អ្នកឃ្លាំមើលសង្គមលើកឡើងថា ទំហំនៃការរឹបអូស និងឃាត់ខ្លួនអ្នកប្រើប្រាស់ និងជួញដូរគ្រឿងញៀននៅឆ្នាំនេះបានកើនឡើងទ្វេដង បើធៀបនឹងឆ្នាំ២០២១ បង្ហាញពីសញ្ញាគ្រោះថ្នាក់ និងគំរាមកំហែងខ្លាំងដល់យុវជន និងសង្គមជាតិកម្ពុជាបច្ចុប្បន្ន និងអនាគត។
ការលើកឡើងនេះ បន្ទាប់ពីសេចក្តីរាយការណ៍របស់អាជ្ញាធរជាតិបង្ហាញថា ក្នុងឆ្នាំ២០២២ កន្លងទៅ សមត្ថកិច្ចបង្ក្រាបបទល្មើសគ្រឿងញៀននៅទូទាំងប្រទេសបានជិត ៦៣០០ករណី (៦២៩០ករណី) ឃាត់ខ្លួនមនុស្សជិត ១ម៉ឺន ៥ពាន់នាក់ (១៤៧៨៤នាក់) និងរឹបអូសបានគ្រឿងញៀនជាច្រើនប្រភេទជិត ១៥តោន។
តួលេខនេះ បានឆ្លុះបញ្ចាំងឲ្យឃើញថា បទល្មើសគ្រឿងញៀននៅកម្ពុជាបានកើនឡើងទ្វេដង បើធៀបនឹងឆ្នាំ២០២១ សមត្ថកិច្ចរឹបអូសគ្រឿងញៀនជាង ៤តោនតែប៉ុណ្ណោះ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ កត់សម្គាល់ថា ទំហំនៃការរឹបអូស និងអ្នកញៀនគ្រឿងញៀននៅឆ្នាំនេះបានបង្ហាញពីសញ្ញាគ្រោះថ្នាក់ និងគំរាមកំហែងខ្លាំងដល់យុវជន និងសង្គមជាតិកម្ពុជាបច្ចុប្បន្ន និងអនាគត។
លោកថា កត្តាដែលជំរុញឲ្យបទល្មើសគ្រឿងញៀនកើនឡើងបណ្ដាលមកពីការបង្ការ និងអប់រំមិនមានប្រសិទ្ធភាព ខណៈវិធានការបង្ក្រាបវិញ លោកមើលឃើញថាមានសន្ទុះខ្លាំង ប៉ុន្តែនៅមិនអាចផ្ដាច់ឫសគល់នៃការជួញដូរ និងចែកចាយគ្រឿងញៀនបាន។
ជាមួយគ្នានេះ ការចូលរួមរបស់ភាគីពាក់ព័ន្ធនៅមានកម្រិតទាប ដែលធ្វើឲ្យវិធានការទប់ស្កាត់បទល្មើសពីគ្រឿងញៀនមិនមានប្រសិទ្ធភាពផងដែរ។
លោក សន ជ័យ ស្នើទៅអាជ្ញាធរប្រយុទ្ធប្រឆាំងគ្រឿងញៀនពិនិត្យមើលពីរចនាសម្ព័ន្ធដឹកនាំ និងយុទ្ធសាស្ត្ររបស់ខ្លួនឡើងវិញ ដោយសិក្សាពីបទពិសោធន៍ពីប្រទេសជិតខាងដែលអនុវត្ត ហើយទទួលបានជោគជ័យក្នុងការបង្ក្រាបបទល្មើសគ្រឿងញៀន។
ជុំវិញរឿងនេះ កាលពីថ្ងៃទី១៥ ខែធ្នូ ឆ្នាំ២០២២ លោក ស ខេង ជំរុញឲ្យសមត្ថកិច្ចយកចិត្តទុកដាក់ដើម្បីប្រយុទ្ធប្រឆាំងគ្រឿងញៀននៅតាមសហគមន៍ ភូមិ ឃុំ សង្កាត់ ដោយថាគ្រឿងញៀនជាសត្រូវធំបំផុតនៃការអភិវឌ្ឍធនធាន និងការរក្សាសន្តិសុខ និងសណ្ដាប់ធ្នាប់សាធារណៈ។
លោកបញ្ជាក់ថា ក្នុងចំណោមអ្នកជាប់ឃុំជិត ៤ម៉ឺននាក់នៅពន្ធនាគារទូទាំងប្រទេស ក្នុងនោះចំនួន ៥០% ពួកគេជាប់ឃុំដោយសារបទល្មើសគ្រឿងញៀន ខណៈមួយថ្ងៃ សមត្ថកិច្ចឃាត់ខ្លួនអ្នកប្រើប្រាស់ និងជួញដូរចន្លោះពី ១០ ទៅ ២០នាក់នៅតាមបណ្ដាខេត្តមួយចំនួនទូទាំងប្រទេស ដែលពួកគេភាគច្រើនជាយុវជនផងដែរ។
លោក ស ខេង ជំរុញឲ្យសមត្ថកិច្ចយកចិត្តទុកដាក់ដើម្បីប្រយុទ្ធប្រឆាំងគ្រឿងញៀននៅតាមសហគមន៍ ភូមិ ឃុំ សង្កាត់ ដោយថាគ្រឿងញៀនជាសត្រូវធំបំផុតនៃការអភិវឌ្ឍធនធានមនុស្ស និងការរក្សាសន្តិសុខ និងសណ្ដាប់ធ្នាប់សាធារណៈ។
តែយ៉ាងណា វិធានការទប់ស្កាត់គ្រឿងញៀនរបស់លោកនាយករដ្ឋមន្ត្រី ហ៊ុន សែន ចាប់តាំងពីឆ្នាំ២០១៧ ដល់ចុងឆ្នាំ២០២២ នេះត្រូវបរាជ័យ ដោយសារបទល្មើសគ្រឿងញៀននៅក្នុងកម្ពុជាមិនបានថយចុះ ផ្ទុយទៅវិញបែរជាបានបន្តកើនឡើងទ្វេដងពីមួយឆ្នាំទៅមួយឆ្នាំ។
បើតាមអង្គការសហប្រជាជាតិស្ដីពីឧក្រិដ្ឋកម្ម និងគ្រឿងញៀន (UNODC) អំឡុងខែមិថុនា ឆ្នាំ២០២១ បានបង្ហាញសេចក្តីរាយការណ៍ថ្មីមួយរកឃើញថា ប្រទេសកម្ពុជាជាគោលដៅចម្បងនៃក្រុមឧក្រិដ្ឋជនគ្រឿងញៀនប្រើប្រាស់ជាទីតាំងសម្រាប់ការចរាចរគ្រឿងញៀន ផលិត កែច្នៃ និងចែកចាយបន្ត ដែលថាក្រុមឧក្រិដ្ឋជនគ្រឿងញៀនទាំងនោះភាគច្រើនជាជនជាតិចិន និងចិនតៃវ៉ាន់៕