ក្រុមអ្នកឃ្លាំមើលសង្គមលើកឡើងថា នៅពេលដែលប្រទេសមួយមាននីតិរដ្ឋចុះខ្សោយ អ្នកមានអំណាច និងបក្ខពួករបស់ពួកគេប្រាកដជានឹងហែកហួរទ្រព្យសម្បត្តិជាតិ ធ្វើមានធ្វើបានរៀងៗខ្លួន។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ សរសេរលើគណនីហ្វេសប៊ុករបស់លោកកាលពីថ្ងៃព្រហស្បតិ៍ ទី៩ កុម្ភៈ ដែលទំនងសំដៅដល់អ្នកមានអំណាចនៅប្រទេសកម្ពុជា ថាការដណ្តើមធនធានដែលជាទ្រព្យសម្បត្តិរបស់ប្រទេសជាតិធ្វើជាអ្នកមានស្តុកស្តម្ភ បានកើតមានយូរណាស់ហើយ ក្នុងនោះពួកគេចែកគ្នាតាមបក្ខពួក ដូចជាអ្នកណាមានសែស្រឡាយជាមួយអ្នកមានអំណាចកាន់តែខ្ពស់ ក៏អាចដណ្តើមទ្រព្យសម្បត្តិជាតិបានកាន់តែច្រើន ចំណែកអ្នកដែលមិនសូវមានសែស្រឡាយក៏មិនអាចដណ្តើមបានច្រើនទៅតាមហ្នឹងដែរ។
បណ្ឌិត ឡៅ ម៉ុងហៃ លើកឡើងថា ចំណែកអ្នកខ្លះទៀតដែលមិនសូវមានសែស្រឡាយទោះជាដណ្តើមបានទ្រព្យសម្បត្តិជាតិមិនសូវច្រើន ក៏នៅតែរងនូវការដណ្តើមពីអ្នកដទៃដែលមានសែស្រឡាយជាមួយអ្នកមានអំណាចធំជាងខ្លួននៅថ្ងៃណាមួយដែរ ដែលពួកគេនឹងរងនូវការដកហូត ក្រោមរូបភាពធ្វើជាដីសម្បទានឲ្យទៅប្រជាពលរដ្ឋ ឬសម្បទានឲ្យទៅក្រុមហ៊ុនណាមួយ ជាដើម។
អ្នកវិភាគនយោបាយ និងសង្គមរូបនេះបញ្ជាក់ថា ការអភិវឌ្ឍប្រទេសជាតិមួយដោយផាត់ចោលនូវភាគីពាក់ព័ន្ធ ដូចជាប្រជាពលរដ្ឋ ក្នុងន័យថាប្រជាពលរដ្ឋមិនអាចទទួលបានផលប្រយោជន៍ពីការអភិវឌ្ឍនោះ ហើយផលប្រយោជន៍ទាំងនោះបានទៅតែលើអ្នកមានអំណាច ត្រូវគេចាត់ទុកថាមិនមែនជាការអភិវឌ្ឍទេ ប៉ុន្តែជាការកេងប្រវ័ញ្ច ឬការដណ្តើមផលប្រយោជន៍ប៉ុណ្ណោះ។
អ្នកស្រាវជ្រាវការអភិវឌ្ឍសង្គម បណ្ឌិត មាស នី បានលើកឡើងថា ប្រជាពលរដ្ឋកំពុងនាំគ្នាសាងនីតិរដ្ឋឱ្យរឹងមាំ ប៉ុន្តែសព្វថ្ងៃនេះការហែកដីរដ្ឋចែកគ្នាលក់ធ្វើមានពីសំណាក់អ្នកមានអំណាច នៅតែបន្តកើតមាន។
លោកចោទសួរថា តើអ្នកដឹកនាំនៅតែបន្តនិយាយខុសពីការអនុវត្តដល់ពេលណាទៀត?
លោកបន្ថែមថា បើនៅតែបណ្តែតបណ្តោយឲ្យមានការពុះដីរដ្ឋចែកគ្នាលក់បែបនេះទៀត ទ្រព្យសម្បត្តិរបស់ខ្មែរដែលមានតម្លៃមហាសាលនឹងត្រូវវិនាសសាបសូន្យជាមិនខាន។
អ្នកតាមដានស្ថានការណ៍នយោបាយកម្ពុជា លោក សុខ សុគន្ធ ធ្លាប់បានរិះគន់ថា ប្រទេសកម្ពុជាសព្វថ្ងៃនេះមិនមែនអនុវត្តច្បាប់ទេ គឺអនុវត្តតាមបញ្ជាលោក ហ៊ុន សែន។ ដូច្នេះហើយបានជាពួកគេយកទ្រព្យសម្បត្តិជាតិចែកគ្នាគ្មានទោសពៃរ៍នោះទេ ប៉ុន្តែពួកគេច្រើនតែប្រើរូបភាពជាសម្បទាននៅគ្រប់ទីកន្លែងអស់ ខណៈការស្រាវជ្រាវដើម្បីឱ្យមានតម្លាភាពមិនត្រូវបានអនុវត្តនោះឡើយ។
ទាក់ទិននឹងបញ្ហានេះ កាលពីថ្ងៃទី៣០ ខែវិច្ឆិកា ឆ្នាំ២០២២ លោក ហ៊ុន សែន ចុះហត្ថលេខាលើអនុក្រឹត្យមួយដោយកំណត់ដីសាធារណៈរបស់រដ្ឋជិត ១លានហិកតារនៅក្នុងតំបន់ការពារធម្មជាតិក្នុងខេត្តចំនួន១៥ រួមមានខេត្តត្បូងឃ្មុំ ក្រចេះ មណ្ឌលគិរី រតនគិរី ស្ទឹងត្រែង កំពង់ធំ និងខេត្តតាកែវ ជាដើម ដើម្បីត្រៀមធ្វើអនុបយោគ និងបែងចែកសម្រាប់កម្មសិទ្ធិឯកជនឱ្យទៅក្រុមហ៊ុនឯកជននានាដើម្បីធ្វើការអភិវឌ្ឍ។
ទាក់ទិននឹងការបែងចែកដីរដ្ឋឱ្យបុគ្គលឯកជន និងក្រុមហ៊ុនឯកជននេះ ឧកញ៉ាដែលជិតស្និទ្ធនឹងលោកនាយករដ្ឋមន្ត្រី ហ៊ុន សែន ជាច្រើននាក់ រួមទាំងសាច់ញាតិ និងកូនបង្កើតរបស់គាត់ផង បានទទួលដីរដ្ឋជាច្រើនរយហិកតារធ្វើជាកម្មសិទ្ធិ ដូចជាឧកញ៉ា ពុង ឃាវសែ ឧកញ៉ា សេង ញ៉ក និងឧកញ៉ា លី យ៉ុងផាត់ ជាដើម ដែលមានរហស្សនាមថាស្ដេចកោះកុងសព្វថ្ងៃនេះ។ ជាងនេះទៀត អ្នកស្រី ហ៊ុន ម៉ាណា និងអ្នកស្រី ហ៊ុន ម៉ាលី ដែលត្រូវជាកូនស្រីបង្កើតរបស់លោកនាយករដ្ឋមន្ត្រី ហ៊ុន សែន ក៏ទទួលបានដីរដ្ឋជារយហិកតារផងដែរ៕