សមត្ថកិច្ចឃាត់ខ្លួនជនជាតិចិន និងខ្មែរ ៥នាក់កាលពីថ្ងៃទី១៥ ធ្នូ ដោយសង្ស័យថា ពួកគេពាក់ព័ន្ធនឹងគ្រាប់បែកមួយគ្រាប់ដែលត្រូវបានអ្នកបោសសំរាមម្នាក់ប្រទះឃើញនៅលើសួនច្បារខាងមុខក្រុមហ៊ុនណាហ្គាវើលដ៍២ និងក្បែររដ្ឋសភាជាតិក្នុងខណ្ឌចំការមន រាជធានីភ្នំពេញ។
សារព័ត៌មានដែលស្និទ្ធនឹងលោក ហ៊ុន សែន គឺ Fresh News បានដកស្រង់សម្ដីរបស់អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន ចុះផ្សាយនៅថ្ងៃទី១៦ ខែធ្នូ នេះថា ជនជាតិចិន ៤នាក់ និងខ្មែរម្នាក់ ត្រូវបានឃាត់ខ្លួននៅចំណុចផ្ទះលេខ១៩ បុរីប៉េងហួត បឹងស្នោរ ផ្លូវ M-០២ សង្កាត់និរោធ ខណ្ឌច្បារអំពៅ រាជធានីភ្នំពេញ។
ជនជាតិចិនទាំង ៤នាក់មានឈ្មោះ YANG JIAKANG ភេទប្រុស ជាអ្នកបើករថយន្ត ឈ្មោះ YANG YUDONG ភេទប្រុស ឈ្មោះ CHEN DI ភេទប្រុស និងឈ្មោះ TU LINAN ភេទស្រី ហើយជនជាតិខ្មែរម្នាក់នោះមានឈ្មោះ សួង ស្រីអូន ភេទស្រី។
ក្រៅពីឃាត់ខ្លួនជនសង្ស័យទាំង ៥នាក់ ក៏មានរថយន្ត ០១គ្រឿងម៉ាក LAND ROVER DEFENDER ពណ៌ស្លែស៊េរីឆ្នាំ២០២១ ពាក់ស្លាកលេខ កម្ពុជា-LC.98-88 ត្រូវបានសមត្ថកិច្ចរឹបអូសយកធ្វើវត្ថុតាងផងដែរ។
ការឃាត់ខ្លួនជនជាតិចិនទាំងបួននាក់ និងខ្មែរម្នាក់ ធ្វើឡើងនៅថ្ងៃដដែលបន្ទាប់ពីស្ត្រីអ្នកបោសសំរាមម្នាក់ប្រទះឃើញគ្រាប់បែកដៃមួយគ្រាប់នៅលើសួនច្បារមុខក្រុមហ៊ុនណាហ្គាវើលដ៍២ ក្បែរវិមានរដ្ឋសភាជាតិកម្ពុជា។
អ្នកស្រី ពៅ សាវី ជាអ្នកបោសសំរាមដែលបានប្រទះឃើញគ្រាប់បែកនោះ បានរៀបរាប់ប្រាប់អ្នកសារព័ត៌មាននៅកន្លែងកើតហេតុនោះថា នៅម៉ោងប្រមាណ ៦ព្រឹក ថ្ងៃទី១៥ ខែធ្នូ អ្នកស្រីបានទៅបោសសំរាមដូចសពដងនៅតាមដងវិថីរដ្ឋសភា ស្រាប់តែពេលនោះអ្នកស្រីបានប្រទះឃើញវត្ថុម្យ៉ាងពណ៌ស និងមានសភាពស្អិត ហើយអ្នកស្រីក៏បានកាយមើល ស្រាប់តែប្រទះឃើញគ្រាប់បែកនោះតែម្តង ទើបអ្នកស្រីប្រញាប់រាយការណ៍ទៅសមត្ថកិច្ច។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា គ្រាប់បែកដៃដែលស្ត្រីអ្នកបោសសម្អាតផ្លូវនោះបានប្រទះឃើញ ត្រូវបានសមត្ថកិច្ចស្រាវជ្រាវរកឃើញជាបឋមថាមានជនបង្កជាជនជាតិចិន។ លោកថា ករណីនេះមិនមែនជារឿងភេរវកម្ម ឬរឿងនយោបាយនោះទេ អាចជារឿងដែលជនសង្ស័យចាញ់ល្បែងច្រើនជាង៕