នៅក្នុងកិច្ចប្រជុំថ្នាក់រដ្ឋមន្ត្រីការពារជាតិណាតូ (NATO) រយៈពេល ២ថ្ងៃនៅក្នុងសប្ដាហ៍នេះនៅទីក្រុងប្រ៊ុចសែល ប្រទេសបែលហ្សិក អគ្គលេខាធិការអង្គការណាតូ លោក Jens Stoltenberg បានព្រមានរុស្ស៊ីថា បើក្រុងមូស្គូ ផ្ដើមសង្គ្រាមនុយក្លេអ៊ែរ គឺជាការដើរជាន់បន្ទាត់ក្រហមរបស់ណាតូហើយ។ នេះបើតាមការចុះផ្សាយរបស់សារព័ត៌មាន Business Standard នៅថ្ងៃសុក្រ ទី១៤ តុលា នេះ។
ការព្រមានរបស់មេដឹកនាំអង្គការយោធាណាតូ បានធ្វើឡើងនៅមុនកងទ័ពណាតូធ្វើសមយុទ្ធទ័ពនុយក្លេអ៊ែររបស់ខ្លួននៅសប្ដាហ៍ក្រោយនេះ។
សមយុទ្ធរបស់ទ័ពនុយក្លេអ៊ែរណាតូដែលដាក់រហស្សនាមថា Steadfast Noon មានយន្តហោះចម្បាំងមកពី ១៤ប្រទេស។ សមយុទ្ធនេះសំដៅពង្រឹងកងអង្គភាពទ័ពនុយក្លេអ៊ែរ។
តាមប្រភពដដែលនេះ យន្តហោះចម្បាំងជាច្រើនរបស់ណាតូ នឹងត្រូវបានបំពាក់ដោយក្បាលគ្រាប់នុយក្លេអ៊ែរ តែមិនទម្លាក់អាវុធនេះនៅពេលសមយុទ្ធនោះទេ។
សមយុទ្ធនេះត្រូវគេរំពឹងថា នឹងធ្វើនៅលើផ្ទៃសមុទ្រខ្មៅមានចម្ងាយ ១ពាន់គីឡូម៉ែត្រពីមូលដ្ឋានទ័ពជើងទឹករុស្ស៊ី នៅតំបន់គ្រីមៀ។
ការព្រមានរបស់អគ្គលេខាធិការណាតូដូចនេះ ធ្វើឡើងចំពេលក្រុងមូស្គូព្រមានវាយប្រហារដោយក្បាលគ្រាប់នុយក្លេអ៊ែរទៅលើកងទ័ពអ៊ុយក្រែន ហើយក៏ចំពេលដែលរុស្ស៊ីថាខ្លួនគេនឹងបាញ់សាកល្បងក្បាលគ្រាប់នុយក្លេអ៊ែរ Poseidon ដែលមានអានុភាពបំផុត ដោយបាញ់ចេញពីនាវាមុជទឹករបស់រុស្ស៊ី Belgorod។
លោក Stoltenberg បានថ្លែងថា ណាតូបានតាមដានជាប់ជានិច្ចចំពោះសកម្មភាពទ័ពរុស្ស៊ី ដែលមានផែនការបាញ់សាកល្បងអាវុធប្រល័យលោកដ៏គ្រោះថ្នាក់បំផុតនេះ។
នៅរយៈពេលប៉ុន្មានថ្ងៃមកនេះ ប្រព័ន្ធផ្សព្វផ្សាយរបស់រុស្ស៊ី ដោយរួមទាំងប្រធានាធិបតី វ៉្លាឌីមៀរ ពូទីន ផង បានព្រមានថាបើសន្តិសុខរុស្ស៊ីត្រូវបានគំរាមធ្ងន់ធ្ងរ គឺជាជម្រើសមួយដែលចាំបាច់ត្រូវរុស្ស៊ីឆ្លើយដោយអាវុធនុយក្លេអ៊ែរ។ រុស្ស៊ីព្រមានថា បើទឹកដីបំបែកខ្លួនពីអ៊ុយក្រែន ត្រូវបានទ័ពអ៊ុយក្រែនវាយយកបានមកវិញ គឺស្មើនឹងទឹកដីរុស្ស៊ីត្រូវគេឈ្លានពាន ដែលបង្ខំឱ្យរុស្ស៊ីឆ្លើយតបទោះជាអាវុធនុយក្លេអ៊ែរក៏ដោយ។
នៅក្នុងសន្និសីទសារព័ត៌មាននៅទីក្រុងប្រ៊ុចសែល លោក Stoltenberg មិនបានបញ្ជាក់ថាយោធាណាតូនឹងបាញ់អាវុធនុយក្លេអ៊ែរឆ្លើយតបនឹងទ័ពរុស្ស៊ី ឬយ៉ាងណានោះទេ តែលោកព្រមានថា ពិតណាស់នឹងមានប្រតិកម្មពីណាតូ ដែលណាតូចាត់ទុកថារុស្ស៊ីបានដើរជាន់បន្ទាន់ក្រហមរបស់ណាតូហើយ។
លោកអគ្គលេខាធិការណាតូ អះអាងថា ទោះជារុស្ស៊ីបាញ់ប្រហារត្រឹមតែក្បាលគ្រាប់នុយក្លេអ៊ែរតូចមួយ គឺពិតណាស់ជាការបង្កសង្គ្រាមដ៏វិនាសកម្មបំផុត ដែលណាតូត្រូវប្រតិកម្មភ្លាម។ លោកព្រមានថា ក្រុងមូស្គូនឹងជួបផលវិបាកធ្ងន់ធ្ងរ។
ជាមួយគ្នានេះ រដ្ឋមន្ត្រីការពារជាតិសហរដ្ឋអាមេរិក លោក Lloyd Austin ក៏បានបញ្ជូនសារព្រមានរុស្ស៊ីផងដែរ។ លោកថា រុស្ស៊ីត្រូវដកថយទៅវិញនូវចលនាឆ្ពោះទៅរកសង្គ្រាមនុយក្លេអ៊ែរ។ លោកថា សហរដ្ឋអាមេរិកក៏ជាប្រទេសមានក្បាលគ្រាប់នុយក្លេអ៊ែរផងដែរ គឺអាមេរិកមិនចង់ឱ្យរុស្ស៊ីរុញអាមេរិកក្នុងសង្គ្រាមប្រល័យលោកនេះទេ។
លោកប្រាប់ទៅរុស្ស៊ីឱ្យចេះការពារអាយុជីវិតមនុស្សជាតិផង ដែលលោកថាសម័យនេះ ពិភពលោកមានច្បាប់មានទម្លាប់។ លោកថា អាមេរិកពិតជាមិនចង់ឲ្យពិភពលោកធ្លាក់ក្នុងសង្គ្រាមនុយក្លេអ៊ែរនេះទេ។
ចំណែកប្រធានគោលនយោបាយសហភាពអឺរ៉ុប Josep Borrell ដែលត្រូវបានស្នើឱ្យមកចូលប្រជុំថ្នាក់រដ្ឋមន្ត្រីការពារជាតិណាតូផងដែរ លោកបានព្រមានរុស្ស៊ីថាប្រយ័ត្នស្ដាយក្រោយ។ លោកបានប្រាប់ទៅក្រុងមូស្គូ ឲ្យបោះបង់ចោលផែនការបង្កសង្គ្រាមប្រល័យលោកដូចនេះ។
ចំណែករដ្ឋមន្ត្រីការពារជាតិអង់គ្លេស Ben Wallace បានប្រាប់អ្នកសារព័ត៌មានថា អង់គ្លេសពិតជាមិនចង់ឃើញសង្គ្រាមដូចនេះផ្ទុះឡើងនោះទេ តែបើជៀសមិនរួច ក៏អង់គ្លេសមិនរត់ចោលសមរភូមិដែរ។
តែនៅពេលជាមួយគ្នានេះ ក្រុមរដ្ឋមន្ត្រីការពារជាតិណាតូ រហូត ១៥ប្រទេស បានប្រកាសជួយអ៊ុយក្រែនវាយការពារទឹកដីរបស់ខ្លួនពីការឈ្លានពានរបស់រុស្ស៊ី។ ប្រទេសទាំង ១៥ នេះ ក៏មានសហរដ្ឋអាមេរិកមួយដែរ សម្រេចបញ្ជូនប្រព័ន្ធការពារដែនអាកាសទៅឱ្យអ៊ុយក្រែន។
រដ្ឋមន្ត្រីការពារជាតិអាល្លឺម៉ង់ អ្នកស្រី Christine Lambrecht បញ្ជាក់ថា តាមរយៈកិច្ចផ្ដួចផ្ដើមនេះ គឺណាតូកំពុងបំពេញការទទួលខុសត្រូវរួមសម្រាប់សន្តិសុខនៅអឺរ៉ុបទាំងមូល គឺចាំបាច់ត្រូវជួយអ៊ុយក្រែន។
អ្នកស្រី Lambrecht បង្ហើបថា ជម្រើសដំបូងនៃប្រព័ន្ធការពារដែនអាកាសដែលនឹងត្រូវបញ្ជូនទៅឱ្យអ៊ុយក្រែន រួមមានប្រព័ន្ធមីស៊ីល Arrow 3, Patriot និងប្រព័ន្ធមីស៊ីល IRIS-T ដែលអាល្លឺម៉ង់បានបញ្ជូនទៅអ៊ុយក្រែនហើយនោះ។
មកដល់ពេលនេះ ក្រុងមូស្គូមិនទាន់ឃើញប្រតិកម្មនឹងការព្រមានរបស់ក្រុមរដ្ឋមន្ត្រីការពារជាតិណាតូនៅឡើយនោះទេ ប៉ុន្តែគេឃើញអនុប្រធានក្រុមប្រឹក្សាសន្តិសុខនៃសហព័ន្ធរុស្ស៊ី លោក Alexander Venediktov និយាយថា ការយល់ព្រមឲ្យអ៊ុយក្រែនក្លាយជាសមាជិករបស់អង្គការណាតូ អាចបណ្តាលឱ្យមានសង្គ្រាមលោកលើកទី៣។
ក្នុងបទសម្ភាសន៍ជាមួយសារព័ត៌មាន TASS របស់រុស្ស៊ី លោក Venediktov បានបញ្ជាក់ថា ទីក្រុងគៀវ ដឹងយ៉ាងច្បាស់ថា ជំហរបែបនេះនឹងរុញឱ្យមានការកើនឡើងកម្តៅឈានទៅដល់សង្គ្រាមលោកលើកទី៣។ លោក Venediktov ព្រមានលោកខាងលិចថា តាមរយៈការជួយអ៊ុយក្រែន គឺរុស្ស៊ីចាត់ទុកណាតូជាភាគីផ្ទាល់នៃជម្លោះជាមួយនឹងរុស្ស៊ី។
ការព្រមានរបស់មន្ត្រីសន្តិសុខរបស់រុស្ស៊ី ធ្វើឡើងគឺជាការឆ្លើយតបការដែលប្រធានាធិបតីអ៊ុយក្រែន វ៉ូឡូឌីមៀ ហ្សេឡេនស្គី បានចេញសេចក្តីប្រកាសដ៏ភ្ញាក់ផ្អើលមួយកាលពីសប្ដាហ៍មុន អំពីការដាក់ពាក្យជាផ្លូវការសុំចូលជាសមាជិកណាតូជាថ្មីម្ដងទៀត ហើយមកដល់ពេលនេះមាន ១០ប្រទេសក្នុងចំណោម ៣០ប្រទេសនៃសមាជិកណាតូ បានប្រកាសគាំទ្រអ៊ុយក្រែន៕