28 C
Phnom Penh

លោក ស ខេង ជំរុញ​ឱ្យ​សមត្ថកិច្ច​យកចិត្ត​ទុក​ទប់ស្កាត់​គ្រឿងញៀន​តាម​សហគមន៍​ជា​កំហិត

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​មហាផ្ទៃ និង​ជា​នាយករដ្ឋមន្ត្រី​ស្តីទី លោក ស ខេង ជំរុញ​ឲ្យ​សមត្ថកិច្ច​យកចិត្ត​ទុកដាក់​ប្រយុទ្ធ​ប្រឆាំង​គ្រឿងញៀន​នៅ​តាម​សហគមន៍ ដោយ​ថា​គ្រឿងញៀន​ជា​សត្រូវ​ធំ​បំផុត​នៃ​ការ​អភិវឌ្ឍ​ធនធាន​មនុស្ស និង​ការ​រក្សា​សន្តិសុខ និង​សណ្ដាប់ធ្នាប់​សាធារណៈ។

ថ្លែង​ក្នុង​ពិធី​មួយ​នៅ​ខេត្ត​បាត់ដំបង កាលពី​ថ្ងៃ​ទី​១៥ ខែ​ធ្នូ ឆ្នាំ​២០២២ លោក ស ខេង អំពាវនាវ​ទៅ​អាជ្ញាធរ និង​ពលរដ្ឋ​ឲ្យ​យកចិត្ត​ទុកដាក់​អនុវត្ត និង​គាំទ្រ​ការ​អនុវត្ត​គោល​នយោបាយ​ភូមិ ឃុំ សង្កាត់​មាន​សុវត្ថិភាព ដែល​ជា​មូលដ្ឋានគ្រឹះ​នៃ​ការ​រក្សា​បាន​សន្តិសុខ សណ្ដាប់ធ្នាប់​សាធារណៈ និង​ប្រសិទ្ធភាព​នៃ​ការ​ផ្ដល់​សេវា​សាធារណៈ​ជូន​ពលរដ្ឋ​នៅ​តាម​មូលដ្ឋាន។

ក្រៅពី​អំពាវនាវ​ហើយ លោក​ក៏​បាន​ជំរុញ​ឲ្យ​សមត្ថកិច្ច​ត្រូវ​ខិតខំ​យកចិត្ត​ទុកដាក់​បន្ថែម​ទៀត ដើម្បី​រួម​គ្នា​ប្រយុទ្ធ​ប្រឆាំង​គ្រឿងញៀន​ខុស​ច្បាប់​នៅ​តាម​សហគមន៍ ភូមិ ឃុំ សង្កាត់ ក្នុង​នោះ​រាប់​ទាំង​នៅ​តាម​សាលារៀន​ផង​ដែរ ដោយ​ថា​គ្រឿងញៀន​ជា​សត្រូវ​ធំ​បំផុត​នៃ​ការ​អភិវឌ្ឍ​ធនធាន​មនុស្ស និង​ការ​រក្សា​សន្តិសុខ និង​សណ្ដាប់ធ្នាប់​សាធារណៈ។

លើស​ពី​នេះ លោក ស ខេង ក៏​បាន​ជំរុញ​ទៅ​សមត្ថកិច្ច​ជំនាញ​ឲ្យ​ស្រាវជ្រាវ ដើម្បី​តាម​ចាប់​ខ្លួន​មេខ្លោង​ជួញដូរ​គ្រឿងញៀន​ទម្ងន់ ៨៥០​គីឡូក្រាម​ផ្ដន្ទាទោស​តាម​ផ្លូវ​ច្បាប់ ដោយ​ថា​បញ្ហា​នេះ​កំពុង​បង្ក​ហានិភ័យ​ដល់​សង្គម។

លោក​ចាត់ទុក​ការ​ចាប់​ខ្លួន​មេខ្លោង​ជួញដូរ​គ្រឿងញៀន​នា​ពេល​ថ្មីៗ​នេះ ថា​មិន​មាន​អ្វី​លំបាក ទាំង​នៅ​ក្នុង​ប្រទេស និង​នៅ​ក្រៅ​ប្រទេស ដោយសារ​មាន​ភស្តុតាង និង​ឯកសារ​ច្បាស់លាស់។

ការ​ក្រើន​រម្លឹក និង​ជំរុញ​ជា​ថ្មី​ទៀត​របស់​រដ្ឋមន្ត្រី​ក្រសួង​មហាផ្ទៃ លោក ស ខេង ធ្វើឡើង​បន្ទាប់ពី​សមត្ថកិច្ច​កាលពី​ថ្ងៃទី​១១ ខែ​ធ្នូ នេះ បាន​រក​ឃើញ​កន្លែង​លាក់​ទុក​គ្រឿងញៀន​មួយ​កន្លែង​នៅ​ក្នុង​ខេត្ត​ព្រះសីហនុ ដោយ​រឹបអូស​បាន​គ្រឿងញៀន​ទម្ងន់ ៨៥០​គីឡូក្រាម តែ​សមត្ថកិច្ច​នៅ​មិន​ទាន់​បង្ហាញ​មុខ​អ្នក​ទទួល​ខុសត្រូវ​ដែល​ជា​ម្ចាស់​គ្រឿងញៀន​នោះ​នៅឡើយ​ទេ។

វិធានការ​ទប់ស្កាត់​គ្រឿងញៀន​របស់​រដ្ឋាភិបាល​ចាប់តាំងពី​ឆ្នាំ​២០១៧ ដល់​ចុង​ឆ្នាំ​២០២២ នេះ ត្រូវ​បរាជ័យ​ដោយសារ​បទល្មើស​គ្រឿងញៀន​បាន​កើន​ឡើង​ជា​បន្តបន្ទាប់។

បើ​តាម​អង្គការ​សហប្រជាជាតិ​ស្ដីពី​ឧក្រិដ្ឋកម្ម និង​គ្រឿងញៀន (UNODC) អំឡុង​ខែ​មិថុនា ឆ្នាំ​២០២១ បាន​បង្ហាញ​របាយការណ៍​ថ្មី​មួយ​រក​ឃើញ​ថា កម្ពុជា​ជា​គោលដៅ​ចម្បង​នៃ​ក្រុម​ឧក្រិដ្ឋជន​គ្រឿងញៀន​ប្រើប្រាស់​ជា​ទីតាំង​សម្រាប់​ការ​ចរាចរ​គ្រឿងញៀន ផលិត កែច្នៃ និង​ចែកចាយ​បន្ត ដែល​ថា​ក្រុម​ឧក្រិដ្ឋជន​គ្រឿងញៀន​ទាំងនោះ​ភាគច្រើន​ជា​ជនជាតិ​ចិន និង​ចិន​តៃវ៉ាន់៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស