32 C
Phnom Penh

អ្នក​ឃ្លាំមើល៖ បើ​បណ្ឌិត យ៉ង សាំងកុមារ ជោគជ័យ​លើក​ស្ទួយ​វិស័យ​កសិកម្ម​នោះ​បង្ហាញ​ថា​លោក ហ៊ុន សែន គ្មាន​សមត្ថភាព​ជួយ​កសិករ

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​រស់នៅ​ក្រៅ​ស្រុក​ថា ប្រសិនបើ​លោក​នាយករដ្ឋមន្ត្រី ហ៊ុន សែន អនុវត្ត​តាម​គម្រោង​លើកឡើង​ចំនួន «១២​ខ» របស់​បណ្ឌិត យ៉ង សាំងកុមារ ទទួល​បាន​ជោគជ័យ គឺ​បង្ហាញ​ថា​ការ​ដឹកនាំ​ប្រទេស​ជាង ៤០​ឆ្នាំ​របស់​លោក ហ៊ុន សែន គឺ​មិន​ដឹង​អ្វី​ទាំងអស់​ក្នុង​ការ​លើកស្ទួយ​វិស័យ​កសិកម្ម​របស់​ខ្លួន។

ប្រធាន​វេទិកា​ពលរដ្ឋ លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃទី​២៨ វិច្ឆិកា នេះ​ថា បើ​លោក ហ៊ុន សែន អនុវត្ត​តាម​គម្រោង​របស់​បណ្ឌិត យ៉ង សាំងកុមារ ទទួល​បាន​ជោគជ័យ នោះ​គឺ​មាន​ន័យ​ថា​ការ​ដឹកនាំ​ប្រទេស​ជាង ៤០​ឆ្នាំ​របស់​គាត់ គឺ​មិន​ដឹង​អ្វី​ទាំងអស់​ក្នុង​ការ​លើកស្ទួយ​វិស័យ​កសិកម្ម​របស់​ខ្លួន។ លើស​ពី​នេះ តើ​លោក ហ៊ុន សែន នឹង​អនុវត្ត​នូវ​គម្រោង​នេះ​ទេ ប្រសិនបើ​វា​ប៉ះពាល់​ដល់​ផល​ប្រយោជន៍​របស់​បក្ស​កាន់​អំណាច ឬ​ផល​ប្រយោជន៍​សែស្រឡាយ​បក្ខពួក​របស់​គាត់ ដែល​កំពុង​កេង​ចំណេញ​លើ​វិស័យ​នេះ។

ប្រធាន​វេទិកា​ពលរដ្ឋ​រូប​នេះ​សម្ដែង​នូវ​ការ​ព្រួយបារម្ភ​ថា នៅ​ពេល​ដែល​បណ្ឌិត យ៉ង សាំងកុមារ ក្លាយ​ទៅ​ជា​សមាជិក​បក្ស​កាន់​អំណាច​ហើយ ជួយ​អ្វី​ដល់​ពលរដ្ឋ​មិន​បាន ដោយសារ​គំនាប​ណា​មួយ​នោះ ប៉ុន្តែ​បែរ​ជំនួស​មក​វិញ​នូវ​សកម្មភាព​ការពារ​ទង្វើ​អយុត្តិធម៌​ដែល​បាន​បង្កើត​ឡើង​ដោយ​បក្ស​កាន់​អំណាច នោះ​វា​នឹង​ក្លាយ​ជា​បញ្ហា​កាន់តែ​ធ្ងន់ធ្ងរ​សម្រាប់​ពលរដ្ឋ​ផង និង​សម្រាប់​អ្នក​នយោបាយ​ជំនាន់​ក្រោយ​ផង ដោយសារ​ការ​បន្សល់​នូវ​គំរូ​មិន​ល្អ​របស់​គាត់​បែប​នេះ។

ការ​អះអាង​នេះ ធ្វើឡើង​បន្ទាប់ពី​ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​សម្រេច​ចិត្ត​ចុះចូល​ជាមួយ​បក្ស​កាន់​អំណាច​ដើម្បី​ជួយ​លើកស្ទួយ​វិស័យ​កសិកម្ម​ដល់​រដ្ឋាភិបាល​នៅ​ពេលនេះ។

កាលពី​ថ្ងៃទី​២៧ ខែ​វិច្ឆិកា ឆ្នាំ​២០២២ លិខិត​សុំ​ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា​របស់​ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ ដែល​ខ្លឹមសារ​ក្នុង​លិខិត​នោះ​បញ្ជាក់​ថា ការ​ស្នើសុំ​ចូលរួម​ជីវភាព​នយោបាយ​ជាមួយ​បក្ស​កាន់​អំណាច​នេះ គឺ​ក្នុង​គោលបំណង​ដើម្បី​ចូលរួម​លើកស្ទួយ​វិស័យ​កសិកម្ម​ឱ្យ​មាន​ភាព​ប្រសើរ​ឡើង។

ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​ប្រាប់​សារព័ត៌មាន The Cambodia Daily នៅ​ថ្ងៃទី​២៨ វិច្ឆិកា នេះ​ថា ប្រសិនបើ​រដ្ឋាភិបាល​អាច​អនុវត្ត​នូវ​លក្ខខណ្ឌ​ទាំង ១២​ខ របស់​លោក​ឱ្យ​បាន​ត្រឹមត្រូវ គឺ​អាច​ជួយ​កសិករ​បាន​ជាង ១​លាន​គ្រួសារ​ឱ្យ​មាន​ជីវភាព​ល្អ​ប្រសើរ​ក្នុង​ដំណាក់កាល​ដំបូង ហើយ​ផែនការ​កសាង​សង្វាក់​ផលិតកម្ម​នេះ គឺ​ត្រូវ​ប្រើ​ពេល​រៀបចំ​យ៉ាងតិច ៥​ឆ្នាំ ដើម្បី​ធានា​នូវ​ការ​អនុវត្ត​ឱ្យ​បាន​ទូទាំង​ប្រទេស។

