ក្រុមអង្គការសង្គមស៊ីវិលថាការទាមទារឱ្យអង្គការសង្គមស៊ីវិលលុបវីដេអូដែលមានចំណងជើងថា «ឈាមបាតុករ» ដែលត្រូវបានគេផ្សព្វផ្សាយព្រោងព្រាតតាមបណ្ដាញទំនាក់ទំនងផ្សេងៗនៅក្នុងខួប ៩ឆ្នាំនៃការបង្ក្រាបដោយហិង្សាពីសំណាក់កម្លាំងសមត្ថកិច្ចរដ្ឋាភិបាល បង្ហាញថាសេរីភាពបញ្ចេញមតិនៅកម្ពុជាកំពុងរងការរឹតត្បិតធ្ងន់ធ្ងរ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី១១ មករា នេះថា ការបង្ហោះវីដេអូដែលមានបំណងទាមទារនូវយុត្តិធម៌សម្រាប់ជនរងគ្រោះដែលបានស្លាប់ បាត់ខ្លួន និងរងរបួសក្នុងការបង្ក្រាបដោយហិង្សាកាលពី ៩ឆ្នាំមុន មិនមែនជារឿងខុសច្បាប់ ឬនាំឱ្យមានអសន្តិសុខក្នុងសង្គមនោះទេ តែបែរជាសមត្ថកិច្ចទាមទារឱ្យលុបវីដេអូនេះទៅវិញ ខណៈយុត្តិធម៌សម្រាប់ជនរងគ្រោះទាំងនោះនៅតែស្ងាត់សូន្យនៅឡើយ។
មន្ត្រីសង្គមស៊ីវិលរូបនេះលើកឡើងថា ការជំរុញឱ្យលុបវីដេអូនេះចេញពីបណ្ដាញសង្គមផ្សេងៗពីសំណាក់អាជ្ញាធរ អាចជាចេតនាមួយចង់លុបបំបាត់នូវព្រឹត្តិការណ៍ពិតមួយដែលបានកើតឡើងនៅកម្ពុជា ស្របពេលដែលជនរងគ្រោះនៅតែទន្ទឹងរង់ចាំយុត្តិធម៌ពីសមត្ថកិច្ចនៅឡើយ ខណៈអង្គការសង្គមស៊ីវិលដែលបង្ហោះវីដេអូនេះក៏ចង់ឱ្យជនរងគ្រោះទាំងនោះទទួលបានយុត្តិធម៌ដូចគ្នាដែរ។
លោក ស៊ឹង សែនករុណា ត្អូញត្អែរថា រយៈពេល ៩ឆ្នាំដែលជនរងគ្រោះរង់ចាំយុត្តិធម៌ពីអាជ្ញាធរខ្មែរ ប៉ុន្តែលទ្ធផលគឺត្រូវសមត្ថកិច្ចតម្រូវឱ្យលុបវីដេអូដែលជាឯកសារពិតរបស់ជនរងគ្រោះពីការបង្ក្រាបដោយហិង្សាទៅវិញ។
លោកបញ្ជាក់ថា ដើម្បីបញ្ឈប់នូវអំពើនិទ្ទណ្ឌភាពនានា សមត្ថកិច្ចគ្មានជម្រើសណាផ្សេងក្រៅតែពីផ្តល់យុត្តិធម៌ជូនជនរងគ្រោះឡើយ ដែលជាដំណោះស្រាយយ៉ាងពិតប្រាកដ និងជាការធានានូវការអនុវត្តប្រព័ន្ធយុត្តិធម៌របស់កម្ពុជាដោយត្រឹមត្រូវផងដែរ។
កាលពីថ្ងៃទី១០ ខែមករា ឆ្នាំ២០២៣ ក្រោយការបំភ្លឺនៅស្នងការដ្ឋាននគរបាលរាជធានីភ្នំពេញ នាយកមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា អះអាងថា គោលបំណងនៃការបង្ហោះវីដេអូនោះ គឺមានបំណងសំខាន់៣៖
- ចង់រំលឹកពីខួប ៩ឆ្នាំនៃព្រឹត្តិការណ៍ដែលកងកម្លាំងចម្រុះបាញ់សម្លាប់បាតុករ និងប្រើហិង្សាលើបាតុករ
- ចង់ឲ្យមានការស៊ើបអង្កេតប្រកបដោយតម្លាភាពដែលមានការចូលរួមពីភាគីពាក់ព័ន្ធទាំងអស់
- ចង់ឱ្យមានការបញ្ឈប់រាល់អំពើហិង្សាគ្រប់រូបភាពដោយប្តូរមកវិញនូវការដោះស្រាយដោយសន្តិវិធី។
ចំណែកប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វន់ ពៅ លើកឡើងថា វីដេអូនេះមិនមែនជាឯកសារអាថ៌កំបាំងអ្វីទេ ត្បិតនរណាៗក៏គេបានបង្ហោះលើបណ្ដាញសង្គមហ្វេសប៊ុក និងយូធូបព្រោងព្រាតតាំងពីព្រឹត្តិការណ៍នោះបានកើតឡើងកាលពីឆ្នាំ២០១៤ មកម្ល៉េះ។
លោក វន់ ពៅ បញ្ជាក់ថា ការបង្ហោះ ឬចែកចាយវីដេអូនេះឡើងវិញ គឺគ្រាន់តែដើម្បីរំលឹកខួបនៃការបង្ក្រាបលើជនរងគ្រោះ និងដើម្បីទាមទាររកយុត្តិធម៌ឱ្យពួកគេប៉ុណ្ណោះ ព្រោះថាអស់រយៈពេល ៩ឆ្នាំហើយដែលជនរងគ្រោះពីការបង្ក្រាបដោយហិង្សានោះ មិនទាន់ទទួលបាននូវយុត្តិធម៌ពីអាជ្ញាធរខ្មែរនៅឡើយ។
ដោយឡែកនាយកទទួលបន្ទុកចាត់ការទូទៅនៃអង្គការការពារសិទ្ធិមនុស្សលីកាដូ លោក អំ សំអាត អះអាងថា ការបង្ហោះវីដេអូនេះ គឺមានបំណងត្រឹមតែរំលឹកពីខួប ៩ឆ្នាំនៃព្រឹត្តិការណ៍ដែលកងកម្លាំងចម្រុះបាញ់សម្លាប់បាតុករ និងប្រើហិង្សាលើបាតុករ ចង់ឲ្យមានការស៊ើបអង្កេត និងបញ្ឈប់រាល់អំពើហិង្សាប៉ុណ្ណោះ មិនមែនមានបំណងផ្សេងដូចការលើកឡើងរបស់អាជ្ញាធរដែលថាមានចេតនាអុជអាល ញុះញង់ អាចនឹងបង្កអសន្តិសុខ សណ្ដាប់ធ្នាប់ដល់សង្គមនោះទេ។
កាលពីអំឡុងឆ្នាំ២០១៤ កងកម្លាំងចម្រុះរបស់រដ្ឋាភិបាលកម្ពុជា បានបាញ់រះទៅលើកម្មករដែលកំពុងតវ៉ានៅមហាវិថីវ៉េងស្រេង ក្នុងបំណងសុំដំឡើងប្រាក់ខែ ១៦០ដុល្លារ ដែលធ្វើឱ្យមនុស្ស ៤នាក់ស្លាប់ ៣៨នាក់ផ្សេងទៀតរងរបួស និងក្មេងប្រុសម្នាក់ឈ្មោះ ខឹម សាផាត បានបាត់ខ្លួនមកទល់សព្វថ្ងៃនេះ៕