 ដែលជំរុញឲ្យបើកលំហសេរីភាពដល់សង្គមស៊ីវិល ព្រមទាំងនយោបាយនៅកម្ពុជា និងដោះលែងកញ្ញា សេង ធារី ដោយលោកបង្វែរឲ្យទៅសួរសហរដ្ឋអាមេរិកដោយខ្លួនឯងវិញ។){kind=link}
បុរសខ្លាំងកាន់អំណាចជិត ៤០ឆ្នាំ លោក ហ៊ុន សែន បដិសេធមិនឆ្លើយសំណួរអ្នកសារព័ត៌មានដែលបានចោទសួររឿងប្រធានាធិបតីអាមេរិក លោក ចូ បៃដិន (Joe Biden) ដែលជំរុញឲ្យបើកលំហសេរីភាពដល់សង្គមស៊ីវិល ព្រមទាំងនយោបាយនៅកម្ពុជា និងដោះលែងកញ្ញា សេង ធារី ដោយលោកបង្វែរឲ្យទៅសួរសហរដ្ឋអាមេរិកដោយខ្លួនឯងវិញ។
ប្រតិកម្មរបស់លោក ហ៊ុន សែន ធ្វើឡើងក្នុងសន្និសីទសារព័ត៌មានស្ដីពីលទ្ធផលនៃកិច្ចប្រជុំកំពូលអាស៊ានដែលបានបញ្ចប់កាលថ្ងៃអាទិត្យ ទី១៣ វិច្ឆិកា នេះ។
ក្នុងសន្និសីទនោះ អ្នកសារព័ត៌មានបានសួរលោក ហ៊ុន សែន ជុំវិញសេចក្តីប្រកាសព័ត៌មានរបស់សេតវិមាននៃសហរដ្ឋអាមេរិក ស្ដីពីជំនួបទ្វេភាគីរវាងលោក ហ៊ុន សែន ជាមួយប្រធានាធិបតីអាមេរិក លោក ចូ បៃដិន (Joe Biden) កាលពីថ្ងៃទី១២ ខែវិច្ឆិកា ឆ្នាំ២០២២ ប៉ុន្តែលោក ហ៊ុន សែន បានបដិសេធមិនឆ្លើយតបចំពោះសំណួរអ្នកសារព័ត៌មាន ហើយថែមទាំងជំរុញឲ្យអ្នកសារព័ត៌មានទៅសួរសហរដ្ឋអាមេរិកដោយខ្លួនឯង បើពួកគេចង់ដឹងនោះ ហើយកុំមកសួរលោក ព្រោះលោកដឹងតែធ្វើកិច្ចការងារប្រទេសរបស់លោកប៉ុណ្ណោះ។
លោក ហ៊ុន សែន បញ្ជាក់ក្នុងសន្និសីទសារព័ត៌មានស្ដីពីលទ្ធផលនៃកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធថា ប្រធានាធិបតីអាមេរិក លោក ចូ បៃដិន (Joe Biden) ក៏មិនបានលើកឡើងអ្វីច្រើនដែរ។
ផ្ទុយពីការលើកឡើងរបស់លោក ហ៊ុន សែន បើតាមសេចក្តីប្រកាសព័ត៌មានរបស់សេតវិមានសហរដ្ឋអាមេរិក បញ្ជាក់ថា ក្នុងជំនួបទ្វេភាគីជាមួយលោក ហ៊ុន សែន នោះ ប្រធានាធិបតីសហរដ្ឋអាមេរិក លោក Joe Biden បានជំរុញឲ្យរដ្ឋាភិបាលកម្ពុជាដោះលែងសកម្មជនដែលកំពុងជាប់ឃុំនៅពន្ធនាគារ ក្នុងនោះមានកញ្ញា សេង ធារី មេធាវីសញ្ជាតិខ្មែរអាមេរិកាំង បើកលំហសេរីភាពសង្គមស៊ីវិល និងនយោបាយនៅមុនការបោះឆ្នោតឆ្នាំ២០២៣ ខាងមុខ។
ក្រៅពីជំរុញបើកលំហសិទ្ធិសេរីភាពហើយ លោក Joe Biden ក៏បង្ហាញការព្រួយបារម្ភទាក់ទងនឹងស្ថានភាពនៅមូលដ្ឋានកងទ័ពជើងទឹករាម និងសង្កត់ធ្ងន់ពីសារសំខាន់នៃតម្លាភាពពេញលេញអំពីសកម្មភាពរបស់យោធាចិន នៅមូលដ្ឋានកងទ័ពជើងទឹករាមនៅខេត្តព្រះសីហនុ ផងដែរ។
ការជំរុញ និងបង្ហាញក្ដីបារម្ភរបស់ប្រធានាធិបតីសហរដ្ឋអាមេរិក លោក Joe Biden ធ្វើឡើងក្នុងអំឡុងពេលជំនួបទ្វេភាគីជាមួយលោក ហ៊ុន សែន ស្របពេលដែលលោកមកចូលរួមកិច្ចប្រជុំអាស៊ានដែលកម្ពុជាធ្វើជាម្ចាស់ផ្ទះ។
ទាក់ទងនឹងសន្និសីទសារព័ត៌មានស្ដីពីលទ្ធផលនៃកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធនេះ អ្នកសារព័ត៌មានមកពីស្ថាប័នព័ត៌មានចំនួនពីរ គឺវិទ្យុសំឡេងសហរដ្ឋអាមេរិក (VOA) និងវីអូឌី (VOD) មិនត្រូវបានអនុញ្ញាតឲ្យចូលយកព័ត៌មានក្នុងសន្និសីទសារព័ត៌មានរបស់លោក ហ៊ុន សែន ឡើយ ក្រោមហេតុផលថាថ្នាក់លើបញ្ជា។
អ្នកនាំពាក្យសមាគមសិទ្ធិមនុស្សអាដហុក លោក ស៊ឹង សែនករុណា ថ្លែងថា កម្ពុជាគួរតែបញ្ជាក់ការពិតឱ្យប្រជាជនបានដឹង ដើម្បីធានាថាកម្ពុជាពិតជាប្រទេសមួយដែលប្រកាន់លទ្ធិប្រជាធិបតេយ្យ។ លោកថា កម្ពុជាត្រូវពិចារណារាល់ការលើកឡើងរបស់ប្រធានាធិបតីអាមេរិក ក្នុងការបើកលំហលទ្ធិប្រជាធិបតេយ្យក្នុងប្រទេសឡើងវិញ ដើម្បីជាផលប្រយោជន៍រួមរបស់កម្ពុជា។
លោកអះអាងថា លោកមានការព្រួយបារម្ភ ព្រោះការលើកឡើងទាំងអស់នេះក្នុងនាមជាប្រធានាធិបតីសហរដ្ឋអាមេរិក គេមិនចេះតែលើកមកនិយាយចោលនោះទេ។ កម្ពុជាគួរតែមានការបញ្ជាក់ឱ្យមានភាពច្បាស់លាស់។
ប្រធានវេទិកាពលរដ្ឋ និងជាអ្នកវិភាគនយោបាយ លោក គឹម សុខ យល់ថា ប្រតិកម្មរបស់លោក ហ៊ុន សែន ជាមួយនឹងអ្នកសារព័ត៌មាននេះអាចជាមូលហេតុមួយដែលមិនព្រមអនុញ្ញាតឲ្យអ្នកកាសែត VOD និង VOA ចូលសួរក្នុងសន្និសីទស្ដីពីលទ្ធផលកិច្ចប្រជុំកំពូលអាស៊ាន ពីព្រោះលោក ហ៊ុន សែន ក៏គ្មានអ្វីឆ្លើយនឹងសំណើរបស់ប្រធានាធិបតីនៃសហរដ្ឋអាមេរិក លោក ចូ បៃដិន ដែរ៕