32 C
Phnom Penh

លោក ផែង វណ្ណៈ ប្រកាស​ជប់លៀង​ក្រោយពី​លោក ហ៊ុន សែន ចេញ​មុខ​ការពារ​រឿង​ប្រមាថ​ស្ត្រី​និង​វាយប្រហារ​VOD

ដោយ ឌឹ ខេមបូឌា ដេលី

បទវិភាគ

លោក ផែង វណ្ណៈ ប្រកាស​ជប់លៀង​អ្នកគាំទ្រ​រាជរដ្ឋាភិបាល​នៅ​តាម​បណ្ដាញ​សង្គម​ហ្វេសប៊ុក​ទូទាំង ២៥​រាជធានី-ខេត្ត ក្រោយពី​លោក ហ៊ុន សែន បាន​ចេញ​មុខ​ការពារ​ចំពោះ​វិធានការ​ច្បាប់ ទោះបីជា​លោក​បាន​ជេរ​ប្រមាថ​មាក់ងាយ​លើ​ស្ត្រី និង​វាយប្រហារ​លើ​ស្ថាប័ន​សារព័ត៌មាន VOD។

បើ​តាម​ហ្វេសប៊ុក​ឈ្មោះ ផែង វណ្ណៈ បាន​សរសេរ​នៅ​ថ្ងៃទី​២២ ខែ​កុម្ភៈ នេះ​ថា ខ្លួន​នឹង​ហៅ​អ្នកគាំទ្រ​រាជរដ្ឋាភិបាល​នៅ​តាម​បណ្ដាញ​សង្គម​ហ្វេសប៊ុក​ទូទាំង ២៥​រាជធានី-ខេត្ត​សរុប​ចំនួន ៥០០​នាក់ ជួបជុំ​គ្នា​នៅ​ភោជនីយដ្ឋាន​មួយ​ក្នុង​រាជធានី​ភ្នំពេញ។

លោក​បញ្ជាក់​ថា ការ​ជួបជុំ​នៅ​ថ្ងៃទី​២៥ ខែ​មីនា ឆ្នាំ​២០២៣ វេលា​ម៉ោង ១១​ថ្ងៃ​ត្រង់​ខាងមុខ​នេះ ធ្វើឡើង​ក្នុង​គោលបំណង​ដើម្បី​ពង្រឹង​មិត្តភាព សាមគ្គីភាព និង​ចែករំលែក​បទពិសោធន៍​គ្នា​ទៅវិញ​ទៅមក​ក្នុង​ការ​រួម​ចំណែក​បង្ក្រាប​ព័ត៌មាន​ក្លែងក្លាយ​ដែល​ប្រឌិត​ដោយ​ពួក​ប្រតិកិរិយា ជាពិសេស​ដើម្បី​ត្រៀម​លក្ខណៈ​សម្បត្តិ​ឆ្ពោះ​ទៅ​រក​ការ​បោះឆ្នោត​ជាតិ​នា​ពេល​ខាងមុខ។

ការ​ប្រកាស​ជប់លៀង​នា​ពេលនេះ ស្រប​ពេល​ដែល​លោក ផែង វណ្ណៈ ខ្លួនឯង​បាន​ជេរ​ប្រមាថ​មាក់ងាយ និង​បៀតបៀន​ស្ត្រី​អ្នក​សារព័ត៌មាន​ធ្ងន់ធ្ងរ ប៉ុន្តែ​បែរ​ជា​ក្រសួង​ពាក់ព័ន្ធ និង​សមត្ថកិច្ច​មិន​មាន​វិធានការ​ច្បាប់ ហើយ​ថែមទាំង​ត្រូវ​បាន​លោក ហ៊ុន សែន បាន​ចេញ​មុខ​ការពារ​ទៀត​ផង បើ​ទោះបីជា​ក្រុម​អង្គការ​សង្គម​ស៊ីវិល​ចំនួន ៤០​ស្ថាប័ន​បាន​ទទូច​ឲ្យ​ក្រសួង​ចំនួន ៤ ចាត់​វិធានការ​ច្បាប់​លើ​លោក ផែង វណ្ណៈ ក៏ដោយ។

លោក ផែង វណ្ណៈ ប្រកាស​ជប់លៀង​នៅ​ថ្ងៃទី​២៥ ខែ​កុម្ភៈ នេះ ហាក់​បង្ហាញ​ពី​ឥទ្ធិពល​របស់​ខ្លួន​ក្រោយពី​លោក ហ៊ុន សែន ចេញ​មុខ​ការពារ ទោះបីជា​ប្រព្រឹត្ត​អំពើ​អសីលធម៌ និង​បំពាន​ច្បាប់។ ជាមួយ​គ្នា​នេះ​ដែរ កាលពី​ឆ្នាំ​២០១៣ ហ្វេសប៊ុក​ដាក់​ឈ្មោះ ផែង វណ្ណៈ ក៏​បាន​គំរាម​បាញ់​សម្លាប់​ប្រធាន​គណបក្ស​សង្គ្រោះ​ជាតិ លោក កឹម សុខា ចំនួន ៧​គ្រាប់​ផង​ដែរ ប៉ុន្តែ​កាលនោះ លោក​មិន​ត្រូវ​បាន​ចាប់​ខ្លួន​ឡើយ ផ្ទុយ​ពី​ករណី​ព្រះសង្ឃ​ព្រះនាម ហន សុផាន្នី គង់​នៅ​វត្ត​ដំរីស ដែល​គ្រាន់តែ​បង្ហោះ​រូបថត​កាំភ្លើង​មួយ​ដើម​នៅ​លើ​ហ្វេសប៊ុក ត្រូវ​បាន​អាជ្ញាធរ​ខេត្ត​បាត់ដំបង បាន​ចាប់​ផ្សឹក ហើយ​វាយ​ខ្នោះ​បញ្ជូន​ទៅ​ដាក់​គុក​ភ្លាមៗ ដោយ​តុលាការ​ចោទប្រកាន់​រហូត​ចំនួន ២​បទល្មើស គឺ​បទ​ប្រើប្រាស់​អាវុធ​ខុស​ច្បាប់ និង​ញុះញង់​ឲ្យ​ប្រព្រឹត្ត​បទ​ឧក្រិដ្ឋ​ជាអាទិ៍ ដោយ​កាត់ទោស​ឲ្យ​ជាប់​ពន្ធនាគារ​ចំនួន ២​ឆ្នាំ​កាលពី​អំឡុង​ឆ្នាំ​២០១៧។

មួយ​វិញ​ទៀត ការ​ជប់លៀង​នេះ ស្រប​ពេល​ដែល​រដ្ឋាភិបាល​ដឹកនាំ​ដោយ​លោក ហ៊ុន សែន បាន​បិទ​សារព័ត៌មាន​ឯករាជ្យ VOD ដែល​កន្លងមក លោក ផែង វណ្ណៈ តែងតែ​ធ្វើការ​វាយប្រហារ និង​ចោទប្រកាន់​ថា​បម្រើ​គណបក្ស​ប្រឆាំង​ទៅវិញ ខណៈ​ស្ថាប័ន​សារព័ត៌មាន VOD ត្រូវ​បាន​ប្រជាពលរដ្ឋ​ចាត់ទុក​ថា សារព័ត៌មាន​មួយ​ដែល​ផ្សាយ​ព័ត៌មាន​ពិត​ក្នុង​សង្គម​កម្ពុជា ជាពិសេស​រឿង​បញ្ហា​ប្រជាពលរដ្ឋ​កំពុង​រងគ្រោះ​ដីធ្លី សិទ្ធិ​ការងារ បរិស្ថាន និង​អំពើពុករលួយ ព្រម​ទាំង​រឿង​អយុត្តិធម៌​ផ្សេងៗ​ទៀត​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស