31 C
Phnom Penh

លោក ហ៊ុន សែន ឆ្វៀល​ដី​គម្រប​ព្រៃឈើ​ជាង​១០​ហិកតារ​នៅ​ខេត្ត​ព្រះសីហនុ​ឱ្យ​ធនាគារ​កាណាឌីយ៉ា

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា​ដឹកនាំ​ដោយ​ការ​លុប​បឹង និង​កាប់​ព្រៃ លោក ហ៊ុន សែន សម្រេច​កាត់​ឆ្វៀល​ដី​គម្រប​ព្រៃឈើ​ជាង ១០​ហិកតារ​នៅ​ខេត្ត​ព្រះសីហនុ ចេញពី​ដែន​គម្រប​ព្រៃឈើ​ឆ្នាំ​២០០២ ដើម្បី​ធ្វើ​អនុបយោគ​ឱ្យ​ជា​កម្មសិទ្ធិ​ធនាគារ​កាណាឌីយ៉ា​របស់​លោក​ឧកញ៉ា ពុង ឃាវសែ។

មេដឹកនាំ​បក្ស​កាន់​អំណាច​ដែល​ចូលចិត្ត​លុប​បឹង និង​កាប់​ព្រៃ​ដើម្បី​អភិវឌ្ឍ លោក ហ៊ុន សែន កាលពី​ថ្ងៃទី​៣១ ខែ​ធ្នូ ឆ្នាំ​២០២១ បាន​ចេញ​អនុក្រឹត្យ​កាត់​ឆ្វៀល​ដី​គម្រប​ព្រៃឈើ​ឆ្នាំ​២០០២ ស្ថិត​នៅ​ភូមិ​ចំណោតរាម ឃុំ​បិតត្រាំង ស្រុក​ព្រៃនប់ ខេត្ត​ព្រះសីហនុ ដែល​មាន​ទំហំ ១០​ហិកតារ ៤០​អា និង ៣៩​សង់ទីអា ដែល​ត្រូវ​បាន​គេ​ទម្លាយ​នៅ​ថ្ងៃទី​២០ ខែ​តុលា ឆ្នាំ​២០២២ នេះ។

នាយករដ្ឋមន្ត្រី​ដែល​ចូលចិត្ត​ប្រើ​កណ្ដាប់ដៃ​ដែក លោក ហ៊ុន សែន បាន​បញ្ជា​ឱ្យ​រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុន្នីរ័ត្ន រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ លោក ជា សុផារ៉ា រដ្ឋមន្ត្រី​ក្រសួង​មហាផ្ទៃ លោក ស ខេង រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ លោក ឌិត ទីណា ព្រមទាំង​រដ្ឋមន្ត្រី​គ្រប់​ក្រសួង​ដែល​ពាក់ព័ន្ធ និង​អភិបាល​ខេត្ត​នេះ គឺ​លោក គួច ចំរើន ទទួល​ខុសត្រូវ​អនុវត្ត​តាម​អនុក្រឹត្យ​នេះ​ឱ្យ​មាន​ប្រសិទ្ធភាព។

ការ​ចេញ​អនុក្រឹត្យ​កាត់​ឆ្វៀល​ដី​គម្រប​ព្រៃឈើ​ឆ្នាំ​២០០២ ក្នុង​ខេត្ត​ព្រះសីហនុ នេះ ត្រូវ​គេ​ដឹង​ថា មិនមែន​ជា​លើក​ទី​មួយ​ទេ​ដើម្បី​ផ្តល់​សិទ្ធិ​កាន់កាប់​ដល់​ក្រុមហ៊ុន​ឯកជន និង​បុគ្គល​ឯកជន​ជា​ហូរហែ​រហូត​មក។

ក្នុង​អនុក្រឹត្យ​ចុះ​ថ្ងៃទី​៣១ ខែ​ធ្នូ ឆ្នាំ​២០២១ លោក​នាយករដ្ឋមន្ត្រី ហ៊ុន សែន សម្រេច​កាត់​ឆ្វៀល​ដី​ទំហំ​ជាង ១០​ហិកតារ​ចេញពី​ដែន​គម្រប​ព្រៃឈើ​ឆ្នាំ​២០០២ ស្ថិត​នៅ​ស្រុក​ព្រៃនប់ ខេត្ត​ព្រះសីហនុ ធ្វើ​អនុបយោគ​ជា​ដី​ឯកជន​របស់​រដ្ឋ និង​ផ្ដល់​ជូន​ធនាគារ​កាណាឌីយ៉ា​ដែល​គេ​ស្គាល់​ថា​មាន​ឧកញ៉ា ពុង ឃាវសែ ជា​ថៅកែ​ដ៏​មាន​ឥទ្ធិពល​ក្នុង​ធនាគារ​នេះ ដែល​ធ្វើឡើង​តាម​សំណើ​របស់​រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ លោក ជា សុផារ៉ា កាលពី​ពេល​ កន្លងទៅ។

យ៉ាងណាក៏ដោយ ពលរដ្ឋ​ភាគច្រើន​រស់នៅ​ខេត្ត​ព្រះសីហនុ តែង​ស្នើ​ឱ្យ​លោក ហ៊ុន សែន ជួយ​ពិនិត្យ​ចំពោះ​ការ​អនុវត្ត​ការងារ​របស់​លោក គួច ចំរើន អភិបាល​ខេត្ត​ព្រះសីហនុ បច្ចុប្បន្ន និង​លោក ជា សុផារ៉ា រដ្ឋមន្ត្រី​ក្រសួង​រៀបចំ​ដែនដី ថា​តើ​ពួកគេ​បាន​បំពេញ​តួនាទី​របស់​ខ្លួន​បាន​ត្រឹមត្រូវ​ដែរ​ឬ​ទេ ជាពិសេស​ជួយ​ពិនិត្យ​ទៅ​លើ​ឯកសារ​ស្នើសុំ​កាត់​ឆ្វៀល​ដី​គម្រប​ព្រៃឈើ​ឆ្នាំ​២០០២ នៅ​ខេត្ត​ព្រះសីហនុ នេះ។

ទាក់ទិន​នឹង​ការ​ចេញ​អនុក្រឹត្យ​កាត់​ឆ្វៀល​ដី​ចេញពី​គម្រប​ព្រៃឈើ​ឆ្នាំ​២០០២ នេះ កាលពី​ថ្ងៃទី​៩ ខែ​មិថុនា ឆ្នាំ​២០២០ លោក ហ៊ុន សែន ក៏​បាន​ចេញ​អនុក្រឹត្យ​កាត់​ដី​ទំហំ ៦០០​ហិកតារ​ស្ថិត​ក្នុង​ឃុំ​រាម និង​ឃុំ​បិតត្រាំង ស្រុក​ព្រៃនប់ ខេត្ត​ព្រះសីហនុ នេះ​ដែរ ដើម្បី​ធ្វើ​អនុបយោគ​ជា​ដី​ឯកជន​របស់​រដ្ឋ​ឲ្យ​ទៅ​ឧកញ៉ា​ពីរ​រូប គឺ​ឧកញ៉ា សេង ញ៉ក និង​ជំទាវ លី អាផណ ដែល​ត្រូវ​ជា​សាច់ញាតិ​របស់​ឧកញ៉ា លី យ៉ុងផាត់ ដើម្បី​ធ្វើការ​អភិវឌ្ឍ។

ជាង​នេះ​ទៀត កាលពី​អំឡុង​ខែ​កក្កដា ឆ្នាំ​២០២០ លោក ហ៊ុន សែន ក៏​ធ្លាប់​បាន​ចេញ​អនុក្រឹត្យ​កាត់​ដី​ជាង ៤៤​ហិកតារ​ចេញពី​ដែន​គម្រប​ព្រៃឈើ​ឆ្នាំ​២០០២ នៅ​ភូមិ​ចំណោតរាម ឃុំ​បិតត្រាំង ស្រុក​ព្រៃនប់ ខេត្ត​ព្រះសីហនុ ប្រគល់​ឱ្យ​ទៅ​អ្នកស្រី ហ៊ុន ម៉ាណា និង​អ្នកស្រី ហ៊ុន ម៉ាលី ដែល​ត្រូវ​ជា​កូនស្រី​បង្កើត​របស់​លោក និង​បណ្ដាញ​បក្ខពួក​មួយ​ចំនួន​ថែម​ទៀត។

ទាក់ទិន​នឹង​បញ្ហា​នេះ នាយិកា​មជ្ឈមណ្ឌល​សិទ្ធិមនុស្ស​កម្ពុជា អ្នកស្រី ចក់ សុភាព ធ្លាប់​បាន​សំដែង​ការ​ព្រួយបារម្ភ​កាលពី​ពេល​កន្លងទៅ​ថា អាជ្ញាធរ​ត្រូវ​ពន្យល់ និង​ផ្សព្វផ្សាយ​ឱ្យ​បាន​ច្បាស់លាស់​ពី​ការ​កាត់​ដី​គម្រប​ព្រៃឈើ​នេះ និង​ការ​ធ្វើ​អនុបយោគ​តំបន់​ផ្សេងៗ​ទៀត​កន្លងមក ក្នុង​នោះ​ក៏​មាន​បឹង​តាមោក និង​បឹង​មួយ​ចំនួន​ទៀត​ឲ្យ​បាន​ច្បាស់លាស់​ផង​ដែរ ដើម្បី​ធានា​នូវ​តម្លាភាព​ក្នុង​ការ​ដឹកនាំ​របស់​រដ្ឋាភិបាល។

មន្ត្រី​អង្គការ​ឃ្លាំមើល​ការ​អភិវឌ្ឍ​សង្គម​ចំនួន ២​ស្ថាប័ន រួម​មាន​អង្គការ​លីកាដូ (LICADHO) និង​អង្គការ​ស្រាវជ្រាវ​ជាតិ​កម្ពុជា ឬ​ហៅ​កាត់ ស៊ីអិនរ៉ូ (CNRO) ប្រចាំ​ខេត្ត​ព្រះសីហនុ ធ្លាប់​បាន​បង្ហាញ​កង្វល់​កាលពី​ពេល​កន្លងទៅ​ថា សព្វថ្ងៃ​នេះ​ដី​គម្រប​ព្រៃឈើ​ឆ្នាំ​២០០២ ដែល​រដ្ឋាភិបាល​បាន​រក្សា​ទុក កំពុង​រង​ការ​បំផ្លាញ និង​ពុះ​ច្រៀក​ធ្វើ​កម្មសិទ្ធិ​ឯកជន​ឱ្យ​ទៅ​អ្នក​មាន​ទ្រព្យធន និង​អ្នក​មាន​អំណាច​ក្នុង​ជួរ​រដ្ឋាភិបាល​កម្ពុជា​ព្រោងព្រាត។

សារព័ត៌មាន The Cambodia Daily នៅ​មិនទាន់​អាច​មាន​ប្រភព​ទាក់ទង​លោក គួច ចំរើន និង​លោក ជា សុផារ៉ា ដើម្បី​បំភ្លឺ​ជុំវិញ​ការ​កាត់​ឆ្វៀល​ដី​គម្រប​ព្រៃឈើ​នេះ​បាន​នៅឡើយ​ទេ​រហូត​មក​ទល់​នឹង​ម៉ោង​ផ្សាយ​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស