រដ្ឋមន្ត្រីក្រសួងមហាផ្ទៃ លោក ស ខេង ស្នើឲ្យពលរដ្ឋជួយការពារកូនកុំឲ្យប្រើប្រាស់គ្រឿងញៀន ដោយសារបច្ចុប្បន្ន គ្រឿងញៀនកំពុងវាយលុកទៅលើមនុស្សអាយុចន្លោះពី ១៥ឆ្នាំដល់ក្រោមអាយុ ៤០ឆ្នាំ ស្របពេលរដ្ឋាភិបាលបរាជ័យក្នុងការទប់ស្កាត់។
ការស្នើរបស់រដ្ឋមន្ត្រីក្រសួងមហាផ្ទៃ បានធ្វើឡើងក្នុងពិធីសម្ពោធវិហារឥស្លាមនូរុលមុតតាគីន ស្ថិតនៅស្រុកពញាឮ ខេត្តកណ្ដាល នាព្រឹកថ្ងៃទី២៤ ខែធ្នូ ឆ្នាំ២០២២។
លោក ស ខេង ថ្លែងថា ក្នុងមួយថ្ងៃសមត្ថកិច្ចបង្ក្រាប និងចាប់បានអ្នកចែកចាយ និងលក់ដូរគ្រឿងញៀនចំនួន ១ករណីនៅក្នុង ១០រាជធានី-ខេត្ត។ លោកថា បញ្ហាគ្រឿងញៀន គឺជាមេរោគសង្គមយ៉ាងសាហាវ បើមិនមានការទប់ស្កាត់។ លោកថា វានឹងនាំឲ្យមានគ្រោះថ្នាក់ដល់សង្គមធ្ងន់ធ្ងរ ដោយសារតែបច្ចុប្បន្ននេះ គ្រឿងញៀនវាយលុកទៅលើមនុស្សអាយុចន្លោះពី ១៥ឆ្នាំដល់ក្រោមអាយុ ៤០ឆ្នាំ ដែលជាធនធានសំខាន់ ហើយពោរពេញទៅកម្លាំង និងកំពុងសិក្សាផងនោះ។
លោក ស ខេង ក៏បានស្នើទៅប្រជាពលរដ្ឋឲ្យជួយការពារកូនៗរបស់ពួកគេកុំឲ្យប្រើប្រាស់គ្រឿងញៀន ដោយត្រូវតាមដានឲ្យបានជាប់ ទោះបីជាកូនៗរបស់ពួកគេទៅសាលារៀនក៏ដោយ។ ការជំរុញឲ្យតាមដានបែបនេះ ដើម្បីបានដឹងពីសកម្មភាពរបស់កូនៗពួកគេថាមានប្រើប្រាស់គ្រឿងញៀនឬអត់ ពីព្រោះបើពួកគេប្រើហើយ គឺវានឹងពិបាកក្នុងការផ្ដាច់វិញណាស់។
ក្រៅពីឲ្យតាមដានកូនៗហើយ លោកក៏ជំរុញឲ្យពលរដ្ឋចូលរួមផ្ដល់ព័ត៌មាន និងរាយការណ៍បទល្មើសគ្រឿងញៀនទៅអាជ្ញាធរមូលដ្ឋាន ដោយថាការចូលរួមរបស់ពលរដ្ឋនេះដើម្បីទប់ស្កាត់កុំឱ្យមានការជួញដូរ និងចែកចាយគ្រឿងញៀនទៅតាមមូលដ្ឋាន។
លោកបញ្ជាក់ថា កន្លងមក ពលរដ្ឋបានត្អូញត្អែរថាអាជ្ញាធរមិនចាប់អ្នកចែកចាយដែលធ្វើឱ្យបញ្ហាគ្រឿងញៀនបន្តកើតឡើងដដែលៗ។ លោកចាត់ទុកការលើកឡើងបែបនេះជារឿងមួយ ប៉ុន្តែអាជ្ញាធរមិនចាប់ខ្លួនអ្នកទាំងនោះទៅឃុំទេ ពីព្រោះបច្ចុប្បន្ននៅក្នុងពន្ធនាគារក៏ចង្អៀតណែន ហើយមួយទៀត គឺចង់ផ្ដល់ឱកាសឲ្យពួកគេធ្វើការកែខ្លួនដោយចាប់យកទៅណែនាំ រួចប្រគល់ទៅឲ្យឪពុកម្ដាយរបស់ពួកគេវិញ។
លោក ស ខេង ថាបច្ចុប្បន្នអ្នកកំពុងជាប់ពន្ធនាគារនៅទូទាំងប្រទេសមានចំនួន ៣ម៉ឺន ៧ពាន់នាក់ ក្នុងនោះអ្នកពាក់ព័ន្ធនឹងគ្រឿងញៀនមានជាង ២ម៉ឺននាក់។
ក្នុងសេចក្ដីប្រកាសព័ត៌មានបន្ទាប់ពីបិទបញ្ចប់កិច្ចប្រជុំពេញអង្គគណៈរដ្ឋមន្ត្រី កាលពីថ្ងៃទី៩ ខែកញ្ញា ឆ្នាំ២០២២ លោកនាយករដ្ឋមន្ត្រី ហ៊ុន សែន លើកឡើងថា រាជរដ្ឋាភិបាលដាក់បទបញ្ជាម៉ឺងម៉ាត់ឱ្យគ្រប់រាជធានី-ខេត្ត ព្រមទាំងស្ថាប័នពាក់ព័ន្ធទាំងអស់ ត្រូវបើកយុទ្ធនាការប្រឆាំង និងបង្ក្រាបឧក្រិដ្ឋកម្មគ្រឿងញៀន ការជួញដូរ និងរត់ពន្ធមនុស្ស ពលកម្មបង្ខិតបង្ខំ និងអាជីវកម្មផ្លូវភេទដែលបានកើតឡើងនៅកម្ពុជាឲ្យមានប្រសិទ្ធភាព។
ការប្ដេជ្ញារបស់លោក ហ៊ុន សែន ធ្វើឡើងបន្ទាប់ពីការទប់ស្កាត់បទល្មើសគ្រឿងញៀននៅទូទាំងប្រទេសបានបរាជ័យ ខណៈការរឹបអូសគ្រឿងញៀនក្នុងរយៈពេលប៉ុន្មានឆ្នាំចុងក្រោយនេះមានការកើនឡើង។ លើសពីនេះ ការិយាល័យអង្គការសហប្រជាជាតិស្ដីពីឧក្រិដ្ឋកម្ម និងគ្រឿងញៀន (UNODC) ក៏ធ្លាប់បានព្រមានថា កម្ពុជានៅតែត្រូវបានកំណត់គោលដៅដោយក្រុមឧក្រិដ្ឋជនអន្តរជាតិថាជាកន្លែងសម្រាប់ផលិត កែច្នៃ និងឆ្លងកាត់គ្រឿងញៀនខុសច្បាប់តាមគ្រប់រូបភាព ជាពិសេសគ្រឿងញៀនប្រភេទមេតំហ្វេតាមីន៕