30 C
Phnom Penh

លោក ហ៊ុន សែន ថា​លោក វេង សាខុន នឹង​ត្រូវ​តែងតាំង​ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី

ដោយ ឌឹ ខេមបូឌា ដេលី

បទវិភាគ

លោក​នាយករដ្ឋមន្ត្រី ហ៊ុន សែន ថ្លែង​ថា លោក​នឹង​ធ្វើ​លិខិត​មួយ​ថ្វាយ​ទៅ​ព្រះមហាក្សត្រ​ដើម្បី​ស្នើសុំ​តែងតាំង​លោក វេង សាខុន ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី ក្រោយពី​ត្រូវ​បាន​បញ្ចប់​មុខតំណែង​កាលពី​ថ្ងៃទី​៨ ខែ​តុលា។

ការ​ប្រកាស​របស់​លោក ហ៊ុន សែន ធ្វើឡើង​ក្នុង​ពិធី​ចែក​សញ្ញាបត្រ​ដល់​និស្សិត​សាកលវិទ្យាល័យ​ភ្នំពេញ​អន្តរជាតិ (PPIU) នា​ថ្ងៃ​អង្គារ ទី​១១ តុលា នេះ។

លោក ហ៊ុន សែន អះអាង​ថា ការ​បញ្ចប់​មុខតំណែង​ពី​រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ មិនមែន​ដោយសារ​លោក វេង សាខុន ធ្វើ​ខុស ឬ​ប្រព្រឹត្ត​កំហុស​ធ្ងន់ធ្ងរ​នោះ​ទេ ប៉ុន្តែ​ដោយសារ​លោក វេង សាខុន មិន​អាច​ធ្វើ​អ្វី​តាម​ការ​ចង់​បាន​របស់​លោក​ប៉ុណ្ណោះ ជាពិសេស​ការ​ជំរុញ​លើ​វិស័យ​កសិកម្ម។ ទោះបី​លោក វេង សាខុន ត្រូវ​បាន​បញ្ចប់​មុខតំណែង​ក្ដី ប៉ុន្តែ​រូបលោក​នឹង​មិន​បោះបង់​លោក វេង សាខុន ដែល​ជា​មន្ត្រី​ធ្លាប់​ធ្វើការ​ក្នុង​ជួរ​រដ្ឋាភិបាល​ឡើយ។

លោក ហ៊ុន សែន ប្រកាស​ថា នៅ​ថ្ងៃ​អង្គារ ទី​១១ តុលា នេះ លោក​នឹង​ដាក់​លិខិត​ទៅ​ព្រះបរមរាជវាំង ដើម្បី​ទូល​ថ្វាយ​ព្រះមហាក្សត្រ​ស្នើសុំ​តែងតាំង​លោក វេង សាខុន ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី។

កាលពី​ថ្ងៃទី​៨ ខែ​តុលា ឆ្នាំ​២០២២ ព្រះមហាក្សត្រ​បាន​បញ្ចប់​តំណែង​លោក វេង សាខុន ពី​រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ ក្រោយ​មាន​ការ​ស្នើ​ពី​នាយករដ្ឋមន្ត្រី។ ការ​បញ្ចប់​មុខតំណែង​នេះ លោក ហ៊ុន សែន បាន​ស្ដីបន្ទោស​ខ្លាំងៗ​ទៅ​កាន់​លោក វេង សាខុន កាលពី​ខែ​កុម្ភៈ ឆ្នាំ​២០២២ ថា​ជា​រដ្ឋមន្ត្រី​ដែល​មិន​ចេះ​ធ្វើ​ការងារ​សហការ​ជាមួយ​ក្រសួង-ស្ថាប័ន​ផ្សេងៗ ព្រមទាំង​ព្រមាន​ថា​បើ​លោក​ដក​រដ្ឋមន្ត្រី​ណា​មួយ​ចេញពី​តំណែង គឺ​ប្រើ​ពេល​ត្រឹម ២៤​ម៉ោង​ប៉ុណ្ណោះ។

ការ​ស្ដីបន្ទោស​នា​ពេល​នោះ បន្ទាប់ពី​លោក វេង សាខុន មិន​បាន​ចូលរួម​កិច្ចប្រជុំ​តាម​ការ​អញ្ជើញ​របស់​ក្រសួង​សេដ្ឋកិច្ច និង​ហិរញ្ញវត្ថុ ពាក់ព័ន្ធ​បញ្ហា​តម្លៃ​ជ្រូក។

លោក ហ៊ុន សែន អះអាង​ថា ការ​មិន​ចូលរួម​ប្រជុំ​នេះ​ជា​មូលហេតុ​នាំ​ឲ្យ​សាច់​ជ្រូក​នៅ​កម្ពុជា​ឡើង​ថ្លៃ ក្រោយពី​រដ្ឋមន្ត្រី​កសិកម្ម លោក វេង សាខុន បាន​ផ្អាក​ការ​នាំចូល​សាច់​ជ្រូក និង​ជ្រូក​រស់​ចូល​ពី​វៀតណាម។

ក្រោយពី​បញ្ចប់​តំណែង​លោក វេង សាខុន បាន​ពីរ​ថ្ងៃ លោក​ក៏​បាន​ស្នើ​ឲ្យ​សភា​បោះឆ្នោត​ផ្តល់​សេចក្តី​ទុកចិត្ត​ដល់​លោក ឌិត ទីណា ដែល​បច្ចុប្បន្ន​មាន​តួនាទី​ជា​រដ្ឋលេខាធិការ​ក្រសួង​រ៉ែ និង​ថាមពល ធ្វើជា​រដ្ឋមន្ត្រី​ក្រសួង​កសិកម្ម ជំនួស​លោក វេង សាខុន។

លោក ឌិត ទីណា ជា​កូនប្រុស​របស់​លោក ឌិត មុន្ទី ប្រធាន​តុលាការ​កំពូល​កម្ពុជា និង​ជា​សមាជិក​គណៈ​អចិន្ត្រៃយ៍​គណបក្ស​ប្រជាជន​កម្ពុជា​ដែល​កំពុង​គ្រប់គ្រង​អំណាច​បច្ចុប្បន្ន​នេះ។ លោក ឌិត មុន្ទី ក៏​ជា​ប្រធាន​ក្រុមប្រឹក្សា​ជំនុំជម្រះ​មួយ​រូប​ក្នុង​ចំណោម​ចៅក្រម ៩​រូប ដែល​បាន​រំលាយ​គណបក្ស​សង្គ្រោះ​ជាតិ​កាលពី​ថ្ងៃទី​១៦ ខែ​វិច្ឆិកា ឆ្នាំ​២០១៧ ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស