បេក្ខជននាយករដ្ឋមន្ត្រី លោក ហ៊ុន ម៉ាណែត បបួលលោក សម រង្ស៊ី ភ្នាល់ដាក់ជីវិតនយោបាយករណីលោក សម រង្ស៊ី ចោទលោកថាបានបន្លំយកលុយ ៥លានដុល្លារទិញទឹកចិត្តពលរដ្ឋខ្មែរដែលរស់នៅប្រទេសបារាំង និងនៅទ្វីបអឺរ៉ុប។
លោក ហ៊ុន ម៉ាណែត អះអាងថា ប្រសិនបើការចោទនោះជាការពិតមែន លោកសុខចិត្តដើរចេញពីឆាកនយោបាយ ប៉ុន្តែបើមិនពិតវិញ លោក សម រង្ស៊ី ត្រូវឈប់ធ្វើនយោបាយអស់មួយជីវិត។
ប្រតិកម្មរបស់លោក ហ៊ុន ម៉ាណែត ធ្វើឡើងបន្ទាប់ពីលោក សម រង្ស៊ី សរសេរលើហ្វេសប៊ុកកាលពីថ្ងៃទី១៥ ខែវិច្ឆិកា ឆ្នាំ២០២២ ដោយចោទថា លោក ហ៊ុន ម៉ាណែត បានបន្លំយកលុយ ៥លានដុល្លារទិញទឹកចិត្តខ្មែរដែលរស់នៅបារាំង និងទ្វីបអឺរ៉ុប ដើម្បីឲ្យចុះចូលបក្សប្រជាជនកម្ពុជា កាលពីអំឡុងឆ្នាំ២០១៦ ប៉ុន្តែសកម្មភាពលោក ហ៊ុន ម៉ាណែត មិនបានសម្រេចដោយសារនគរបាលបារាំងទប់ស្កាត់ ហើយបានដកទឹកប្រាក់ ៥លានដុល្លារទុករហូតដល់សព្វថ្ងៃនេះ។
ទោះជាយ៉ាងណាក៏ដោយ លោក ហ៊ុន ម៉ាណែត ចាត់ទុកការលើកឡើងរបស់លោក សម រង្ស៊ី ថាជាការប្រឌិតរឿងដើម្បីវាយប្រហារលើរូបលោកពីក្រោយខ្នង ដោយសារលោក សម រង្ស៊ី បរាជ័យក្នុងការព្យាយាមបំផ្លាញជីវិតនយោបាយឪពុករបស់លោក។ លោកបន្តថា បច្ចុប្បន្ន លោក សម រង្ស៊ី និងបក្ខពួកក៏បានព្យាយាមរិះរកគ្រប់មធ្យោបាយក្នុងការប្រឌិតរឿងយកមកចោទប្រកាន់ ក្នុងគោលបំណងដើម្បីសម្លាប់ជីវិតនយោបាយរបស់លោកដែរ។
លោក ហ៊ុន ម៉ាណែត បានជំរុញឲ្យលោក សម រង្ស៊ី បង្ហាញភស្តុតាងដែលចោទប្រកាន់ដោយថា បើរឿងនេះពិតមែន លោក សម រង្ស៊ី គួរតែហ៊ានភ្នាល់ជាមួយលោក ដើម្បីបញ្ចប់ជីវិតនយោបាយរបស់លោកតែម្តងទៅ តែប្រសិនបើរឿងនេះមិនមែនជាការពិតនោះ លោក សម រង្សី ត្រូវដកខ្លួនចេញពីសកម្មភាពនយោបាយមួយជីវិតដែរ ដោយឈប់លួចវាយប្រហារលើរូបលោកពីក្រោយខ្នងដោយឥតអៀនខ្មាសទៀត។
លោក ហ៊ុន ម៉ាណែត បានស្នើទៅលោក សម រង្ស៊ី រក្សាភាពថ្លៃថ្នូរផ្ទាល់ខ្លួនដើម្បីកុំឲ្យមហាជនរិះគន់ថា ខ្លួនជាអ្នកនយោបាយចាស់វស្សាម្នាក់ដែរ ប៉ុន្តែបែរជាអន់ចរិត។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ ចាត់ទុកការយករឿងបុគ្គលមកវាយប្រហារគ្នារវាងអ្នកនយោបាយចាស់វស្សា និងយុវជនបន្តវេនជានាយករដ្ឋមន្ត្រីនៅពេលនេះ ថាជាគំរូអាក្រក់ដែលមិនគួរកើតមានឡើងឡើយ។ លោកបន្តថា ការវាយប្រហារគ្នាបែបនេះមិនបានឆ្លុះបញ្ចាំងអំពីសុជីវធម៌ល្អ និងរបៀបធ្វើនយោបាយក្នុងនាមជាបុគ្គលដែលជាមេដឹកនាំជាតិនៅថ្ងៃអនាគតនោះទេ។
លោក សេក សុជាតិ កត់សម្គាល់ឃើញថា ទាំងលោក សម រង្ស៊ី និងលោក ហ៊ុន ម៉ាណែត ហាក់មិនគិតអំពីផលប្រយោជន៍ប្រទេសជាតិ ទើបបាននាំគ្នាយករឿងផ្ទាល់ខ្លួន និងរឿងគ្រួសារមកវាយប្រហារគ្នាដោយលាយឡំជាមួយនឹងរឿងប្រទេសជាតិ។
លោកបញ្ជាក់ថា ការធ្វើនយោបាយបែបនេះមិនបានឆ្លុះបញ្ចាំងភាពជាមេដឹកនាំនយោបាយដែលមានការគោរព និងផ្ដល់តម្លៃពីពលរដ្ឋ និងសកម្មជនឡើយ។
ស្ថាបនិកអង្គការអភិវឌ្ឍន៍ផ្នត់គំនិតរូបនេះយល់ថា បើអ្នកនយោបាយយករឿងផ្ទាល់ខ្លួន និងគ្រួសារមកវាយប្រហារគ្នាបន្តទៀតដើម្បីយកឈ្នះចាញ់គ្នា នោះវាជាការធ្វើនយោបាយបែបប្រជាភិថុតិតែប៉ុណ្ណោះ ហើយវានឹងបង្កឲ្យមានអំពើហិង្សា និងធ្វើឲ្យប្រទេសជាតិកាន់តែបែកបាក់បន្ថែមទៀត។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា សង្កេតឃើញថា អ្នកនយោបាយនៅក្រៅប្រទេស និងក្នុងប្រទេសហាក់មិនមានតម្លាភាពក្នុងការបង្ហាញភស្តុតាង និងសម្អាងត្រឹមត្រូវឡើយ។ លោកថា វោហារសព្ទឆ្លើយឆ្លងរបស់អ្នកនយោបាយបក្សប្រឆាំង និងគណបក្សប្រជាជនកម្ពុជានេះមិនបានផ្តល់ផលចំណេញអ្វីដល់ប្រទេសជាតិឡើយ ផ្ទុយទៅវិញនឹងធ្វើឱ្យប៉ះពាល់ដល់មុខមាត់ប្រទេសជាតិទៅវិញទេ។
លោក ហ៊ុន ម៉ាណែត ធ្លាប់ប្រកាសបបួលលោក សម រង្ស៊ី ភ្នាល់ដាក់ជីវភាពនយោបាយម្ដងរួចមកហើយនៅពេលដែលលោក សម រង្ស៊ី រិះគន់លោកថាបានទទួលសញ្ញាបត្រយោធាកម្រិត២ ឬសញ្ញាបត្រកិត្តិយសពីសាលាបណ្ឌិតសភាយោធា West Point ដ៏ល្បីរបស់សហរដ្ឋអាមេរិក៕