វេទិកាពលរដ្ឋដែលមានមូលដ្ឋាននៅសហរដ្ឋអាមេរិក អំពាវនាវឱ្យមេដឹកនាំបក្សកាន់អំណាច លោក ហ៊ុន សែន យកថ្ងៃខួប៤៤ នៃទិវាជ័យជម្នះ ៧មករា ដោះលែងអ្នកទោសមនសិការទាំងអស់ឱ្យមានសេរីភាពឡើងវិញ ដើម្បីបញ្ជាក់ថាពិតជាថ្ងៃជ័យជម្នះរបស់ប្រជាជនកម្ពុជាពិតប្រាកដ។
វេទិកាពលរដ្ឋ ចេញសេចក្តីថ្លែងការណ៍នៅថ្ងៃទី៦ ខែមករា ឆ្នាំ២០២៣ ដោយអំពាវនាវឱ្យមេដឹកនាំបក្សកាន់អំណាច លោក ហ៊ុន សែន យកថ្ងៃខួប៤៤ នៃទិវាជ័យជម្នះ ៧មករា នេះដោះលែងអ្នកទោសមនសិការទាំងអស់ឱ្យមានសេរីភាពឡើងវិញ ដើម្បីបញ្ជាក់ប្រាប់ពលរដ្ឋខ្មែរថាពិតជាថ្ងៃជ័យជម្នះរបស់ប្រជាជនកម្ពុជាប្រាកដមែន។
សេចក្តីថ្លែងការណ៍ដដែលអះអាងថា បើយោងតាមការអះអាងរបស់លោក ហ៊ុន សែន ដែលថាគាត់កំពុងដឹកនាំកម្ពុជាឲ្យមានសន្តិភាព និងឯករាជ្យនោះ មេដឹកនាំខ្មែររូបនេះមិនគួរមានហេតុផលអ្វីបន្តឃុំខ្លួនអ្នកទោសមនសិការដែលជាប្រជាពលរដ្ឋខ្មែរពុំមានកំហុសទៀតឡើយ។
អង្គការសង្គមស៊ីវិលដែលមានមូលដ្ឋាននៅក្រៅស្រុកដដែលនេះ ជំរុញឱ្យមេដឹកនាំកម្ពុជា លោក ហ៊ុន សែន កែប្រែការដឹកនាំរបស់ខ្លួនឡើងវិញនៅពេលនេះ ដើម្បីបន្សល់កេរ្តិ៍ឈ្មោះល្អក្នុងប្រវត្តិសាស្ត្រ និងសម្រាប់ក្រុមគ្រួសារត្រកូល «ហ៊ុន» របស់លោកទៅថ្ងៃអនាគត ព្រោះថាមានតែការផ្សះផ្សាជាតិឯងប៉ុណ្ណោះ ទើបអាចដោះស្រាយវិបត្តិជាតិដែលកំពុងជាប់គាំងឱ្យទៅជាប្រយោជន៍សម្រាប់ជាតិខ្មែរទាំងមូលបាន។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ថ្លែងថា ប្រជាពលរដ្ឋខ្មែរពិតជាមិនភ្លេចទេនូវសោកនាដកម្មដែលរបបប្រល័យពូជសាសន៍ ប៉ុល ពត បានសម្លាប់ពលរដ្ឋស្លូតត្រង់អស់ប្រមាណជា ២លាននាក់។ កេរដំណែលថ្ងៃ៧ មករា ហ៊ុន សែន-វៀតណាម បានបន្សល់នូវស្តូបដឹងគុណវៀតណាមស្ទើរពេញផ្ទៃប្រទេសកម្ពុជាទៅហើយ។ លោកថា ស្តូបទាំងនេះកំពុងតែត្រូវបានបង្កើតទៅជាទីតាំងមូលដ្ឋានរបស់សមាគមវៀតណាម ដែលមានទាំងកម្លាំងរដ្ឋបាល និងកម្លាំងប្រដាប់អាវុធដែលពួកគេមានអំណាចស្មើគ្នានឹងអាជ្ញាធរមូលដ្ឋានខ្មែរដែរ។
លោកបន្តថា នេះគឺជាសញ្ញាដ៏អាក្រក់បំផុតមួយសម្រាប់ប្រទេសកម្ពុជាដែលនឹងត្រូវបន្តទៅដំណាក់កាលលោក ហ៊ុន ម៉ាណែត-វៀតណាម ដើម្បីជំនួសលោក ហ៊ុន សែន។
អតីតអ្នកទោសនយោបាយ និងជាមន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា ប្រាប់សារព័ត៌មាន The Cambodia Daily ថា ថ្ងៃ៧ មករា ឆ្នាំ១៩៧៩ ដែលបក្សកាន់អំណាចអះអាងថាជាថ្ងៃជ័យជម្នះសម្រាប់ប្រទេសកម្ពុជា គ្រាន់តែជាការលើកឡើងរបស់ក្រុមអ្នកកាន់អំណាចតែម្ខាងប៉ុណ្ណោះ ខណៈប្រជាពលរដ្ឋខ្មែរនៅតែចាត់ទុកថាជាថ្ងៃដែលកងទ័ពវៀតណាម បានចូលឈ្លានពានទឹកដីកម្ពុជាតាមរយៈគណបក្សប្រជាជនកម្ពុជា ដែលកំពុងដឹកនាំដោយមេដឹកនាំខ្មែរដែលវៀតណាមលើកបន្តុបកាលពី ៣៨ឆ្នាំមុននោះ។
