អាជ្ញាធរជាតិអប្សរាដឹកនាំសិស្សានុសិស្ស ធ្វើព្យុហយាត្រាលើកដំបូងមុនចាប់ផ្តើមពិធីបុណ្យរំលឹកគុណអង្គរនៅថ្ងៃទី១៤ ធ្នូ ដើម្បីបង្ហាញថាកូនខ្មែរគ្រប់រូបបានតបស្នងសងគុណដល់បុព្វបុរស ក៏ដូចជាអតីតព្រះមហាក្សត្រខ្មែរដែលបានកសាងប្រាសាទអង្គរទុកឱ្យកូនខ្មែរជំនាន់ក្រោយបានស្គាល់អស់រយៈកាលរាប់ពាន់ឆ្នាំកន្លងមក។
អគ្គនាយកអាជ្ញាធរជាតិអប្សរា លោក ហង់ ពៅ បានលើកឡើងក្នុងពិធីព្យុហយាត្រានៅថ្ងៃទី១៣ ខែធ្នូ ឆ្នាំ២០២២ នេះថា សម័យបច្ចេកវិទ្យាទំនើបគេក៏អាចចម្លង ឬកសាងប្រាសាទថ្មីៗធំៗបានដែរ ប៉ុន្តែការសាងសង់ថ្មី គឺគ្មានតម្លៃ និងគ្មានន័យដូចប្រាសាទរបស់កម្ពុជាឡើយ ត្បិតប្រាសាទអង្គរជាសំណង់បុរាណដែលមានអាយុកាលច្រើនពាន់ឆ្នាំមកហើយ ហើយក៏ជាដួងព្រលឹង និងអត្តសញ្ញាណជាតិរបស់ខ្មែរដែរ មិនមែនគ្រាន់តែជាសំណង់ធម្មតានោះទេ។
លោក ហង់ ពៅ លើកឡើងថា វប្បធម៌ អរិយធម៌ ដែលជាដួងព្រលឹងរបស់ខ្មែរមានច្រើនមហិមាដែលមានអាយុរាប់ពាន់ឆ្នាំ ដូចនេះកូនខ្មែរគ្រប់រូបត្រូវតែដឹងគុណអង្គរ ដោយការចូលរួមអភិរក្ស និងអភិវឌ្ឍឱ្យបានគង់វង្ស ត្បិតសម្បត្តិបេតិកភណ្ឌជាតិដ៏មហិមានេះមិនមែនចេះតែកើតឡើងដោយចៃដន្យនោះទេ គឺបុព្វបុរសខ្មែរបានគិតគូរខ្ពស់បំផុតនូវអ្វីដែលមានប្រយោជន៍ដល់មនុស្សជំនាន់ក្រោយ។
នៅថ្ងៃទី១៣ ខែធ្នូ ឆ្នាំ២០២២ នេះ សិស្សានុសិស្ស និងអាជ្ញាធរជាតិអប្សរាជិត ១ពាន់នាក់ បានធ្វើព្យុហយាត្រាដង្ហែក្បួនដើម្បីបំផុសឱ្យប្រជាពលរដ្ឋខ្មែរ អ្នកទេសចរជាតិ និងអន្តរជាតិ នាំគ្នារំលឹកគុណប្រាសាទអង្គរ ហើយការដង្ហែក្បួននេះធ្វើឡើងចេញពីខាងមុខប្រាសាទអង្គរ ឆ្ពោះទៅកាន់ខ្លោងទ្វារប្រាសាទអង្គរធំ ឬខ្លោងទ្វារទន្លេអុំ ដោយកាន់នូវបដាជាច្រើនដែលសរសេរពាក្យស្លោក ដូចជា អង្គរជាដួងព្រលឹង និងជាអត្តសញ្ញាណជាតិខ្មែរ អបអរសាទរពិធីបុណ្យរំលឹកគុណអង្គរ វប្បធម៌ជាមូលដ្ឋានគ្រឹះនៃសន្តិភាព និងការអភិវឌ្ឍសេដ្ឋកិច្ចសង្គម ជាដើម។
ទាក់ទិននឹងបញ្ហានេះ កាលថ្ងៃទី២៤ ខែវិច្ឆិកា ឆ្នាំ២០២២ ក្រសួងវប្បធម៌ និងវិចិត្រសិល្បៈ បានចេញសារាចរណែនាំមួយស្ដីពី «ការរៀបចំពិធីបុណ្យរំឭកគុណអង្គរ» ដោយក្នុងនោះ ក្រសួងបានណែនាំដល់អាជ្ញាធរជាតិអប្សរាឱ្យរៀបចំកម្មវិធីតាមថ្ងៃនីមួយៗផងដែរ។
រដ្ឋមន្ត្រីក្រសួងវប្បធម៌ និងវិចិត្រសិល្បៈ អ្នកស្រី ភឿង សកុណា អះអាងកាលពីពេលថ្មីៗនេះថា ពិធីបុណ្យ «រំឭកគុណអង្គរ» ធ្វើឡើងដើម្បីបង្ហាញដល់ប្រជាពលរដ្ឋខ្មែរ និងពិភពលោកបន្ថែមទៀតពីការដឹងគុណ និងប្រពៃណីទំនៀមទម្លាប់ដែលខ្មែរមានតាំងពីបុរាណមក។
រដ្ឋមន្ត្រីក្រសួងវប្បធម៌រូបនេះអះអាងថា ការជ្រើសរើសយកថ្ងៃទី១៤ ធ្នូ ជាថ្ងៃចាប់ផ្តើមពិធីបុណ្យ «រំឭកគុណអង្គរ» ដោយសារតែជាថ្ងៃដែលតំបន់អង្គរបានចុះក្នុងបញ្ជីបេតិកភណ្ឌពិភពលោកនៃអង្គការយូណេស្កូកាលពីថ្ងៃទី១៤ ខែធ្នូ ឆ្នាំ១៩៩២ កន្លងទៅ។
តំបន់រមណីយដ្ឋានអង្គរ ត្រូវបានដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ នៅថ្ងៃទី១៤ ខែធ្នូ ឆ្នាំ១៩៩២ នាទីក្រុងសាន់តាហ្វេ សហរដ្ឋអាមេរិក ដែលបច្ចុប្បន្ន តំបន់រមណីយដ្ឋានអង្គរនេះបានដាក់ឱ្យស្ថិតក្រោមការគ្រប់គ្រងរបស់អាជ្ញាធរជាតិអប្សរាទាំងស្រុង៕