មន្ត្រីជាន់ខ្ពស់របស់គណបក្សប្រជាធិបតេយ្យមូលដ្ឋាន (GDP) អះអាងថា ការបង្កជម្លោះឆ្លើយឆ្លងគ្នារវាងមេដឹកនាំបក្សកាន់អំណាច លោក ហ៊ុន សែន និងអតីតមេដឹកនាំប្រឆាំង លោក សម រង្ស៊ី រហូតយកព្រះមហាក្សត្រមកដាក់ក្នុងជម្លោះរបស់ពួកគេ គឺជាទង្វើដែលនាំឱ្យខូចដល់ប្រយោជន៍ជាតិធ្ងន់ធ្ងរ ខណៈកម្ពុជាកំពុងជាប់គាំងដោយវិបត្តិស្អេកស្កះ។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី៣១ ខែតុលា ឆ្នាំ២០២២ ថា ស្ថានភាពនយោបាយរបស់កម្ពុជាបច្ចុប្បន្ននេះ មិនស័ក្តិសមឱ្យមេដឹកនាំនយោបាយកំពូលៗយករឿងបុគ្គលផ្ទាល់ខ្លួនមកវាយប្រហារគ្នាភ្ជាប់ជាមួយនឹងបញ្ហានយោបាយជាតិឡើយ។ ជាងនេះទៀត ជម្លោះរបស់ពួកគេនៅពេលនេះបានប្រមាថ និងរំលោភទៅលើបាវចនាជាតិយ៉ាងធ្ងន់ធ្ងរ ដែលបានចែងនៅក្នុងរដ្ឋធម្មនុញ្ញរបស់ខ្លួន គឺ ជាតិ សាសនា ព្រះមហាក្សត្រ។
បណ្ឌិត យ៉ង សាំងកុមារ អះអាងថា ការធ្វើនយោបាយដោយប្រើជម្លោះបុគ្គលផ្ទាល់ខ្លួនមកលាយឡំជាមួយការដឹកនាំនយោបាយជាតិសព្វថ្ងៃនេះ បានបង្កនូវចំណុចគ្រោះថ្នាក់បំផុតសម្រាប់កម្ពុជា គឺការបង្កឱ្យមានការបែកបាក់សាមគ្គីផ្ទៃក្នុងជាតិដែលជាកត្តាចាំបាច់បំផុតសម្រាប់អ្នកនយោបាយដែលត្រូវតែចៀសវាងដាច់ខាត ព្រោះថានៅពេលដែលប្រជាជាតិមួយឈានដល់ដំណាក់កាលបែកបាក់សាមគ្គីផ្ទៃក្នុងហើយនោះ ប្រទេសជាតិនោះនឹងប្រឈមទៅនឹងការវិនាសអន្តរាយនៅពេលអនាគតជាមិនខាន ដោយសារតែជម្លោះបុគ្គលផ្ទាល់ខ្លួននេះតែម្តង។
មន្ត្រីជាន់ខ្ពស់គណបក្សក្រៅរដ្ឋាភិបាលរូបនេះបញ្ជាក់ថា ដោយសារតែគណបក្សរបស់លោកមើលឃើញនូវចំណុចគ្រោះថ្នាក់បែបនេះហើយ ទើបលោកអំពាវនាវឱ្យមានការរួបរួមកម្លាំងនយោបាយជាមួយគណបក្សក្រៅរដ្ឋាភិបាលដទៃទៀត ដើម្បីប្រមូលកម្លាំងអ្នកប្រជាធិបតេយ្យ អ្នកជាតិនិយម និងអ្នកស្នេហាជាតិផ្តុំគ្នាជាកម្លាំងតែមួយ ឆ្ពោះទៅរកការផ្លាស់ប្ដូរតាមរយៈនៃការបោះឆ្នោតដែលនឹងប្រព្រឹត្តទៅនាពេលដ៏ខ្លីខាងមុខនេះ។
ការអះអាងនេះ ធ្វើឡើងស្របពេលដែលកំដៅនយោបាយបង្កឡើងដោយគំនុំបុគ្គលរវាងលោក ហ៊ុន សែន និងលោក សម រង្ស៊ី កំពុងតែផ្ទុះឡើងយ៉ាងធ្ងន់ធ្ងរ ដែលគូភាគីទាំងសងខាងមិនអាចអត់ឱនឱ្យគ្នាបាននៅពេលនេះ។
