31 C
Phnom Penh

អ្នក​បើកបរ​យានយន្ត​គ្រប់​ប្រភេទ​នឹង​ត្រូវ​ដកហូត​ប័ណ្ណ​បើកបរ បើ​រក​ឃើញ​មាន​សារធាតុ​ញៀន

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​មហាផ្ទៃ លោក ស ខេង ព្រមាន​ថា អ្នក​បើកបរ​យានយន្ត​គ្រប់​ប្រភេទ​ដែល​រក​ឃើញ​ថា​មាន​សារធាតុ​ញៀន នឹង​ត្រូវ​ដកហូត​ប័ណ្ណ​បើកបរ និង​បញ្ឈប់​ការ​បើកបរ​រហូត​ទាល់តែ​ធ្វើ​តេស្ដ​លែង​មាន​សារធាតុ​ញៀន ទើប​ប្រគល់​ឱ្យ​វិញ។

លោក ស ខេង ប្រាប់​អ្នក​សារព័ត៌មាន​បន្ទាប់​ពី​បិទ​បញ្ចប់​កិច្ចប្រជុំ​លើ​សេចក្ដី​ព្រាង​ច្បាប់​ស្ដីពី​ចរាចរណ៍​ផ្លូវគោក នៅ​ថ្ងៃទី​២៨ ខែ​ធ្នូ ឆ្នាំ​២០២២ នេះ​ថា ច្បាប់​ចរាចរណ៍​ផ្លូវគោក​ថ្មី​ដែល​កំពុងតែ​ប្រជុំ​ឆ្លង​សេចក្ដី​ព្រាង​នៅ​ពេលនេះ គឺ​មាន​ចែង​អំពី​អ្នក​បើកបរ​ទាំងឡាយ​ណា​ដែល​ត្រូវ​បាន​រក​ឃើញ​មាន​សារធាតុ​ញៀន។ លោក​ថា ក្នុង​នោះ​ក៏​នឹង​មាន​ការ​ដកហូត​ប័ណ្ណ​បើកបរ និង​មិន​អនុញ្ញាត​ឱ្យ​បើកបរ​រថយន្ត​បន្ត​ទៀត​ផង​ដែរ អំឡុង​ពេល​ដែល​ច្បាប់​នេះ​មិន​ទាន់​ចែង​អំពី​ទោស​បញ្ញត្តិ​ណា​មួយ​ឱ្យ​បាន​ជាក់លាក់​ជុំវិញ​ករណី​នេះ។

លោក ស ខេង លើកឡើង​ថា ក្នុង​ច្បាប់​ចរាចរណ៍​ផ្លូវគោក​ថ្មី​ដែល​បាន​កែប្រែ​ខុស​ពី​ច្បាប់​ចាស់​រហូត​ដល់​ទៅ​ជាង ៦០​ភាគរយ​នេះ គ្រប់​ភាគី​ពាក់ព័ន្ធ​បាន​ឯកភាព​គ្នា​កំណត់​ថា អ្នក​បើកបរ​យានយន្ត​ទាំងអស់​មិន​ត្រូវ​ស្ថិត​ក្រោម​ស្ថានភាព​ស្រវឹង​ដាច់ខាត ក្នុង​នោះ​មាន​ទាំង​គ្រឿងញៀន​ផង​ដែរ ហើយ​អ្នក​បើកបរ​យានយន្ត​នឹង​ត្រូវ​តម្រូវ​ឲ្យ​ធ្វើ​តេស្ដ​រក​សារធាតុ​ញៀន​គ្រប់​គ្នា​ទាំងអស់។

រដ្ឋមន្ត្រី​ក្រសួង​មហាផ្ទៃ​រូប​នេះ​បញ្ជាក់​ថា សេចក្ដី​ព្រាងច្បាប់​ស្ដីពី​ចរាចរណ៍​ផ្លូវគោក​ថ្មី​នេះ មាន​ភាព​គ្រប់​ជ្រុងជ្រោយ​ជាង​ច្បាប់​ចាស់ ខណៈ​មន្ត្រី​អន្តរ​ក្រសួង ជាពិសេស​ក្រសួង​មហាផ្ទៃ និង​ក្រសួង​សាធារណការ បាន​ឯកភាព​គ្នា​ទាំងស្រុង​ហើយ​ដើម្បី​បញ្ជូន​ច្បាប់​នេះ​ទៅ​ស្ថាប័ន​រដ្ឋសភា​ដើម្បី​ពិនិត្យ និង​អនុម័ត​នៅ​ដើម​ឆ្នាំ​២០២៣ ខាងមុខ​នេះ។

