កូដករណាហ្គាវើលដ៍ចំនួន ៤នាក់ ដែលត្រូវក្រុមហ៊ុនប្ដឹងទៅតុលាការ នៅថ្ងៃចន្ទ ទី១៧ តុលា នេះ បានស្នើសុំពន្យារពេលចូលបំភ្លឺ ដោយសារពួកគេទើបទទួលបានដីកាកោះហៅ និងមិនទាន់មានមេធាវីការពារសិទ្ធិ។
អយ្យការអមសាលាដំបូងរាជធានីភ្នំពេញ លោក ឆាយ ហុង បានចេញដីកាកោះហៅកូដករចំនួន ៤នាក់ឲ្យចូលបំភ្លឺនៅតុលាការ ចាប់ពីថ្ងៃទី១៧ ដល់ថ្ងៃទី១៩ ខែតុលា នេះ តាមបណ្ដឹងរបស់ក្រុមហ៊ុនណាហ្គាវើលដ៍។
ការកោះហៅនេះ ធ្វើឡើងតាមបណ្ដឹងរបស់ក្រុមហ៊ុនណាហ្គាវើលដ៍ ដែលបានប្ដឹងកូដករជាស្ត្រីចំនួន ៤នាក់ ពីបទ «រំលោភលើលំនៅឋាន ធ្វើឱ្យខូចខាតដោយចេតនាមានស្ថានទម្ងន់ទោស» និង «ចាប់ឃុំឃាំង និងបង្ខាំងដោយខុសច្បាប់»។
កញ្ញា សៀក បញ្ញា ប្រាប់អ្នកសារព័ត៌មាននៅមុខសាលាដំបូងរាជធានីភ្នំពេញថា មូលហេតុដែលកញ្ញា និងអ្នកផ្សេងទៀតដាក់ពាក្យស្នើសុំពន្យារពេលចូលបំភ្លឺ ដោយសារពួកគាត់មិនទាន់រកមេធាវីដើម្បីឲ្យជួយការពារសិទ្ធិបាននៅឡើយ។ បន្ថែមពីនេះ កញ្ញាក៏មិនទាន់បានត្រៀមខ្លួនក្នុងការចូលបំភ្លឺដែរ ខណៈកញ្ញា និងអ្នកផ្សេងទៀតទើបទទួលបានដីកាកោះពីតុលាការនៅថ្ងៃទី១៥ ខែតុលា។
កូដករចាត់ទុកការកោះហៅរបស់តុលាការជាការគំរាមកំហែង ដើម្បីបំបាក់ស្មារតីពួកគាត់មិនឲ្យធ្វើកូដកម្មទៀតតែប៉ុណ្ណោះ។
កញ្ញាបញ្ជាក់ថា ទោះបីជាពួកគាត់ជាប់បណ្ដឹងនៅតុលាការដោយសារក្រុមហ៊ុនណាហ្គាវើលដ៍ប្ដឹង ប៉ុន្តែកញ្ញា និងកូដករផ្សេងទៀតនៅតែបន្តចេញធ្វើកូដកម្មដដែល បើក្រុមហ៊ុនល្បែងនេះនៅតែមិនព្រមដោះស្រាយជូនពួកគាត់នោះ។
ក្នុងជំនួបទ្វេភាគីជាមួយរដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី១៣ ខែតុលា ឯកអគ្គរាជទូតអូស្ត្រាលី លោក Pablo Kang បានជំរុញឲ្យរដ្ឋាភិបាលកម្ពុជាធ្វើការខិតខំបន្តទៀត ដើម្បីស្វែងរកដំណោះស្រាយដែលអាចទទួលយកបានសម្រាប់ភាគីទាំងសងខាងផងដែរ។
ការជំរុញនេះ ធ្វើឡើងបន្ទាប់ពីវិវាទការងារក្រុមហ៊ុនណាហ្គាវើលដ៍ បានកើតឡើងជាង ១ឆ្នាំហើយរហូតមកដល់ពេលនេះ មិនទាន់បានដោះស្រាយចប់នៅឡើយ ខណៈអ្នកនាំពាក្យក្រសួងការងារ លោក ហេង សួរ បានទទួលស្គាល់ថា ការអូសបន្លាយវិវាទការងារនៅក្រុមហ៊ុនណាហ្គាវើលដ៍ បានធ្វើឲ្យប៉ះពាល់មុខមាត់រដ្ឋាភិបាលកម្ពុជា ប៉ុន្តែការមិនអាចដោះស្រាយបាន ដោយលោកថារឿងនេះមិនមែនជារឿងតូចតាច។
មួយវិញទៀត លោកថាភាគីជម្លោះប្រកាន់យកជំហរដាច់ខាតរៀងខ្លួន ខណៈដែលក្រសួងបានត្រឹមតែដើរតួនាទីជាអ្នកផ្សះផ្សាវិវាទ ប៉ុន្តែគ្មានសិទ្ធិដាក់សម្ពាធបង្ខំភាគីណាមួយឡើយ។
បុគ្គលិកដែលបាននាំគ្នាចេញធ្វើកូដកម្មជាង ៩ខែមកនេះ អះអាងថា ការបញ្ឈប់បុគ្គលិក ១៣២៩នាក់ មិនមែនដោយសារក្រុមហ៊ុនជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩ ទេ ប៉ុន្តែកន្លងមក ថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