32 C
Phnom Penh

លោក ស ខេង៖ គ្រោះថ្នាក់​ចរាចរណ៍​នៅតែ​ស្ថិត​ក្នុង​អត្រា​ខ្ពស់​ក្នុង​ចំណោម​គ្រោះថ្នាក់​សង្គម​ផ្សេង​ទៀត

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​មហាផ្ទៃ លោក ស ខេង ព្រមាន​ថា គ្រោះថ្នាក់​ចរាចរណ៍​ក្នុង​ឆ្នាំ​២០២២ នេះ នៅតែ​ស្ថិត​ក្នុង​អត្រា​ខ្ពស់ នាំ​ឲ្យ​ពលរដ្ឋ​ស្លាប់ និង​របួស​ច្រើន​ក្នុង​ចំណោម​គ្រោះថ្នាក់​សង្គម​ផ្សេង​ទៀត។

ការ​ថ្លែង​របស់​រដ្ឋមន្ត្រី​ក្រសួង​មហាផ្ទៃ ធ្វើឡើង​ក្នុង​កិច្ចប្រជុំ​បូក​សរុប​លទ្ធផល​ការងារ​សុវត្ថិភាព​ចរាចរណ៍​ផ្លូវគោក​ឆ្នាំ​២០២២ និង​ទិសដៅ​ការងារ​ឆ្នាំ​២០២៣ ប្រារព្ធ​នៅ​ក្រសួង​សាធារណការ និង​ដឹកជញ្ជូន កាលពី​ថ្ងៃទី​៣០ ខែ​មករា ឆ្នាំ​២០២៣។

ក្នុង​កិច្ចប្រជុំ​នោះ លោក ស ខេង ថ្លែង​ថា ឆ្នាំ​២០២២ កន្លងទៅ គ្រោះថ្នាក់​ចរាចរណ៍​បាន​បង្ក​ឲ្យ​ពលរដ្ឋ​ចំនួន​ជាង ១៧០០​នាក់ (១៧០៩​នាក់) ស្លាប់ និង​របួស​ចំនួន​ជាង ៤​ពាន់​នាក់ (៤០២៦​នាក់) ក្នុង​នោះ​របួស​ធ្ងន់​ចំនួន​ជាង ២​ពាន់​នាក់ (២៥៧៩​នាក់)។

ចំនួន​នេះ​មាន​ការ​កើនឡើង បើ​ប្រៀបធៀប​នឹង​ឆ្នាំ​២០២១។ គ្រោះថ្នាក់​ចរាចរណ៍​នៅ​ឆ្នាំ​២០២២ កន្លងទៅ​នេះ​បាន​កើនឡើង ៣០៦​លើក​ស្មើ​នឹង ១១% អ្នក​ស្លាប់​កើន ២១២​នាក់​ស្មើ ១៤% របួស​កើន ៤១១​នាក់​ស្មើ ១១%។

លោក ស ខេង អះអាង​ថា មូលហេតុ​នៃ​គ្រោះថ្នាក់​ដោយសារ​អ្នក​បើកបរ​បើក​លើស​ល្បឿន​រហូត​ទៅ​ដល់​ចំនួន ៣៩% មិន​គោរព​សិទ្ធិ​អាទិភាព ២៤% មិន​ប្រកាន់​ស្ដាំ ១១% វ៉ា​ប្រជែង​គ្នា ១០% បត់​ក្នុង​ស្ថានភាព​គ្រោះថ្នាក់ ៩% ស្រវឹង ៤% ងងុយ​ដេក ១%។

លោក​បន្ត​ថា អត្រា​គ្រោះថ្នាក់​ចរាចរណ៍​កើនឡើង​នេះ​បាន​បន្សល់​ទុក​សោកនាដកម្ម​ជាច្រើន​ដល់​ពលរដ្ឋ ដូចជា​ការ​រង​របួស ពិការភាព ការ​ខាតបង់​ទ្រព្យសម្បត្តិ ជា​ឧបសគ្គ​រារាំង​ដល់​ដំណើរការ​អនុវត្ត​គោលនយោបាយ​កាត់បន្ថយ​ភាព​ក្រីក្រ​របស់​រាជរដ្ឋាភិបាល ដោយសារ​អ្នក​ប្រើប្រាស់​ផ្លូវ​មួយ​ចំនួន​មិន​គោរព​ប្រតិបត្តិ​ច្បាប់ ខ្វះ​សីលធម៌ ខ្វះ​ការ​យល់យោគ ខ្វះ​អធ្យាស្រ័យ ហាក់ដូចជា​មិន​សូវ​ស្រឡាញ់​ជីវិត​ខ្លួនឯង និង​អ្នក​ដទៃ។

លោក ស ខេង ក៏​បាន​ណែនាំ​ឲ្យ​អគ្គស្នងការដ្ឋាន​នគរបាល​ជាតិ​ពង្រឹង​ការ​ត្រួតពិនិត្យ​ឯកសារ​ឆៀក​រថយន្ត ដោយ​អាច​ពិចារណា​ធ្វើ​ប្រតិបត្តិការ​ឆ្មក់​តាម​គោលដៅ ប៉ុន្តែ​មិន​ត្រូវ​ឲ្យ​ការងារ​នេះ​ក្លាយ​ជា​កុងត្រូល​ជជុះ​ដែរ។

ទន្ទឹម​នេះ​ដែរ លោក​បញ្ជា​ទៅ​ស្ថាប័ន និង​មន្ត្រី​ត្រូវ​ដាក់​គោលដៅ​ដោយ​ធ្វើ​យ៉ាង​ណា​ឲ្យ​ពលរដ្ឋ​ខ្លាច​ច្បាប់​ចរាចរណ៍ ជាជាង​ខ្លាច​ប៉ូលិស ឬ​កងរាជ​អាវុធហត្ថ​ដែល​អនុវត្ត​ច្បាប់។

លោក​បន្ត​ថា បើ​ពលរដ្ឋ​ខ្លាច​ច្បាប់ ទើប​ធានា​សុវត្ថិភាព​ចរាចរណ៍​បាន​ច្រើន តែ​បើ​ពលរដ្ឋ​ខ្លាច ហើយ​អ្នក​អនុវត្ត​ច្បាប់​កាន់តែ​រឹត​បន្តឹង​ខ្លាំង​ទៀត នោះ​គ្រោះថ្នាក់​ចរាចរណ៍​អាច​នឹង​ធូរស្រាល ប៉ុន្តែ​ប្រសិនបើ​មាន​ការ​បន្ថយ​ការ​រឹត​បន្តឹង ស្ថានភាព​ល្មើស​ច្បាប់​ចរាចរណ៍​ក៏​កម្រើក​ឡើងវិញ​ជាមិនខាន។

លោក ស ខេង ក៏​ជំរុញ និង​លើក​ទឹកចិត្ត​ឲ្យ​ប្រជាពលរដ្ឋ​ទាំងអស់​ត្រូវ​ហ៊ាន​រាយការណ៍​អំពី​ករណី​អនុវត្ត​ច្បាប់​មិន​ប្រក្រតី​របស់​សមត្ថកិច្ច ដើម្បី​លើក​កម្ពស់​ការ​អនុវត្ត​ច្បាប់​ឲ្យ​បាន​ល្អ​ប្រសើរ។

ការ​ជំរុញ​របស់​រដ្ឋមន្ត្រី​ក្រសួង​មហាផ្ទៃ​រូប​នេះ ធ្វើឡើង​បន្ទាប់ពី​នគរបាល​ចរាចរណ៍​មួយ​ចំនួន​បាន​ផាក​ពិន័យ​លើស​ច្បាប់​កំណត់ និង​បង្ក​ហិង្សា​លើ​ពលរដ្ឋ ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស