អ្នកជំនាញរបស់អង្គការសហប្រជាជាតិ អំពាវនាវឲ្យរដ្ឋាភិបាលកម្ពុជាបើកវិទ្យុសំឡេងប្រជាធិបតេយ្យ (VOD) ឡើងវិញ ដើម្បីបើកសេរីភាពដល់ប្រព័ន្ធផ្សព្វផ្សាយដែលហ៊ាននិយាយអំពីការរិះគន់នានានៅមុនដំណើរការបោះឆ្នោតជាតិខាងមុខ។
ការអំពាវនាវនេះ ធ្វើឡើងបន្ទាប់ពីលោក ហ៊ុន សែន បានបញ្ជាទៅក្រសួងព័ត៌មានឲ្យដកអាជ្ញាប័ណ្ណសារព័ត៌មាន VOD ទោះបីជាស្ថាប័នមួយនេះបានសរសេរលិខិតទៅលោក ហ៊ុន សែន ចំនួនពីរដងដើម្បីបង្ហាញពីការសុំទោសក៏ដោយ។
សេចក្ដីថ្លែងការណ៍ចុះថ្ងៃទី២០ ខែកុម្ភៈ ឆ្នាំ២០២៣ អ្នកជំនាញរបស់អង្គការសហប្រជាជាតិប្រចាំកម្ពុជា បានឲ្យដឹងថា អាជ្ញាធរកម្ពុជាត្រូវបើកវិទ្យុសំឡេងប្រជាធិបតេយ្យឡើងវិញ ដោយពួកគេបង្ហាញក្ដីបារម្ភថា ការដកហូតអាជ្ញាប័ណ្ណរបស់វិទ្យុសំឡេងប្រជាធិបតេយ្យដោយគ្មានដំណើរការត្រឹមត្រូវ និងមានឥទ្ធិពលភ្លាមៗនេះ នឹងប៉ះពាល់ដល់ដំណើរការបោះឆ្នោតជាតិដែលមានសារសំខាន់នៅខែកក្កដា ខាងមុខនេះ។
ការដកហូតអាជ្ញាប័ណ្ណសារព័ត៌មាន VOD ភ្លាមៗនេះ វាបានបង្ហាញឲ្យឃើញថា នៅកម្ពុជាសេរីភាពរបស់ប្រព័ន្ធផ្សព្វផ្សាយក្នុងប្រទេសនេះ គឺមិនមានទៀតទេ បន្ទាប់ពីស្ថានីយវិទ្យុឯករាជ្យមួយនេះដែលបានផ្សាយទាំងជាភាសាអង់គ្លេស និងទាំងជាភាសាខ្មែរត្រូវបានបញ្ជាឲ្យដកអាជ្ញាប័ណ្ណកាលពីសប្តាហ៍មុននោះ។
ករណីនេះ អ្នកជំនាញអង្គការសហប្រជាជាតិ បានអំពាវនាវឲ្យអាជ្ញាធរកម្ពុជាត្រូវពិនិត្យមើលឡើងវិញជាបន្ទាន់ចំពោះការដកហូតអាជ្ញាប័ណ្ណសារព័ត៌មានវីអូឌី ខណៈពិភពលោកកំពុងតាមឃ្លាំមើលប្រទេសកម្ពុជាមុនការបោះឆ្នោតនៅខែកក្កដា ឆ្នាំ២០២៣ នេះ។
អ្នកជំនាញដដែលបញ្ជាក់ថា សិទ្ធិសេរីភាពរបស់អង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យនៅកម្ពុជាក្នុងដំណាក់កាលនេះ វាមានសារសំខាន់ រួមទាំងប្រព័ន្ធផ្សព្វផ្សាយដែលហ៊ាននិយាយ និងរាយការណ៍រិះគន់គោលនយោបាយរបស់រដ្ឋាភិបាល។
ក្រុមអ្នកជំនាញសិទ្ធិមនុស្សដែលចេញសេចក្ដីប្រកាសព័ត៌មានរួមគ្នាកាលពីថ្ងៃទី២០ ខែកុម្ភៈ រួមមានអ្នករាយការណ៍ពិសេសរបស់អង្គការសហប្រជាជាតិស្ដីពីសិទ្ធិមនុស្សនៅកម្ពុជា លោក វីទិត មុនតាប៊ន (Vitit Muntarbhorn) អ្នករាយការណ៍ពិសេសស្ដីពីស្ថានភាពអ្នកការពារសិទ្ធិមនុស្ស អ្នកស្រី ម៉ារី ឡូឡ័រ (Mary Lawlor) និងអ្នករាយការណ៍ពិសេសស្ដីពីការលើកកម្ពស់ និងការពារសិទ្ធិបញ្ចេញមតិ អ្នកស្រី អាយរិន ខាន (Irene Khan)។
វិទ្យុសំឡេងប្រជាធិបតេយ្យ (VOD) ត្រូវបានប្រកាសឱ្យលុបអាជ្ញាប័ណ្ណកាលពីថ្ងៃទី១៣ ខែកុម្ភៈ ឆ្នាំ២០២៣ បន្ទាប់ពីមានបញ្ជាពីលោក ហ៊ុន សែន ថាអង្គភាពសារព័ត៌មានមួយនេះមានចេតនាមួលបង្កាច់កូនប្រុសរបស់លោក ជុំវិញការចុះហត្ថលេខាផ្តល់ជំនួយឱ្យប្រទេសតួកគី និងបានធ្វើឱ្យប៉ះពាល់ដល់កិត្តិយសរបស់រដ្ឋាភិបាលរបស់លោកជុំវិញការគ្រប់គ្រងថវិកាជាតិផងដែរ។
ក្រៅពីបិទហើយ បុរសខ្លាំងកាន់អំណាចជិត ៤០ឆ្នាំនៅកម្ពុជា បានប្រកាសជាសាធារណៈដោយកុំឲ្យអន្តរជាតិលូកដៃពាក់ព័ន្ធនឹងរឿងដែលលោកបិទសារព័ត៌មាន VOD កាលពីពេលថ្មីៗនេះ ក្រោមហេតុផលថា កម្ពុជាមិនមែនជាប្រទេសរបស់ជនបរទេសទាំងនោះឡើយ។
ទន្ទឹមនឹងបិទស្ថាប័នសារព័ត៌មានឯករាជ្យដែលបម្រើផលប្រយោជន៍សង្គមជាតិ និងពលរដ្ឋហើយ លោក ហ៊ុន សែន ក៏បានប្រកាសផ្ដល់ការងារក្របខ័ណ្ឌរដ្ឋដល់អតីតបុគ្គលិកសារព័ត៌មានវីអូឌី ក្នុងនោះបុគ្គលខ្លះក៏បានទទួលយកក្របខ័ណ្ឌរដ្ឋ និងអ្នកខ្លះទៀតសម្រេចចិត្តមិនទទួល ខណៈសហគមន៍អន្តរជាតិបានចេញញត្តិថ្កោលទោស ដោយចាត់ទុកការបិទស្ថាប័នព័ត៌មានឯករាជ្យចុងក្រោយថាបានប៉ះពាល់សិទ្ធិសេរីភាពបញ្ចេញមតិ និងប្រព័ន្ធផ្សព្វផ្សាយនៅកម្ពុជា។
យោងតាមរបាយការណ៍របស់អង្គការអ្នករាយការណ៍ព័ត៌មានគ្មានព្រំដែន (Reporters Without Borders) ដែលមានមូលដ្ឋាននៅក្រុងប៉ារីស (Paris) ប្រទេសបារាំង (France) បានចាត់ចំណាត់ថ្នាក់សេរីភាពសារព័ត៌មាននៅកម្ពុជាជាប់លេខ ១៤២ ក្នុងចំណោម ១៨០ប្រទេស និងដែនដីក្នុងសន្ទស្សន៍សេរីភាពសារព័ត៌មានពិភពលោកឆ្នាំ២០២២ របស់អង្គការអ្នករាយការណ៍ព័ត៌មានគ្មានព្រំដែន៕