សហគមន៍ខ្មែរកម្ពុជាក្រោមនៃទ្វីបអាមេរិកខាងជើង ទាមទារឲ្យរដ្ឋាភិបាល និងតុលាការកម្ពុជា ដោះលែងលោក ថាច់ សេដ្ឋា ឲ្យមានសេរីភាពឡើងវិញ ដើម្បីលោកមានលទ្ធភាពធ្វើការតស៊ូមតិ និងការពារសិទ្ធិមនុស្សជូនខ្មែរក្រោម។
សេចក្ដីថ្លែងការណ៍របស់សហគមន៍ខ្មែរកម្ពុជាក្រោមនៃទ្វីបអាមេរិកខាងជើង បានចេញផ្សាយជាសាធារណៈកាលពីថ្ងៃទី២២ ខែមករា ឆ្នាំ២០២៣ ឲ្យដឹងថា នៅពេលដែលលោក ថាច់ សេដ្ឋា រស់នៅក្នុងទឹកដីកម្ពុជាក្រោម លោកបានរងនៃការធ្វើទុក្ខបុកម្នេញពីអាណានិគមវៀតណាម ឥតស្រាកស្រាន្ត ដូច្នេះទើបលោកភៀសខ្លួនមករស់នៅក្នុងទឹកដីកម្ពុជាកណ្ដាល ដោយបន្តតស៊ូមតិដើម្បីប្រឆាំងនឹងការធ្វើទុក្ខបុកម្នេញដល់ពលរដ្ឋខ្មែររាប់លាននាក់ ដែលកំពុងរស់នៅក្រោមការត្រួតត្រារបស់វៀតណាម។
តែយ៉ាងណា ពួកគេបង្ហាញការខកចិត្តចំពោះអាជ្ញាធរក្រុងភ្នំពេញដែលបានចាប់ និងបញ្ជូនខ្លួនលោក ថាច់ សេដ្ឋា ដែលមានដើមកំណើតខ្មែរកម្ពុជាក្រោមទៅឃុំនៅពន្ធនាគារព្រៃសទាំងយប់ កាលពីថ្ងៃទី១៦ ខែមករា ឆ្នាំ២០២៣។
សហគមន៍ខ្មែរកម្ពុជាក្រោមនៃទ្វីបអាមេរិកខាងជើង បានទាមទារឲ្យរដ្ឋាភិបាល និងតុលាការកម្ពុជា ដោះលែងលោក ថាច់ សេដ្ឋា ឲ្យមានសេរីភាពឡើងវិញដើម្បីលោកមានលទ្ធភាពធ្វើការតស៊ូមតិ និងការពារសិទ្ធិមនុស្សជូនខ្មែរក្រោម។
ការចាប់ និងបញ្ជូនលោក ថាច់ សេដ្ឋា ទៅឃុំនៅពន្ធនាគារភ្លាមៗនេះ ដោយចៅក្រមស៊ើបសួរ លោក ទិត ដាលីន លើកហេតុផលថា លោក ថាច់ សេដ្ឋា មិនបានចូលបំភ្លឺតាមដីកាកោះហៅរបស់តុលាការចំនួនពីរលើកកាលពីឆ្នាំ២០២១។
ក្រុមហ៊ុន រិន ឆាយ ផនសប បានដាក់បណ្ដឹងទៅតុលាការប្ដឹងលោក ថាច់ សេដ្ឋា «មិនបានបំពេញកាតព្វកិច្ចចំពោះឧបករណ៍អាចជួញដូរបាន» ឬហៅថា ការចេញសែកដោយគ្មានសាច់ប្រាក់ចំនួន ៥សន្លឹកទៅឲ្យក្រុមហ៊ុននេះ ដែលប្រព្រឹត្តតាំងពីឆ្នាំ២០១៩។
ប៉ុន្តែបើតាមលោក សំ សុគង់ មេធាវីការពារក្ដីឲ្យលោក ថាច់ សេដ្ឋា បានទទួលស្គាល់ថា កូនក្ដីរបស់លោកធ្លាប់ខ្ចីលុយពីក្រុមហ៊ុន រិន ឆាយ ចំនួន ២ម៉ឺនដុល្លារអាមេរិក ប៉ុន្តែទឹកប្រាក់ ២ម៉ឺនដុល្លារនេះ កូនក្ដីលោកសងត្រឡប់វិញដោយបំណុលដែលនៅសល់ប្រហែល ៥០០០ដុល្លារអាមេរិកតែប៉ុណ្ណោះ។
យោងតាមរបាយការណ៍របស់ក្រសួងពាណិជ្ជកម្ម ឲ្យដឹងថា ក្រុមហ៊ុន រិន ឆាយ ផនសប បានចុះបញ្ជីពាណិជ្ជកម្មផ្លូវការនៅក្នុងក្រសួងពាណិជ្ជកម្ម កាលពីខែតុលា ឆ្នាំ២០១៥ ដោយម្ចាស់ក្រុមហ៊ុនឈ្មោះ ហៃ វ៉ាន់រិន ជាមនុស្សស្និទ្ធនឹងគណបក្សប្រជាជនកម្ពុជា។
លោក ហៃ វ៉ាន់រិន ក៏ជាម្ចាស់ក្រុមហ៊ុន Dynith Commercial ដែលមានទីតាំងនៅសង្កាត់ទំនប់ទឹក ខណ្ឌចំការមន រាជធានីភ្នំពេញដែរ ដោយក្រុមហ៊ុននេះបានចុះបញ្ជីនៅក្រសួងពាណិជ្ជកម្ម កាលពីចុងខែមីនា ឆ្នាំ២០១៤។
បច្ចុប្បន្ន ក្រុមហ៊ុន Dynith Commercial នេះ គ្រប់គ្រងដោយអ្នកស្រី ឌី សុខឃី ជាកូនស្រីអតីតស្នងការក្រុងភ្នំពេញ លោក ហុក ឡង់ឌី ហើយក៏ត្រូវជាភរិយារបស់លោក ហ៊ុន ម៉ានិត ដែលជាកូនប្រុសទីពីររបស់លោក ហ៊ុន សែន ផងដែរ៕