 ដើម្បីលើកកម្ពស់ការគោរព និងការការពារសិទ្ធិសេរីភាពរបស់ជនជាប់ឃុំ។){kind=link}
ប្រធានគណៈកម្មាធិការសិទ្ធិមនុស្សកម្ពុជា ចាប់ផ្តើមរៀបចំឱ្យមានប្រអប់បណ្តឹងនៅមណ្ឌលអប់រំកែប្រែម១ មណ្ឌលអប់រំកែប្រែម២ ដែលគេស្គាល់ថាជាពន្ធនាគារព្រៃស និងពន្ធនាគាររាជធានីភ្នំពេញ (PJ) ដើម្បីលើកកម្ពស់ការគោរព និងការការពារសិទ្ធិសេរីភាពរបស់ជនជាប់ឃុំ។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានអះអាងក្នុងពិធីដាក់ប្រអប់បណ្តឹងរបស់គណៈកម្មាធិការសិទ្ធិមនុស្សកម្ពុជានៅតាមពន្ធនាគារកម្ពុជា កាលពីថ្ងៃទី២៤ ខែវិច្ឆិកា ឆ្នាំ២០២២ នេះថា ជនជាប់ឃុំគ្រប់រូបអាចដាក់ពាក្យបណ្ដឹងតវ៉ារបស់ខ្លួនដោយសម្ងាត់តាមរយៈប្រអប់បណ្តឹងនេះ ពាក់ព័ន្ធនឹងភាពមិនប្រក្រតីនានាក្នុងពន្ធនាគារ ក៏ដូចជាការអនុវត្តនូវសិទ្ធិសេរីភាពរបស់ខ្លួន ដាក់ជូនគណៈកម្មាធិការសិទ្ធិមនុស្សកម្ពុជាដើម្បីពិនិត្យ អង្កេត និងដោះស្រាយ។
លោក កែវ រ៉េមី បញ្ជាក់ថា ការដាក់ប្រអប់បណ្ដឹងនៅមណ្ឌលអប់រំកែប្រែម១ មណ្ឌលអប់រំកែប្រែម២ និងពន្ធនាគាររាជធានីភ្នំពេញ (PJ) គឺជាចំណុចចាប់ផ្ដើម និងជាគម្រោងសាកល្បងមុនពេលឈានដល់ការសម្រេចដាក់ប្រអប់បណ្តឹងរបស់គណៈកម្មាធិការសិទ្ធិមនុស្សកម្ពុជា នៅគ្រប់បណ្តាពន្ធនាគារទូទាំងរាជធានី-ខេត្តនៃប្រទេសកម្ពុជានៅថ្ងៃមុខ។
អ្នកនាំពាក្យអគ្គនាយកដ្ឋានពន្ធនាគារ លោក នុត សវនា ប្រាប់សារព័ត៌មានក្នុងស្រុកថា ការដាក់ប្រអប់ទទួលពាក្យបណ្តឹងនេះមានការឯកភាពពីក្រសួងមហាផ្ទៃ ដោយផ្អែកលើវិធានការអន្តរជាតិក្នុងការការពារសិទ្ធិជនជាប់ឃុំ។
លោកអះអាងថា អ្នកដែលកាន់សោប្រអប់សំបុត្រនេះ គឺជាមន្ត្រីរបស់គណៈកម្មាធិការសិទ្ធិមនុស្សកម្ពុជា បើទោះជាប្រអប់សំបុត្រនេះស្ថិតក្នុងទីតាំងពន្ធនាគារក៏ដោយ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី២៥ វិច្ឆិកា នេះថា ខាងសង្គមស៊ីវិលស្វាគមន៍ចំពោះការដាក់ប្រអប់បណ្តឹង ដើម្បីធានានូវការអនុវត្តសិទ្ធិមនុស្សឱ្យបានពេញលេញ ទោះពួកគេត្រូវជាប់ពន្ធនាគារក៏ដោយ ប៉ុន្តែសង្គមស៊ីវិលនៅមិនទាន់អាចសន្និដ្ឋានបានទេថា ការអនុវត្តរបស់គណៈកម្មាធិការសិទ្ធិមនុស្សកម្ពុជាមានប្រសិទ្ធភាព ឬក៏អត់នោះ។
លោក ស៊ឹង សែនករុណា លើកឡើងថា ដើម្បីឱ្យអ្នកជាប់ពន្ធនាគាររាយការណ៍ពីភាពមិនប្រក្រតី ឬការរំលោភបំពានណាមួយក្នុងពន្ធនាគារ លុះត្រាតែគណៈកម្មាធិការសិទ្ធិមនុស្សអាចធានានូវសុវត្ថិភាពរបស់ពួកគេ គ្មានការធ្វើទុក្ខបុកម្នេញបន្ទាប់ពីការរាយការណ៍របស់ខ្លួន ប៉ុន្តែបើគ្រាន់តែមានប្រអប់បណ្តឹង ហើយគ្មាននីតិវិធីណាមួយដើម្បីជួយធានាសុវត្ថិភាពជនរងគ្រោះ នោះការដាក់ប្រអប់បណ្តឹងនេះគ្មានប្រសិទ្ធភាពអ្វីទាំងអស់។
មន្ត្រីជាន់ខ្ពស់ទទួលបន្ទុកសិទ្ធិមនុស្សរូបនេះបញ្ជាក់ថា គណៈកម្មាធិការសិទ្ធិមនុស្សកម្ពុជាក៏ត្រូវតែបង្រៀន និងផ្សព្វផ្សាយទៅដល់អ្នកជាប់ឃុំឱ្យមានការយល់ដឹងអំពីនីតិវិធីក្នុងការរាយការណ៍របស់ពួកគេដែរ ចៀសវាងការច្រានចោលនៅពេលដែលជនរងគ្រោះរាយការណ៍ ក្រោមហេតុផលថាគ្មានភស្តុតាង និងគ្មានភាពជាក់លាក់នៃសេចក្តីរាយការណ៍នោះ ដែលជាហេតុធ្វើឱ្យបាក់ទឹកចិត្តដល់ជនរងគ្រោះទៅវិញ។
កាលពីថ្ងៃទី១៤ ខែមីនា ឆ្នាំ២០២២ អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកផ្នែកសិទ្ធិមនុស្សនៅកម្ពុជា លោក វិទិត ម៉ុនតាប៊ន (Vitit Muntarbhorn) ធ្លាប់បានជំរុញឱ្យមានវិធានការទប់ស្កាត់ការធ្វើទារុណកម្មទៅលើអ្នកជាប់ឃុំ ក្រោយរកឃើញថាតុលាការកម្ពុជាបានខកខានផ្តល់យុត្តិធម៌ដល់ក្រុមគ្រួសារអ្នកជាប់ឃុំដែលបានស្លាប់នៅក្នុងពន្ធនាគារ។ ជាងនេះទៀត ចំនួនអ្នកជាប់ពន្ធនាគារនៅកម្ពុជាមានច្រើនជាង ៣ដងនៃសមត្ថភាពដែលពន្ធនាគារដាក់អ្នកជាប់ឃុំទាំងនោះបាន។
ការិយាល័យឧត្តមស្នងការអង្គការសហប្រជាជាតិ បានត្អូញត្អែរថា ស្ថានភាពនៅក្នុងពន្ធនាគារជាហានិភ័យដែលអាចឈានទៅរកករណីបង្កឱ្យមានការប្រព្រឹត្តអំពើឃោរឃៅ អមនុស្សធម៌ធ្ងន់ធ្ងរ ដោយសារតែកម្រិតនៃការឈឺចាប់ផ្នែកស្មារតី ផ្លូវចិត្ត និងរាងកាយដែលអ្នកជាប់ឃុំជួបប្រទះ ដូចជាកន្លែងគេងមានសភាពចង្អៀតណែន ខ្វះទឹកស្អាត និងអនាម័យ ខ្វះខ្យល់អាកាសបរិសុទ្ធ និងការថែទាំសុខភាព ជាដើម។
ទាក់ទិននឹងបញ្ហានេះ ប្រធានសមាគមការពារសិទ្ធិមនុស្សអាដហុក លោក នី សុខា ធ្លាប់បានជំរុញរដ្ឋាភិបាលកម្ពុជាកាលពីពេលកន្លងទៅ ឱ្យមានគណៈកម្មាធិការស៊ើបអង្កេតឯករាជ្យលើករណីធ្វើទារុណកម្មនានានៅក្នុងពន្ធនាគារ ដែលករណីខ្លះមានការធ្វើទារុណកម្មរហូតដល់ស្លាប់។ ក្រៅពីនេះ លោកទាមទារឱ្យមានការបើកទូលាយ ដោយអនុញ្ញាតឱ្យអង្គការជាតិ និងអន្តរជាតិដែលមានភារកិច្ចពាក់ព័ន្ធ អាចចូលពិនិត្យនៅតាមមន្ទីរឃុំឃាំងនានាផងដែរ ប៉ុន្តែសំណើនេះមិនត្រូវបានទទួលការស្វាគមន៍ពីរដ្ឋាភិបាលកម្ពុជានោះឡើយ៕