នៅ​ថ្ងៃទី​២៨ ខែ​ធ្នូ ឆ្នាំ​២០២២ នេះ ក្រសួង​មហាផ្ទៃ និង​ក្រសួង​សាធារណការ និង​ដឹកជញ្ជូន រួម​ជាមួយ​អន្តរ​ក្រសួង​ផ្សេង​ទៀត បាន​បើក​កិច្ចប្រជុំ​លើ​សេចក្ដី​ព្រាងច្បាប់​ស្ដីពី​ចរាចរណ៍​ផ្លូវគោក​ថ្មី​នៅ​ទីស្ដីការ​ក្រសួង​មហាផ្ទៃ ដោយ​កែសម្រួល​ខ្លឹមសារ​មាត្រា​ច្បាប់​ចាស់​ចំនួន ៤៨​មាត្រា និង​បន្ថែម​មាត្រា​ថ្មីៗ​មួយ​ចំនួន​ទៀត ដើម្បី​ឲ្យ​ស្រប​តាម​ការ​អភិវឌ្ឍ​ផ្លូវថ្នល់​នៅ​ប្រទេស​កម្ពុជា ដូចជា​ផ្លូវ​ល្បឿន​លឿន និង​បង្កើន​ប្រសិទ្ធភាព​កាត់បន្ថយ​អ្នក​ស្លាប់ និង​របួស​ដោយ​គ្រោះថ្នាក់​ចរាចរណ៍ ព្រមទាំង​ទប់ស្កាត់​ការ​បើកបរ​មាន​សារធាតុ​ញៀន​ផង​ដែរ។

ស្ថាបនិក​អង្គការ​អភិវឌ្ឍន៍​ផ្នត់គំនិត លោក សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​២៨ ធ្នូ នេះ​ថា ការ​អនុវត្ត​បែប​នេះ គឺជា​រឿង​ល្អ ព្រោះ​ថា​កន្លងមក​រថយន្ត​ធំៗ​តែង​បង្ក​គ្រោះថ្នាក់​ដល់​អាយុជីវិត​ប្រជាពលរដ្ឋ​លើ​ដងផ្លូវ​យ៉ាង​ធ្ងន់ធ្ងរ និង​បាន​បង្ក​ការ​ខូចខាត​ដល់​ទ្រព្យសម្បត្តិ​សាធារណៈ​ថែម​ទៀត។

លោក សេក សុជាតិ លើកឡើង​ថា ក្រៅពី​រថយន្ត​ដឹក​ទំនិញ​ធំៗ អ្នក​បើកបរ​ប្រភេទ​រថយន្ត​គ្រួសារ​ក៏​តែងតែ​បង្ក​គ្រោះថ្នាក់​ដល់​អ្នក​ធ្វើ​ដំណើរ​ផង​ដែរ នៅ​ពេល​ដែល​ម្ចាស់​រថយន្ត​ទាំងនោះ​ចេញពី​ភោជនីយដ្ឋាន​នៅ​ពេល​រាត្រី​ដែល​បង្ខំ​បើកបរ​ក្នុង​ស្ថានភាព​ស្រវឹង ហើយ​ករណី​នេះ​ឧស្សាហ៍​កើត​នៅ​ក្នុង​ទីក្រុង​ភ្នំពេញ​តែម្តង ដែល​តែង​បង្ក​ការ​ខូចខាត​ដល់​ទ្រព្យសម្បត្តិ​សាធារណៈ​យ៉ាង​ធ្ងន់ធ្ងរ។

មន្ត្រី​អង្គការ​ក្រៅ​រដ្ឋាភិបាល​រូប​នេះ​បញ្ជាក់​ថា ដើម្បី​ធានា​នូវ​ការ​អនុវត្ត​ឱ្យ​មាន​ប្រសិទ្ធភាព និង​បញ្ចៀស​នូវ​ការ​ប្រព្រឹត្ត​អំពើពុករលួយ​ពី​ការ​អនុវត្ត​ច្បាប់​ចរាចរណ៍​ផ្លូវគោក​ថ្មី​នេះ ក្រសួង​មហាផ្ទៃ​គួរ​បង្កើត​កម្លាំង​ចម្រុះ​ពី​ស្ថាប័ន​ពាក់ព័ន្ធ​ឱ្យ​អនុវត្ត​ជាមួយ​គ្នា ដូចជា​អង្គភាព​បង្ក្រាប​គ្រឿងញៀន ក្រសួង​សាធារណការ និង​ដឹកជញ្ជូន ជាមួយ​នឹង​អង្គភាព​ចរាចរណ៍​ផ្លូវគោក ដើម្បី​អនុវត្ត​ការ​ត្រួតពិនិត្យ​លើ​អ្នក​បើកបរ​ដែល​មាន​សារធាតុ​ញៀន​ទាំងនោះ។

កាលពី​ថ្ងៃទី​៩ ខែ​កុម្ភៈ ឆ្នាំ​២០២២ កន្លងទៅ គណៈកម្មាធិការ​សុវត្ថិភាព​ចរាចរណ៍​ផ្លូវគោក បាន​បង្ហាញ​​សេចក្តី​រាយការណ៍​ថា គ្រោះថ្នាក់​ចរាចរណ៍​ផ្លូវគោក​ឆ្នាំ​២០២១ បាន​កើតឡើង​ចំនួន ២៦៧០​លើក​បណ្ដាល​ឱ្យ​ស្លាប់​មនុស្ស​ចំនួន ១៤៩៧​នាក់ ដែល​ផ្តើម​ចេញពី​មូលហេតុ​សំខាន់ៗ ដូចជា​ការ​បើកបរ​លើស​ល្បឿន​កំណត់ មិន​គោរព​សិទ្ធិ​គ្នា មិន​ប្រកាន់​ស្ដាំ និង​បើកបរ​ក្នុង​ស្ថានភាព​ស្រវឹង​ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស