កាលពីថ្ងៃចន្ទ ទី២១ វិច្ឆិកា ក្រុមប្រឹក្សាសន្តិសុខអង្គការសហប្រជាជាតិ បានបើកប្រជុំនៃថ្នាក់ឯកអគ្គរដ្ឋទូតរបស់ខ្លួន ដើម្បីពិនិត្យដំណោះស្រាយមួយដែលឈានទៅដល់ការដាក់ទណ្ឌកម្មកម្រិតថ្មីមួយទៀតទៅលើរបបទីក្រុងព្យុងយ៉ាង នៃប្រទេសកូរ៉េខាងជើង។
យោងតាមសារព័ត៌មាន The New York Times បានចុះផ្សាយថា កិច្ចប្រជុំនោះពុំបានឈានដល់ការសម្រេចអ្វីមួយនោះទេក្នុងការដាក់ទណ្ឌកម្មទៅលើប្រទេសកូរ៉េខាងជើង។ បើតាមប្រភពដដែលនេះ ប្រទេសមហាអំណាចរុស្ស៊ី និងចិន បានបោះឆ្នោតជំទាស់មិនឱ្យមានវិធានការណាមួយប្រឆាំងនឹងរបបទីក្រុងព្យុងយ៉ាង នោះទេ។
ចិន និងរុស្ស៊ី ជាសមាជិកអចិន្ត្រៃយ៍នៅក្នុងក្រុមប្រឹក្សាសន្តិសុខអង្គការសហប្រជាជាតិ ដែលសិទ្ធិវេតូរបស់ពួកគេគឺមានអានុភាពរាំងខ្ទប់មិនឱ្យមានវិធានការណាមួយអាចចេញរួចនោះទេ។
ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិ គឺអ្នកស្រី Linda Thomas-Greenfield បានថ្កោលទោសភ្លាមៗចំពោះប្រទេសកូរ៉េខាងជើង ដែលគំរាមបង្កភ្នក់ភ្លើងសង្គ្រាមនៅលើឧបទ្វីប ដោយបាញ់គ្រាប់មីស៊ីលអន្តរទ្វីបឱ្យហោះរំលងប្រទេសជប៉ុន ហើយមីស៊ីលនោះវាគំរាមកំហែងធ្ងន់ធ្ងរដល់ប្រព័ន្ធសន្តិសុខលើឧបទ្វីប។
អ្នកស្រីបានថ្លែងទៀតថា នៅដំណាក់កាលចុងក្រោយនេះ កូរ៉េខាងជើងបានបាញ់មីស៊ីលប៉ាឡេស្ទិក ICBM ដោយបាញ់បង្កសង្គ្រាមតែម្ដង ហើយព្រមានថាមីស៊ីលនេះវាអាចបាញ់ធ្លាក់ដល់ទឹកដីសហរដ្ឋអាមេរិកទៀតផង។
បើតាមឯកអគ្គរដ្ឋទូតសហរដ្ឋអាមេរិករូបនេះ គឺកូរ៉េខាងជើង បាញ់មីស៊ីលប៉ាឡេស្ទិកគិតមកដល់ត្រឹមថ្ងៃទី២០ ខែវិច្ឆិកា នេះ គឺចំនួន ៦៣គ្រាប់ហើយនៅឆ្នាំ២០២២ នេះ។ អ្នកស្រីព្រមានថា តើបណ្ដោយឱ្យប្រទេសគឃ្លើនមួយនេះរំលងច្បាប់អង្គការសហប្រជាជាតិដល់ណាទៀត។
នៅឯកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃចន្ទ គេកត់សម្គាល់ឃើញថា កិច្ចប្រជុំនេះធ្វើឡើង ១០លើកមកហើយ ដើម្បីរកដំណោះស្រាយរួមមួយប្រឆាំងនឹងអនុត្តរភាពយោធានិយមរបស់ប្រទេសកូរ៉េខាងជើង តែពុំអាចមានមតិរួមគ្នាបាននោះទេ។
បើតាមប្រភពព័ត៌មានរបស់ The New York Times ប្រទេសធំពីរ គឺចិន និងរុស្ស៊ី បានធ្វើសេចក្ដីសម្រេចរាំងខ្ទប់ដំណោះស្រាយនេះ គឺញឹកញាប់បំផុតដោយមានគោលដៅមិនឱ្យមានវិធានការទៅលើរបបនៅទីក្រុងព្យុងយ៉ាង នោះទេ។ បើនិយាយទៅ មួយឆ្នាំនេះកិច្ចប្រជុំចំនួន ១០លើកពាក់ព័ន្ធនឹងកូរ៉េខាងជើង គឺប្រទេសធំពីរនេះបោះឆ្នោតជំទាស់ទាំងចំនួន ១០លើក។
អ្នកស្រីឯកអគ្គរដ្ឋទូតសហរដ្ឋអាមេរិកបានថ្លែងថា រុស្ស៊ី និងចិន លើកឡើងថាវាជាល្បែងសង្គ្រាមដែលសហរដ្ឋអាមេរិក និងកូរ៉េខាងត្បូងជាអ្នកផ្ដើម ដែលធ្វើឱ្យកូរ៉េខាងជើងបាញ់គ្រាប់មីស៊ីលដូចនេះ។ អ្នកស្រីបានថ្លែងថា បន្តិចទៀតនៅពេលខាងមុខនេះ កូរ៉េខាងជើងនឹងបាញ់គ្រាប់នុយក្លេអ៊ែរ ព្រោះពេលនេះទីក្រុងព្យុងយ៉ាងទទួលបានការគាំទ្រពីពួកមហាអំណាចទៅហើយ។
ឯកអគ្គរដ្ឋទូតប្រទេសចិនប្រចាំអង្គការសហប្រជាជាតិ លោក Zhang Jun បានថ្លែងថា ក្រុមប្រឹក្សាសន្តិសុខពុំអាចដើរតួនាទីជាអាជ្ញាកណ្ដាលបាននោះទេ ព្រោះពេលនេះប្រទេសទាំងអស់សុទ្ធតែមានការបែងចែកបក្សសម្ព័ន្ធរួចទៅហើយ។
គេកត់សម្គាល់ឃើញថា ចិន និងរុស្ស៊ី មិនថាឡើយរាំងខ្ទប់ចំពោះដំណោះស្រាយប្រឆាំងនឹងកូរ៉េខាងជើងនោះទេ សូម្បីតែចេញសេចក្ដីថ្លែងការណ៍រួមមួយថ្កោលទោសពួកយោធាភូមា ដែលធ្វើរដ្ឋប្រហារទម្លាក់រដ្ឋាភិបាលរបស់អ្នកស្រី អ៊ុងសាន ស៊ូជី ក៏ប្រទេសពីរនេះបោះឆ្នោតជំទាស់ផងដែរ។
គេកត់សម្គាល់ឃើញទៀតថា នៅពេលពិភពលោកភាគច្រើនថ្កោលទោសរុស្ស៊ីឈ្លានពានអ៊ុយក្រែន គឺប្រទេសចិន តែងតែជំទាស់ គឺជំទាស់ទាំងនៅក្រុមប្រឹក្សាសន្តិសុខ និងនៅមហាសន្និបាតអង្គការសហប្រជាជាតិ។ តែយ៉ាងណា កូរ៉េខាងជើងដែលស្ថិតនៅក្រោមរបបផ្ដាច់ការសន្តតិវង្ស គឺជាកូនអុករបស់របបកុម្មុយនីស្តចិន។
រយៈពេលមួយខែមកនេះ វិថីទៅរកសង្គ្រាមមានភាពផុយស្រួយបំផុត។ ប្រទេសកូរ៉េបងប្អូនទាំងពីរនេះ បានបាញ់គ្រាប់កាំភ្លើងធំជាច្រើនសិបគ្រាប់គំរាមគ្នា ដោយពួកគេបាញ់ធ្លាក់ទៅក្នុងសមុទ្រលឿងដែលស្ថិតដែនទឹកនៃប្រទេសទាំងពីរ។
ចំណែកសហរដ្ឋអាមេរិកដែលជាសម្ពន្ធមិត្តរបស់កូរ៉េខាងត្បូង និងជប៉ុន បានធ្វើសមយុទ្ធយន្តហោះចម្បាំង និងនាវាចម្បាំងរួមគ្នាជាញឹកញាប់ ឆ្លើយតបនឹងកូរ៉េខាងជើងដែលបាញ់មីស៊ីលជាច្រើនគ្រាប់ធ្លាក់ទៅសមុទ្រជប៉ុន ដែលក្រុងវ៉ាស៊ីនតោន គំរាមបញ្ចប់របបផ្ដាច់ការនៅក្រុងព្យុងយ៉ាង បើស្ថានការណ៍តានតឹងធ្លាក់ចូលក្នុងសង្គ្រាម៕