លោក​បន្ថែម​ថា លក្ខខណ្ឌ​ទាំង​១២ ដែល​លោក​បាន​ស្នើ​ទៅ​កាន់​លោក​នាយករដ្ឋមន្ត្រី ហ៊ុន សែន នោះ​គឺ​ការ​រៀបចំ​ឱ្យ​មាន​សង្វាក់​ផលិតកម្ម និង​ទីផ្សារ​ស្រូវ​អង្ករ​របស់​កម្ពុជា ការ​ជួយ​កសិករ​ឱ្យ​ចំណាយ​ថ្លៃដើម​ទាប ប៉ុន្តែ​ទទួល​បាន​ផល​ចំណេញ​សមរម្យ ការ​ជួយ​ឱ្យ​រោង​ម៉ាស៊ីន​ផលិត​អង្ករ​ដែល​មាន​គុណភាព​ល្អ​សម្រាប់​ផ្គត់ផ្គង់​ទីផ្សារ​ក្នុង​ស្រុក និង​ក្រៅ​ប្រទេស ជាដើម។

បណ្ឌិត យ៉ង សាំងកុមារ លើកឡើង​ថា ក្រសួង​ត្រូវតែ​រៀបចំ​ឱ្យ​មាន​សហគមន៍​អ្នក​ផលិត​នៅ​មូលដ្ឋាន​ដោយ​មាន​កន្លែង​សម្ងួត និង​ឃ្លាំង​ស្តុក​ស្រូវ កំណត់​ស្តង់ដារ​គុណភាព​ស្រូវ និង​ស្តង់ដារ​នៃ​ការ​កំណត់​តម្លៃ​ស្រូវ​តាម​ប្រភេទ​ពូជស្រូវ​នីមួយៗ រៀបចំ​ឱ្យ​ធនាគារ​កសិកម្ម និង​ស្ថាប័ន​ហិរញ្ញវត្ថុ​នានា​បង្កើន​ទុន​ដល់​រោង​ម៉ាស៊ីន​កិនស្រូវ និង​សហគមន៍​កសិករ ឱ្យ​មាន​លទ្ធភាព​ក្នុង​ការ​ផលិត​ឱ្យ​កាន់តែ​ខ្ពស់​ជាង​ពេល​បច្ចុប្បន្ន ជាដើម។

អ្នកជំនាញ​ខាង​កសិកម្ម​រូប​នេះ​បញ្ជាក់​ថា ក្រសួង​កសិកម្ម​ត្រូវតែ​ដាក់​ផែនការ​បណ្តុះបណ្តាល​កសិករ​អំពី​បច្ចេកទេស​កសិកម្ម រៀបចំ​ឱ្យ​មាន​ការ​ស្រាវជ្រាវ​ដើម្បី​ផលិត​ពូជស្រូវ​សុទ្ធ​ល្អ​សម្រាប់​កសិករ សម្របសម្រួល​ឱ្យ​មាន​ការ​សហការ​រវាង​សហគមន៍​កសិករ រោង​ម៉ាស៊ីន​កិនស្រូវ និង​ក្រុមហ៊ុន​ឈ្មួញ​ស្រូវ​អង្ករ ព្រមទាំង​លក្ខខណ្ឌ​មួយ​ចំនួន​ផ្សេង​ទៀត​ដែល​អាច​ជួយ​ឱ្យ​វិស័យ​កសិកម្ម​នៅ​កម្ពុជា​បោះ​ជំហាន​ទៅ​កាន់តែ​ល្អ​ប្រសើរ​ទៅ​ពេល​អនាគត។

ជុំវិញ​បញ្ហា​នេះ ស្ថាបនិក​អង្គការ​អភិវឌ្ឍន៍​ផ្នត់គំនិត លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​២៨ វិច្ឆិកា នេះ​ដែរ​ថា គោលការណ៍​ទាំង ១២​ខ របស់​គាត់​នឹង​អាច​ជួយ​កសិករ​ខ្មែរ​ឱ្យ​មាន​ជីវភាព​ធូរធារ ប៉ុន្តែ​បញ្ហា​ស្ថិត​នៅ​ត្រង់​ថា តើ​រដ្ឋាភិបាល​អាច​អនុវត្ត​បាន​ដែរ​ឬ​ក៏​អត់​ប៉ុណ្ណោះ ជាពិសេស​ក្រសួង​កសិកម្ម និង​ក្រសួង​ពាក់ព័ន្ធ​ដទៃ​ទៀត តើ​ពួកគេ​នឹង​ចូលរួម​សហការ​ក្នុង​ការ​អនុវត្ត​គម្រោង​ដែល​គាត់​បាន​លើកឡើង​នេះ​ដែរ​ឬ​ទេ​ទៅ​ថ្ងៃ​មុខ ប្រសិនបើ​គម្រោង​នេះ​នឹង​ប៉ះពាល់​ដល់​ផល​ប្រយោជន៍​របស់​បក្ស​កាន់​អំណាច​ក្នុង​លក្ខខណ្ឌ​ណា​មួយ​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស