 បង្ហាញជំហរបន្តធ្វើកូដកម្មនៅខាងមុខក្រុមហ៊ុន បើទោះបីជារងនូវការគំរាមកំហែង និងព្រមានចាត់វិធានការផ្លូវច្បាប់ពីសំណាក់អាជ្ញាធរក្រុងភ្នំពេញ ក្រោមហេតុផលប៉ះពាល់សណ្ដាប់ធ្នាប់សាធារណៈយ៉ាងណាក៏ដោយ។){kind=link}
ក្រុមកូដករណាហ្គាវើលដ៍ (NAGA World) បង្ហាញជំហរបន្តធ្វើកូដកម្មនៅខាងមុខក្រុមហ៊ុន បើទោះបីជារងនូវការគំរាមកំហែង និងព្រមានចាត់វិធានការផ្លូវច្បាប់ពីសំណាក់អាជ្ញាធរក្រុងភ្នំពេញ ក្រោមហេតុផលប៉ះពាល់សណ្ដាប់ធ្នាប់សាធារណៈយ៉ាងណាក៏ដោយ។
កាលពីថ្ងៃទី៥ ខែវិច្ឆិកា សាលារាជធានីភ្នំពេញបានស្នើឱ្យក្រុមកូដករក្រុមហ៊ុនណាហ្គាវើលដ៍ផ្អាកការធ្វើកូដកម្មចាប់ពីថ្ងៃទី៦ ដល់ថ្ងៃទី១៣ ខែវិច្ឆិកា នេះ ដោយថាការតវ៉ារបស់កូដករបានធ្វើឲ្យប៉ះពាល់ដល់សន្តិសុខ សណ្ដាប់ធ្នាប់ ខណៈកម្ពុជាត្រូវធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានចាប់ពីថ្ងៃទី១០ ដល់ថ្ងៃទី១៣ ខែវិច្ឆិកា នេះ។
ក្នុងករណីនេះ សាលារាជធានីភ្នំពេញក្រើនរំលឹកជាថ្មីទៀតដល់ក្រុមអ្នកតវ៉ា ត្រូវតែបញ្ឈប់ជាបន្ទាន់នូវសកម្មភាពប្រមូលផ្ដុំជួបជុំតវ៉ា ប៉ុន្តែប្រសិនបើពួកគេមិនផ្អាកតវ៉ាទេ ពួកគេនឹងប្រឈមមុខតាមផ្លូវច្បាប់។
កូដករដែលតវ៉ានៅខាងមុខក្រុមហ៊ុនណាហ្គាវើលដ៍ អ្នកស្រី សៀក បញ្ញា ចាត់ទុកការចេញសេចក្ដីប្រកាសព្រមានរបស់សាលារាជធានីភ្នំពេញ ថាមិនមែនជារឿងថ្មីសម្រាប់ពួកគាត់ទៀតឡើយ។
អ្នកស្រីបន្តថា បើអាជ្ញាធរមិនចង់ឲ្យកូដករធ្វើកូដកម្មបន្តទៀត ពួកគេគួរជំរុញឲ្យថៅកែក្រុមហ៊ុននេះដោះស្រាយវិវាទការងារដែលបានអូសបន្លាយជិត ២ឆ្នាំមកហើយ ដោយទម្លាក់រាល់បទចោទប្រកាន់លើថ្នាក់ដឹកនាំ និងតំណាងសហជីពទាំងអស់ ព្រមទាំងបណ្ដឹងដែលក្រុមហ៊ុនប្ដឹងកូដករអំឡុងពេលធ្វើកូដកម្មវិញ។
ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ មានប្រសាសន៍ថា រដ្ឋាភិបាល និងអាជ្ញាធរត្រូវតែដោះស្រាយវិវាទការងារមួយនេះ ជាជាងការចេញលិខិតកោះហៅ និងឱ្យកូដករផ្អាកធ្វើកូដកម្មទាំងមិនទាន់មានដំណោះស្រាយប្រកបដោយតម្លាភាពសម្រាប់ពួកគេផងនោះ។
អ្នកស្រីបន្តថា ការចេញលិខិតឱ្យកូដករផ្អាកធ្វើកូដកម្ម និងព្រមានចាត់វិធានការច្បាប់នេះ មិនមែនជាដំណោះស្រាយឡើយ ប៉ុន្តែវានឹងធ្វើឱ្យប៉ះពាល់មុខមាត់រដ្ឋាភិបាលទៅវិញទេ។
ក្រោយពីមានការធ្វើកូដកម្មអហិង្សាទាមទាររកដំណោះស្រាយរយៈពេលជិត ១១ខែមកនេះ កូដករជិត ១០នាក់ហើយត្រូវបានសាលាដំបូងរាជធានីភ្នំពេញកោះហៅឲ្យចូលបំភ្លឺ តាមបណ្ដឹងរបស់ថៅកែក្រុមហ៊ុនណាហ្គាវើលដ៍។
ថ្នាក់ដឹកនាំ និងសកម្មជនសហជីពចំនួន ១១នាក់ដែលជាតំណាងរបស់ក្រុមកូដករណាហ្គាវើលដ៍ ត្រូវបានតុលាការចោទប្រកាន់ និងឃុំខ្លួនជាបណ្ដោះអាសន្នក្រោមការចោទពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» និងបទ «រារាំងការអនុវត្តវិធានការទប់ស្កាត់ការរាលដាលជំងឺកូវីដ-១៩»។
យ៉ាងណាក៏ដោយ ការចេញលិខិតព្រមានវិធានការច្បាប់លើកូដករពីសំណាក់អាជ្ញាធររាជធានីភ្នំពេញ ធ្វើឡើងស្របពេលដែលកម្ពុជាត្រូវធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានពីថ្ងៃទី១០ ដល់ថ្ងៃទី១៣ ខែវិច្ឆិកា ដែលមានការចូលរួមពីបណ្ដាមេដឹកនាំកំពូលៗក្នុងពិភពលោក ជាពិសេសប្រធានាធិបតីសហរដ្ឋអាមេរិក លោក ចូ បៃដិន៕