើង​ក្នុង​ពិធី​បើក​សន្និសីទ​ចក្ខុវិស័យ​ប្រទេស​កម្ពុជា​ឆ្នាំ​២០២២ ថា សូម​បណ្តា​បក្ស​នយោបាយ សង្គម​ស៊ីវិល យោគយល់​ចំពោះ​រាជរដ្ឋាភិបាល កុំ​ចាត់ទុក​ថា​ការ​ឧបត្ថម្ភ​សាច់ប្រាក់​ដល់​ប្រជាពលរដ្ឋ​ពី​សំណាក់​រដ្ឋាភិបាល គឺជា​ល្បែង​ដើម្បី​ទាញ​យក​សន្លឹកឆ្នោត​នៅ​ឆ្នាំ​២០២៣ ខាងមុខ​នេះ​ឲ្យ​សោះ។

ការ​អំពាវនាវ​របស់​ប្រមុខ​រដ្ឋាភិបាល​កម្ពុជា​បែប​នេះ ធ្វើឡើង​បន្ទាប់ពី​លោក ហ៊ុន សែន បាន​លើកឡើង​អំពី​ការ​ឧបត្ថម្ភ​សាច់ប្រាក់​ដល់​ពលរដ្ឋ​ដែល​រងគ្រោះ​ដោយ​កូវីដ-១៩ និង​ពលរដ្ឋ​ក្រីក្រ​កាលពី​ពេល​ថ្មីៗ​នេះ ក្នុង​នោះ​លោក​បាន​បញ្ជាក់​ថា ការ​ឧបត្ថម្ភ​សាច់ប្រាក់​នេះ​មិនមែន​ជា​បញ្ហា​លេង​សើច​សម្រាប់​អ្នក​នយោបាយ​នោះ​ទេ ប៉ុន្តែ​ជា​ការ​ទទួល​ខុសត្រូវ​ធំ​ណាស់​របស់​រដ្ឋាភិបាល​ចំពោះ​ប្រជាពលរដ្ឋ និង​ប្រទេស​ជាតិ។

ស្ថាបនិក​អង្គការ​អភិវឌ្ឍន៍​ផ្នត់គំនិត លោក សេក សុជាតិ បាន​ប្រាប់​សារព័ត៌មាន The Cambodia Daily នៅ​ថ្ងៃទី​៦ តុលា នេះ​ដែរ​ថា រាល់​សកម្មភាព​របស់​រដ្ឋាភិបាល​កន្លងមក តែងតែ​ត្រូវ​បាន​គេ​មើល​ឃើញ​ថា ធ្វើឡើង​ក្នុង​រូបភាព​កេង​ចំណេញ​នយោបាយ​ឲ្យ​បក្ស​កាន់​អំណាច​ជានិច្ច ជាពិសេស​រាល់​ពេល​មុន​ការ​បោះឆ្នោត​ឈាន​ចូល​មក​ដល់។

លោក​លើកឡើង​ថា រឿង​ដែល​រដ្ឋាភិបាល​ភ័យខ្លាច​ការ​រិះគន់​ថា​ខ្លួន​ធ្វើ​សកម្មភាព​ជួយ​ពលរដ្ឋ​ដើម្បី​ទាក់ទាញ​សន្លឹកឆ្នោត​មែន​ឬ​អត់​នោះ មិនមែន​ជា​រឿង​សំខាន់​នោះ​ទេ សំខាន់​គឺ​នៅ​ត្រង់​ថា តើ​សកម្មភាព​ដែល​រដ្ឋាភិបាល​បាន​ធ្វើ​នោះ​មាន​បំណង​ទាក់ទាញ​សន្លឹកឆ្នោត​មែន​ឬ​ក៏​អត់​ប៉ុណ្ណោះ ព្រោះ​ថា​ពលរដ្ឋ បក្ស​នយោបាយ និង​អង្គការ​សង្គម​ស៊ីវិល ពួកគេ​មាន​សមត្ថភាព​គ្រប់គ្រាន់​ក្នុង​ការ​កាត់​សេចក្តី​ចំពោះ​សកម្មភាព​របស់​រដ្ឋាភិបាល​ដោយ​ត្រឹមត្រូវ​ជាទីបំផុត។

ស្ថាបនិក​អង្គការ​អភិវឌ្ឍន៍​ផ្នត់គំនិត​រូប​នេះ​បញ្ជាក់​ថា រដ្ឋាភិបាល​មិន​គួរ​ព្រួយបារម្ភ​ពី​សកម្មភាព​របស់​ខ្លួន​ខ្លាច​បក្ស​នយោបាយ ឬ​អង្គការ​សង្គម​ស៊ីវិល​រិះគន់​នោះ​ទេ ប៉ុន្តែ​រដ្ឋាភិបាល​គួរតែ​ពិនិត្យ​មើល​ឲ្យ​បាន​ហ្មត់ចត់​ថា តើ​សកម្មភាព​របស់​ខ្លួន​សព្វថ្ងៃ​នេះ​បាន​បំពេញ​សេចក្តី​ត្រូវការ​របស់​ប្រជាពលរដ្ឋ​បាន​ពេញលេញ​ហើយ​ឬ​នៅ​ប៉ុណ្ណោះ។ នេះ​ទើប​ជា​កិច្ចការ​ដែល​រដ្ឋាភិបាល​ត្រូវ​ខ្វល់ខ្វាយ​ចំពោះ​ការ​ដឹកនាំ​របស់​ខ្លួន​សព្វថ្ងៃ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស