30 C
Phnom Penh

អាជ្ញាធរ​វាយ​កម្ទេច​របង​សង់​លើ​ដី​ឆ្នេរ​អូរឈើទាល​តាម​បញ្ជា​លោក ហ៊ុន សែន ក្រោយ​មហាជន​រិះគន់

ដោយ ឌឹ ខេមបូឌា ដេលី

បទវិភាគ

របង​សាងសង់​លើ​ដី​ឆ្នេរ​អូរឈើទាល ត្រូវ​បាន​វាយ​កម្ទេច​ចោល​ទាំង​យប់​កាលពី​ថ្ងៃទី​៨ ខែ​កុម្ភៈ តាម​បញ្ជា​របស់​លោក ហ៊ុន សែន ក្រោយពី​សារព័ត៌មាន​បាន​ផ្សព្វផ្សាយ និង​មាន​ប្រតិកម្ម​ខ្លាំង​ពី​មហាជន ប៉ុន្តែ​នៅតែ​មិនទាន់​ដឹង​ថា​អ្នក​ណា​ជា​ម្ចាស់​កម្មសិទ្ធិ​ដដែល។

អភិបាល​រង និង​ជា​អ្នក​នាំពាក្យ​សាលាខេត្ត​ព្រះសីហនុ លោក ឡុង ឌីម៉ង់ បាន​ប្រាប់​សារព័ត៌មាន​ក្នុង​ស្រុក​ថា អាជ្ញាធរ​វាយ​កម្ទេច​របង​សង់​លើ​ដី​ឆ្នេរ​អូរឈើទាល​ទាំង​យប់ បន្ទាប់ពី​ទទួល​បាន​គោលការណ៍​ពី​លោក ហ៊ុន សែន ដោយ​លោក​ជា​អ្នក​ចេញ​មុខ​សម្របសម្រួល​ជាមួយ​ម្ចាស់​កម្មសិទ្ធិ​ដី​នោះ។

ការ​វាយ​កម្ទេច​ជញ្ជាំង​ថ្ម​ទាំង​យប់​កាលពី​ថ្ងៃទី​៨ ខែ​កុម្ភៈ នេះ ធ្វើឡើង​បន្ទាប់ពី​មាន​ប្រតិកម្ម​ខ្លាំង​ពី​មហាជន និង​ការ​ផ្សព្វផ្សាយ​ពី​បណ្ដាញ​សារព័ត៌មាន​ផង​ដែរ។ ក្នុង​នោះ អ្នក​ប្រើប្រាស់​បណ្ដាញ​សង្គម​ខ្លះ​បាន​យក​សេចក្តី​ថ្លែង​របស់​លោក ហ៊ុន សែន កាលពី​ពេល​កន្លងមក​ដែល​បាន​បញ្ជា​ទៅ​ក្រសួង​ស្ថាប័ន​ពាក់ព័ន្ធ មោឃភាព​ចោល ឬ​លុប​ចោល​ការ​ផ្ដល់​ប័ណ្ណ​កម្មសិទ្ធិ បើសិនជា​វា​បាន​រំលោភ​លើ​ដី​ឆ្នេរសមុទ្រ និង​ប៉ះពាល់​ដី​ភ្នំ​ដែល​ជា​សម្បត្តិ​រដ្ឋ​នោះ។

សកម្មភាព​កម្មករ​សង់​របង​ថ្ម​នៅ​ឆ្នេរ​អូរឈើទាល ខេត្ត​ព្រះសីហនុ កាលពី​ដើម​ខែ​កុម្ភៈ ឆ្នាំ​២០២៣។

នាយិកា​មជ្ឈមណ្ឌល​សិទ្ធិមនុស្ស​កម្ពុជា អ្នកស្រី ចក់ សុភាព បាន​សរសេរ​លើ​ហ្វេសប៊ុក​ថា ការ​វាយ​កម្ទេច​របង​ជញ្ជាំង​ថ្ម​ចោល​នា​ពេលនេះ នៅ​មិនទាន់​ឆ្លើយតប​ទៅ​នឹង​ចម្ងល់ និង​ភាព​មិន​ច្បាស់លាស់​នៃ​ការ​ធ្វើ​អនុបយោគ​ទីតាំង​នោះ​នៅឡើយ​ទេ។

អ្នកស្រី​ទាមទារ​ឲ្យ​រដ្ឋាភិបាល និង​អាជ្ញាធរ​ត្រូវ​ពន្យល់ និង​បង្ហាញ​ឱ្យ​ច្បាស់ ហើយ​បើ​ខុស​នីតិវិធី​នោះ អ្នកស្រី​ថា​អាជ្ញាធរ​ត្រូវ​រក​អ្នក​ទទួល​ខុសត្រូវ​ឱ្យ​បាន​ច្បាស់លាស់ ដើម្បី​ជៀសវាង​ការ​បន្ត​បំពាន​ទៅ​លើ​ធនធាន​ធម្មជាតិ និង​ទ្រព្យសម្បត្តិ​សាធារណៈ។

អ្នកស្រី​ថា បើ​តាម​ច្បាប់​ភូមិបាល​ឆ្នាំ​២០០១ ចែង​ថា ទ្រព្យសម្បត្តិ​សាធារណៈ​របស់​រដ្ឋ​មិន​អាច​ជា​កម្មវត្ថុ​ទិញ​លក់​ទេ តែ​អាច​ធ្វើ​អនុបយោគ​ទៅ​ជា​ទ្រព្យសម្បត្តិ​ឯកជន​របស់​រដ្ឋ​នៅ​ពេល​បាត់បង់​ប្រយោជន៍​សាធារណៈ។

របង​ថ្ម​នៅ​ឆ្នេរ​អូរឈើទាល ខេត្ត​ព្រះសីហនុ កាលពី​ដើម​ខែ​កុម្ភៈ ឆ្នាំ​២០២៣។

ចំពោះ​លក្ខខណ្ឌ​នៃ​ការ​អនុបយោគ​នោះ​វិញ យោង​តាម​ព្រះរាជក្រឹត្យ​លេខ​៣៣៩ ចែង​ថា៖

  1. ទ្រព្យសម្បត្តិ​នោះ​មិន​មាន​ផល​ប្រយោជន៍​ដល់​សាធារណៈ
  2. ទ្រព្យសម្បត្តិ​នោះ​បាន​បាត់បង់​មុខងារ​ផល​ប្រយោជន៍​សាធារណៈ
  3. ទ្រព្យសម្បត្តិ​នោះ​មិន​អាច​ប្រើប្រាស់​បាន​ជា​សាធារណៈ។

ទោះបីជា​របង​ជញ្ជាំង​ថ្ម​ដែល​សាងសង់​លើ​ដី​ឆ្នេរ​អូរឈើទាល ត្រូវ​បាន​វាយ​កម្ទេច​ចោល​ហើយ​ក្ដី ប៉ុន្តែ​មក​ដល់​ពេលនេះ​គេ​នៅ​មិនទាន់​ដឹង​ថា ម្ចាស់​កម្មសិទ្ធិ​ដែល​ហ៊ាន​សាងសង់​របង​រំលោភ​លើ​ដី​ឆ្នេរសមុទ្រ​ជា​នរណា​នៅឡើយ​ទេ។

បើ​តាម​សារាចរ​ណែនាំ​ស្ដីពី​ការ​អភិវឌ្ឍ​តំបន់​ឆ្នេរសមុទ្រ​របស់​កម្ពុជា​ឆ្នាំ​២០១២ បាន​ហាម​ដាច់ខាត​មិន​ឱ្យ​មាន​ការ​សាងសង់​ណា​មួយ​ដែល​មាន​ចម្ងាយ ១០០​ម៉ែត្រ​ពី​ឆ្នេរសមុទ្រ ដោយ​គិត​ចាប់ពី​ចំណុច​ទឹកជោរ​នៃ​ទឹកសមុទ្រ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស