អតីតតំណាងរាស្ត្រគណបក្សសង្គ្រោះជាតិមណ្ឌលភ្នំពេញ លោក ដាំ សិទ្ធិ ស្នើសុំចូលរួមជីវភាពនយោបាយជាមួយបក្សប្រជាជនកម្ពុជារបស់លោក ហ៊ុន សែន បន្ទាប់ពីមន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ ត្រូវបានទទួលយល់ព្រមឱ្យចូលជាសមាជិកបក្សកាន់អំណាច។
អតីតអ្នកតំណាងរាស្ត្រមណ្ឌលរាជធានីភ្នំពេញរបស់អតីតគណបក្សសង្គ្រោះជាតិ លោក ដាំ សិទ្ធិ បានសរសេរលិខិតដោយផ្ទាល់ដៃមួយច្បាប់កាលពីថ្ងៃទី២៨ ខែវិច្ឆិកា ឆ្នាំ២០២២ ស្នើទៅកាន់មេដឹកនាំបក្សកាន់អំណាច លោក ហ៊ុន សែន ដើម្បីសុំចូលរួមជីវភាពនយោបាយជាមួយគណបក្សប្រជាជនកម្ពុជាពីពេលនេះតទៅ ដោយសារតែលោកមើលឃើញនូវគោលនយោបាយដ៏ល្អត្រឹមត្រូវដែលលោក ហ៊ុន សែន កំពុងដឹកនាំសព្វថ្ងៃនេះ។
អតីតតំណាងរាស្ត្រគណបក្សសង្គ្រោះជាតិរូបនេះបញ្ជាក់ថា ការស្នើសុំចូលរួមជីវភាពនយោបាយរបស់លោកជាមួយបក្សកាន់អំណាចនៅពេលនេះ មិនមែនដោយសារការបង្ខិតបង្ខំ ឬការគំរាមកំហែងណាមួយនោះទេ គឺដោយសារតែលោកពេញចិត្តនឹងការដឹកនាំរបស់លោក ហ៊ុន សែន ប៉ុណ្ណោះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងតាមបណ្ដាញតេឡេក្រាមកាលពីថ្ងៃចន្ទ ទី២៨ វិច្ឆិកា ជុំវិញការសុំចូលរួមជីវភាពនយោបាយជាមួយបក្សកាន់អំណាចរបស់អតីតតំណាងរាស្ត្រគណបក្សសង្គ្រោះជាតិ លោក ដាំ សិទ្ធិ ថាទីណាមានទឹកត្រជាក់ ទីនោះគឺមានត្រីកុំ។ លោកបន្ថែមថា មានតែរួមរស់ជាមួយគណបក្សកាន់អំណាចប៉ុណ្ណោះ ទើបពួកគេមានអនាគតភ្លឺស្វាងទៅថ្ងៃអនាគត។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បានសរសេរលើគណនីហ្វេសប៊ុករបស់ខ្លួនកាលពីថ្ងៃទី២៨ វិច្ឆិកា នេះថា អ្នកនយោបាយអាចបង្កើតបក្សថ្មី ឬចុះចូលបក្សណាមួយជាសិទ្ធិ និងឆន្ទៈរបស់ពួកគេ ប៉ុន្តែមិនមែនទាល់តែចូលរួមជីវភាពនយោបាយជាមួយគ្នាទើបអាចធ្វើការក្នុងលក្ខខណ្ឌរួមបាននោះទេ ជាពិសេសរដ្ឋាភិបាលដែលមានលក្ខណៈប្រជាធិបតេយ្យ គួរបើកចំហទទួលយកគ្រប់មតិដើម្បីដោះស្រាយ និងបម្រើផលប្រយោជន៍ជាតិ មិនចាំបាច់ទាល់តែគេចូលរួមជីវភាពនយោបាយជាមួយខ្លួននោះឡើយ។
អ្នកស្រី ចក់ សុភាព ថាជាក់ស្តែង បញ្ហាវិវាទការងារតូចមួយបានកើតឡើងក្នុងកណ្តាលទីក្រុងជាប់សភាជាតិផង ដែលអ្នកស្រីសំដៅដល់វិវាទនៅក្រុមហ៊ុនណាហ្គាវើលដ៍ គឺត្រូវអូសបន្លាយគ្មានដំណោះស្រាយជិតមួយឆ្នាំមកហើយ ក្នុងនោះស្ត្រីជាច្រើន រួមទាំងតំណាងសហជីពត្រូវបានធ្វើទុក្ខបុកម្នេញ ចាប់ខ្លួនទាំងកំរោលម្តងហើយម្តងទៀត។
អ្នកស្រី ចក់ សុភាព លើកជាសំណួរថា តើទាល់តែពួកគាត់ត្រូវចេញលិខិតសុំចូលរួមជីវភាពនយោបាយ ឬបង្ហាញថាខ្លួនគាំទ្រគណបក្សកាន់អំណាចដែរឬ ទើបពួកគេលែងត្រូវបានចាប់ខ្លួន ឬយ៉ាងណា?៕