 ប្រសិនបើចង់មកពិនិត្យតថភាពនៃការរៀបចំតំបន់អង្គរ បន្ទាប់ពីគណៈកម្មាធិការយូណេស្កូប្រកាសថាខ្លួនត្រៀមបញ្ជូនក្រុមការងារមកពិនិត្យតំបន់អង្គរដែលបណ្តេញប្រជាជនដោយបង្ខំ។){kind=link}
អាជ្ញាធរជាតិអប្សរា បានអះអាងថា ខ្លួនត្រៀមសហការជាមួយក្រុមការងាររបស់អង្គការយូណេស្កូ (UNESCO) ប្រសិនបើចង់មកពិនិត្យតថភាពនៃការរៀបចំតំបន់អង្គរ បន្ទាប់ពីគណៈកម្មាធិការយូណេស្កូប្រកាសថាខ្លួនត្រៀមបញ្ជូនក្រុមការងារមកពិនិត្យតំបន់អង្គរដែលបណ្តេញប្រជាជនដោយបង្ខំ។
អគ្គនាយកអាជ្ញាធរជាតិអប្សរា លោក ហង់ ពៅ ថ្លែងនៅក្នុងសន្និសីទសារព័ត៌មាននៅព្រឹកថ្ងៃទី១ សីហា នេះថា ប្រសិនបើគណៈកម្មាធិការបេតិកភណ្ឌពិភពលោកចង់ទទួលបានព័ត៌មានពិតពីការរៀបចំតំបន់អង្គរ អាជ្ញាធរអប្សរានឹងត្រៀមខ្លួនសហការជាមួយ។
ប្រភពដដែលអះអាងថា កន្លងមក ការវាយតម្លៃស្ថានភាពតំបន់អង្គរតែងធ្វើឡើងជាប្រចាំក្នុង ៦ខែម្តង តាមរយៈ ICC-Angkor ហើយ ICC-Angkor ក៏តែងដាក់របាយការណ៍វាយតម្លៃទាំងនោះទៅកាន់គណៈកម្មាធិការបេតិកភណ្ឌពិភពលោក។ បើសិនគណៈកម្មាធិការបេតិកភណ្ឌពិភពលោកចង់មកពិនិត្យដោយផ្ទាល់មែន នោះគឺជារឿងល្អ ដោយមិនចាំបាច់ទទួលព័ត៌មានតែពីភាគីទី៣។
កាលពីថ្ងៃពុធ ទី៣១ កក្កដា គណៈកម្មាធិការយូណេស្កូ នៅក្នុងកិច្ចប្រជុំស្ដីពីបេតិកភណ្ឌពិភពលោកលើកទី៤៦ នៅប្រទេសឥណ្ឌា បានលើកជាអនុសាសន៍ស្នើឲ្យមានការធ្វើទស្សនកិច្ចនៅតំបន់អង្គរជាទីដែលមានជម្លោះពាក់ព័ន្ធនឹងការបណ្តេញប្រជាពលរដ្ឋ។ គណៈកម្មាធិការបេតិកភណ្ឌពិភពលោក ក៏សម្ដែងក្តីបារម្ភបន្ទាប់ពីបានទទួលរបាយការណ៍ទាក់ទងនឹងការបណ្តេញពលរដ្ឋចេញពីតំបន់អង្គរ ឱ្យទៅរស់នៅតំបន់រុនតាឯក។
អង្គការ Amnesty International បានផ្ញើរបាយការណ៍ទៅកាន់គណៈកម្មាធិការបេតិកភណ្ឌយូណេស្កូ បង្ហាញថា ពលរដ្ឋជាង ៤ម៉ឺននាក់ត្រូវអាជ្ញាធរជម្លៀសចេញពីតំបន់អង្គរតាំងពីឆ្នាំ២០២២។ ការជម្លៀសពលរដ្ឋចេញពីតំបន់អង្គរ ធ្វើឡើងក្នុងហេតុផលថា តំបន់នោះគឺជាតំបន់បេតិកភណ្ឌពិភពលោក ដោយហាមឃាត់មិនឲ្យមានការតាំងទីលំនៅ និងសង់សំណង់ខុសច្បាប់។
ពលរដ្ឋរងគ្រោះដែលកំពុងរស់នៅក្នុងឃុំរុនតាឯក ប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះថា ពួកគេកំពុងប្រឈមនឹងវិបត្តិធ្ងន់ធ្ងរគ្រប់បែបយ៉ាង ដោយគ្មានការដោះស្រាយពីរដ្ឋាភិបាល ក្នុងនោះ ថវិកាដែលពួកគេធ្លាប់ទទួលបានតាមរយៈបណ្ណក្រីក្រ ឬបណ្ណសមធម៌ ត្រូវបានកាត់បន្ថយស្ទើរតែអស់នៅពេលនេះ ចំណែកដីដែលរដ្ឋាភិបាលចែកឱ្យ ក៏គ្មានសិទ្ធិលក់ មុខរបរក៏មិនអាចធ្វើបាន ខណៈបំណុលធនាគារក៏ត្រូវតែសងជារៀងរាល់ខែថែមទៀត។
ពលរដ្ឋទាំងនោះអះអាងថា ពលរដ្ឋដែលព្រមចាកចេញពីតំបន់អង្គរស្ទើរតែគ្រប់ក្រុមគ្រួសារ សុទ្ធតែជំពាក់លុយធនាគារស្រាប់ទៅហើយ ដូច្នេះការផ្លាស់ទីមកនៅទីតាំងថ្មីនេះ បានធ្វើឱ្យពួកគេបាត់បង់ក្តីសង្ឃឹមទាំងស្រុងលើមុខរបរដែលពួកគេបានបង្កើតឡើងដោយពឹងលើលុយដែលបានខ្ចីបុលពីធនាគារអំឡុងពេលដែលពួកគេរស់នៅក្នុងតំបន់អង្គរ ប៉ុន្តែដោយសារតែការបង្ខំឱ្យចាកចេញពីសំណាក់រដ្ឋាភិបាល ពួកគេមិនអាចតវ៉ាបានឡើយ។
កាលពីថ្ងៃទី២៦ ខែមករា ឆ្នាំ២០២៤ ពលរដ្ឋជិត ៤០០នាក់បាននាំគ្នាតវ៉ានៅមុខសាលាខេត្តសៀមរាប និងមុខសាលាឃុំរុនតាឯក ក្រោយពីពួកគេមិនទទួលបានប្រាក់បណ្ណសមធម៌ ឬបណ្ណក្រីក្រគ្រប់ចំនួនដែលរដ្ឋាភិបាលផ្តល់ឱ្យសម្រាប់រយៈពេល ១០ឆ្នាំ។
រដ្ឋាភិបាលកម្ពុជាចាប់ផ្ដើមជម្លៀសប្រជាជន ១ម៉ឺនគ្រួសារចេញពីតំបន់ប្រាសាទអង្គរវត្ត មកកាន់តំបន់តាំងទីលំនៅថ្មីរុនតាឯក។ អ្នកភូមិដែលរស់នៅក្នុងទីតាំងលំនៅថ្មីនេះ និយាយថា ពួកគេកំពុងរងគ្រោះពីវិបត្តិពីរផ្ទួនគ្នា៕