ចំណែកអនុប្រធានវេទិកាពលរដ្ឋ លោក ម៉ែន ណាត បានលើកឡើងក្នុងកិច្ចពិភាក្សានេះដែរថា ការដុតបញ្ឆេះកំហឹងនយោបាយរបស់លោក សម រង្ស៊ី នៅពេលនេះមានបំណងតែមួយគត់ គឺរុញឱ្យលោក ហ៊ុន សែន ខឹងនឹងគាត់កាន់តែខ្លាំង ដែលទំនងជាមានបំណងចង់ឱ្យលោក ហ៊ុន សែន រំលាយគណបក្សភ្លើងទៀន ដើម្បីបង្ហាញអន្តរជាតិឱ្យឃើញពីទង្វើអាក្រក់នៃរដ្ឋាភិបាលរបស់កម្ពុជាកាន់តែខ្លាំងនៅមុនកិច្ចប្រជុំកំពូលអាស៊ាន-អឺរ៉ុបនៅដើមខែវិច្ឆិកា ឆ្នាំ២០២២ នេះ។
លោក ម៉ែន ណាត លើកឡើងថា ការដុតបញ្ឆេះកំហឹងគំនុំផ្ទាល់ខ្លួនដោយយកព្រះមហាក្សត្រមកធ្វើជាឧបករណ៍ក្រោមល្បិចញុះញង់ ដោយទាញការប្រៀបធៀបព្រះអង្គថានឹងមានវាសនាបាត់បង់រាជបល្ល័ង្កដូចគ្នាទៅនឹងស្តេចអ៊ីតាលី Victor Emmanuel ទី៣ ក្រោមអំណាចមេដឹកនាំផ្ដាច់ការរបស់លោក Benito Mussolini នោះ គឺជារឿងមិនគួរប្រព្រឹត្តនោះឡើយ ព្រោះថាទង្វើរបស់លោក សម រង្ស៊ី ចំពោះព្រះមហាក្សត្រខ្មែរនៅពេលនេះ ក៏មិនខុសគ្នាប៉ុន្មានពីលោក ហ៊ុន សែន និងមេដឹកនាំផ្ដាច់ការអ៊ីតាលី Benito Mussolini ដែលពួកគេបានប្រមាថចំពោះព្រះមហាក្សត្រខ្លួនឯងរហូតមកនោះដែរ។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ ធ្លាប់បានរិះគន់ថា ការប្រមាថព្រះមហាក្សត្រមិនត្រឹមតែប៉ះពាល់ធ្ងន់ធ្ងរដល់កិត្តិយសរបស់ព្រះមហាក្សត្រដែលការពារដោយរដ្ឋធម្មនុញ្ញប៉ុណ្ណោះទេ តែផ្ទុយទៅវិញ បែរជាបង្ហាញពីទង្វើរបស់អ្នកដែលប្រមាថព្រះអង្គថា បុគ្គលនោះកំពុងរំលោភរដ្ឋធម្មនុញ្ញកម្ពុជាយ៉ាងធ្ងន់ធ្ងរទៅវិញ។
មាត្រា៧ នៃរដ្ឋធម្មនុញ្ញកម្ពុជា បានចែងយ៉ាងច្បាស់ថា ព្រះមហាក្សត្រខ្មែរមិនអាចនរណារំលោភបំពានបានឡើយ។
ជម្លោះបុគ្គលរវាងមេដឹកនាំបក្សកាន់អំណាច លោក ហ៊ុន សែន និងអតីតមេដឹកនាំប្រឆាំង លោក សម រង្ស៊ី កាន់តែឆេះសន្ធោសន្ធៅឡើងៗបន្ទាប់ពីពួកគេបានបកស្រាយដណ្តើមយកឈ្នះរៀងខ្លួនពីការសម្រេចក្តីរបស់តុលាការទីក្រុងប៉ារីស ប្រទេសបារាំង កាលពីថ្ងៃទី១០ ខែតុលា កន្លងទៅ រហូតទាញព្រះមហាក្សត្រខ្មែរឲ្យចូលទៅក្នុងជម្លោះរបស់ពួកគេថែមទៀត ដែលធ្វើឱ្យស្ថានការណ៍នយោបាយនៅកម្ពុជាកាន់តែអាប់អួរទៅៗដូចសព្វថ្ងៃនេះ៕