លោក មាជ សុវណ្ណារ៉ា បញ្ជាក់ថា ថ្ងៃ៧ មករា គឺជាថ្ងៃជោគជ័យរបស់គណបក្សប្រជាជនកម្ពុជាដែលមានការជួយជ្រោមជ្រែងពីវៀតណាម ប៉ុន្តែបើគ្មានកិច្ចព្រមព្រៀងអន្តរជាតិនៅថ្ងៃទី២៣ ខែតុលា ឆ្នាំ១៩៩១ ដែលគេហៅថាកិច្ចព្រមព្រៀងសន្តិភាពទីក្រុងប៉ារីសទេ កម្ពុជានៅពេលនេះបានក្លាយជាប្រទេសមួយដែលចំណុះឱ្យប្រទេសវៀតណាម ដូចទឹកដីកម្ពុជាក្រោមសព្វថ្ងៃនេះជាក់ជាមិនខាន។
យ៉ាងណាក៏ដោយ កាលពីថ្ងៃទី៧ ខែមករា ឆ្នាំ២០២២ មេដឹកនាំបក្សកាន់អំណាច លោក ហ៊ុន សែន អះអាងថាថ្ងៃជ័យជម្នះ ៧មករា គឺជាថ្ងៃប្រវត្តិសាស្ត្រដែលគណបក្សប្រជាជនកម្ពុជាបានផ្តល់កំណើតលើកទីពីរដល់ប្រជាជនខ្មែរគ្រប់ៗរូបដែលគ្មានអ្នកណាអាចបដិសេធបានឡើយ។
កាលពីថ្ងៃទី៥ ខែមករា ឆ្នាំ២០២៣ បេក្ខជនអនាគតនាយករដ្ឋមន្ត្រីរបស់គណបក្សប្រជាជនកម្ពុជា លោក ហ៊ុន ម៉ាណែត បានលើកឡើងក្នុងពិធីសម្ពោធសមិទ្ធផលក្នុងវត្តឧត្តមសាមគ្គី ហៅវត្តវាលកន្សែង ស្ថិតក្នុងស្រុកឆ្លូង ខេត្តក្រចេះ ថា គុណបំណាច់ជ័យជម្នះថ្ងៃ៧ មករា របស់គណបក្សប្រជាជនកម្ពុជា នឹងបន្តស្ថិតដក់ជាប់ក្នុងក្រអៅបេះដូងរបស់ប្រជាជនខ្មែរគ្រប់រូប ដែលទទួលបានការជួយសង្គ្រោះអាយុជីវិតឲ្យរួចផុតពីការកាប់សម្លាប់ក្នុងរបបវាលពិឃាតដ៏សាហាវយង់ឃ្នង។
កូនប្រុសច្បងរបស់អតីតមេកម្មាភិបាលខ្មែរក្រហម លោក ហ៊ុន ម៉ាណែត បញ្ជាក់ថា កម្ពុជាដែលក្រោមការដឹកនាំរបស់គណបក្សប្រជាជនកម្ពុជាដែលមានលោក ហ៊ុន សែន ជាអ្នកដឹកនាំ គឺធានាបាននូវការថែរក្សាសុខសន្តិភាព សាមគ្គីភាពជាតិ និងទប់ស្កាត់កុំឱ្យរបបប្រល័យពូជសាសន៍វិលត្រឡប់មកដឹកនាំកម្ពុជាដូចដែលកម្ពុជាធ្លាប់បានទទួលរងគ្រោះក្នុងអំឡុងទសវត្សរ៍ឆ្នាំ១៩៧៥ ដល់ឆ្នាំ១៩៧៩ កន្លងមក។
ទាក់ទិននឹងបញ្ហានេះ កាលពីពេលថ្មីៗនេះ ស្ថានទូតវៀតណាម ប្រចាំនៅកម្ពុជា អះអាងថា ជ័យជម្នះនៅថ្ងៃទី៧ ខែមករា ឆ្នាំ១៩៧៩ ដែលអាចជួយសង្គ្រោះប្រជាជនកម្ពុជាពីអំពើប្រល័យពូជសាសន៍ ដោយបានទទួលមកវិញនូវសិទ្ធិរស់រានមានជីវិត និងសិទ្ធិជាមនុស្ស គឺដោយសារបក្សកុម្មុយនីស្តវៀតណាម ជាមួយកងទ័ព និងប្រជាជនវៀតណាម ដែលបានអនុវត្តសិទ្ធិស្របច្បាប់ជួយសង្គ្រោះប្រជាជនកម្ពុជាពីរបបប្រល័យពូជសាសន៍ខ្មែរក្រហម៕